Driesestig

Jakob Fortuin en sy vrou, Maria, sit elke Dinsdag oorkant Haidee Muller-Isaacs se ouerhuis op Oudtshoorn. Dis die dag wanneer die vullistrok kom. Swaarkry ken hulle goed. Hulle speel Gospelmusiek kliphard op ‘n draadloos wat hulle oral saamdra. Hulle hond, Jokey, loop ook oral saam. Jakob sê die Gospelmusiek gee hom hoop. Haidee het by haar ouers op Oudtshoorn gekuier, en natuurlik moes sy meer gaan uitvind.

Marguerite Holtzhausen vertel vir Martelize Brink van die hulp wat beskikbaar is by The Trauma Centre vir slagoffers van geweld en marteling.

Nadat die Springbokke van die 1981-meelbomtoer uit Nieu-Seeland weg is met ‘n 1 - 2 toetsreeksnederlaag, het hulle vir die eerste keer in ‘n amptelike toets teen die VSA uitgedraf. Die buitelandse druk was fel teen Suid-Afrika, en eerwaarde Jesse Jackson se naam was prominent as een van die teenstanders van die toer. Hoe het die spelers hierop gereageer, en hoe lewensveranderend was die ervaring? Johan Rademan gesels met die mees senior oorlewende Bok van die 81-groep, die 74-jarige Willie Kahts, en die flank wat teenaanval onder die wêreld se aandag gebring het in die jare tagtig, Rob Louw.

Hoe het dit gebeur dat twee spelers van die Springbokke die vlagmanne was in die eerste amptelike toets tussen die Springbokke en die USA Eagles in 1981, en op die koop toe nog die vlag self moes maak? Die toets is op 25 September in Glenville, New York, gespeel. Die Bokke het 38 - 7 gewen. Johan Rademan het met Thys Burger en Gysie Pienaar by die 1981-reünie gesels.

Joost Pyck, oorspronklik van Vlaandere, is ‘n klipkapper van beroep. Hy het onlangs George se tolhuis help restoureer. Hy het al 'n boek in Afrikaans gepubliseer, en binnekort is daar nog een. Hy het 11 jaar lank op Oudtshoorn gewoon, en het nou nes geskop op Klapmuts. Haidee Muller-Isaacs het gaan kyk hoe hy klippe kap.

Biokinetikus Rayno Klaassen vertel vir Martelize Brink van die die Enable Sentrum in Kenilworth, 'n niewinsgewende rehabilitasiesentrum wat mense ná bv. motorongelukke, toegang tot hulle dienste gee.

Sowat drie jaar gelede het ons met die Baaienaar Bobby Ferreira gepraat, wat al 50 jaar lank die eienaar van sy eie gimnasium was, en op 82-jarige ouderdom steeds fiksheidinstrukteur vir sy kliënte. Toe Bobby aan die einde van 2019 wou aftree, het sy jarelange kliënte al sy oefenapparaat by hom gekoop, en op ‘n nuwe perseel met die Bobby Ferreira Gimnasium aangegaan. Woensdae is hy steeds hulle fiksheidsintrukteur. Mariska Spoormaker het hom daar gaan opsoek.

Dr. Johan Minnie vertel vir Johan Rademan en Martelize Brink hoe skarebestuur by groot geleenthede, soos musiekfeeste, gedoen word.

Prokureur Trudie Broekmann vertel vir Johan Rademan en Martelize Brink hoe jy lakse stadsamptenare en raadslede tot verantwoording kan roep wanneer daar swak dienslewering is.