Selby van RSG se susterstasie Ukhozi FM se 12 2 3 Cafe-program, gesels met Martelize Brink oor Afrikaanse woorde. Dit is deel van 'n kultuurskakeling tussen RSG en die isiZulu-radiostasie in Erfenismaand.

Die VSA gaan tans gebuk onder geweldige brande. Wegholbrande in die twee Amerikaanse deelstate, Oregon en Kalifornië, saai groot verwoesting. Hoe voel dit om die brande naby aan jou te hê? Hennie Maas praat met Jan van Rooyen, 'n inwoner van Brookings in Oregon.

Jan Vermeulen van MyBroadband gesels met Martelize Brink oor selfoonbedrog.

Namakwaland is 'n droë, ruwe, meedoënlose landskap, maar een keer 'n jaar verander dit in 'n blommeprag. Vanjaar het die streek haar mooiste bont blomrok in agt jaar aangetrek! Namakwalanders van heinde en verre raak liries, en die verlange is erg. Jacqui January gesels met Jade Ewers, 'n Namakwalander in murg en been, wat deesdae in Kaapstad werk. Jade het oor Namakwaland begin dig ná 'n uiters koue Lentedag in Kaapstad. Jacqui January het met haar gepraat.

Wesley Rustin vertel vir Sue Pyler hoe Kunstekaap vanjaar die Jeug Jazzfees aanpak.

Zabeth Venter vertel vir Sue Pyler wat van iemand 'n goeie huurder maak, en vertel hoe die grendeltyd jou status as huurder beïnvloed.

Dr. Stephanie Vos vertel vir Sue Pyler van die boogmusiek van die amaXhosa.

Sarita Swart vertel vir Sue Pyler van die handgemaakte naaldwerkprodukte van 'n groep vroue in die Groot Karoo.

Marilie van der Merwe se loopbaan as onderwyser het 10 jaar gelede op Clanwilliam begin. Dit is waar sy haar trouman, 'n teeboer, ontmoet en later twee dogtertjies ryker geword het. Sy het aan die begin van 2019 die onderwys verlaat om voltyds kinderboeke te skryf, en sy het dit LEES LISA gedoop, vernoem na haar jongste. Sy vertel vir Haidee Muller van haar hart vir gebroke kinders, en hoe sy hulle met haar stories wil hoop gee.

Ons vier vandag die 80ste verjaarsdag van Conrad Theys, die laaste lewende kunstenaar wat tot die groep, die Kaapse Impressioniste, behoort. Op dieselfde dag, 9 September 1873, is merkwaardig genoeg, die pionier van die Kaapse Impressioniste, Pieter Wenning, gebore. Hy het van Den Haag op 'n jong ouderdom na Suid-Afrika gekom, omdat hy simpatiek in 'n opstand vir die werkers in die Nederlande was, en sy werk verloor het. Hy verhuis na Suid-Afrika om 'n klerk in 'n boekwinkel te word, en plant as kunstenaar die boompie van die kunsbeweging wat so hoog aangeslaan word in die kunswereld in Suid-Afrika. Pieter Wenning is reeds op 47-jarige ouderdom oorlede. Vandag is ons gelukkig om met die laaste Kaapse Impressionis van Loeriesfontein en Bellville-Suid, Conrad Theys, te kan gesels. Johan Rademan help om die 80 kersies uit te blaas.