Elizabeth Otto se 30-jarige seun het twee jaar gelede, op sy suster se verjaarsdag, in 'n verbyry-skietvoorval in Kuilsrivier gesterf. Tot vandag toe weet die familie nie die hoekom dit gebeur het nie, en niemand is ooit vasgetrek nie. Haidee Muller gesels met haar oor daardie noodlottige dag, en oor kinders wat nie met hulle ouers praat as daar fout is nie.

Danie van Loggerenberg gesels met Sue Pyler oor kinderbeskerming, en die noodlyn wat hy bedryf.

Soveel mense, soveel menings. 'n Mens kan ook sê: Soveel mense, soveel gewoontes. Johan Rademan gesels met 'n jong Suid-Afrikaner, Shannyn Coetzee, wat langer as 'n dekade op skepe gewerk het, en van plan was om op Richard Branson se skip se nooiensvaart as SPA-bestuurder uit Amerika te vaar. Toe slaan die virus die wêreld, en nou sit sy gestrand, maar nie stil nie.

Die afgelope Saterdag was dit Wêreld-aasvoëldag. Mariska Spoormaker het in die Oos-Kaap op 'n oudskoolhoof en boervrou afgekom, wat al jare lank beseerde aasvoëls onder haar vlerk neem en rehabiliteer. Haar naam is Kate Webster, en Mariska wou by haar weet waar alles begin het.

Abraham Daniels van Stronger2gether vertel vir Sue Pyler van moderne slawerny in die landboubedryf.

Jack Van Niekerk vertel vir Sue Pyler van Graaff-Reinett as 'n toerismebestemming.

Pieter Pienaar het in die goue jare van die Bellville-fietsryklub sewe jaar lank in die presidentstoel gesit. Hy vertel vir Johan Rademan van die klomp broers wat deelgeneem het aan fietsry in daardie jare, en die name wat een of twee strate van mekaar af gebly het. Die Tour de France word ook bespreek.

Wynand van Vuuren vertel vir Sue Pyler wat die versekeringsimplikasies van huisverbeterings is.

Wanneer jy dalk weer deur die Baviaanskloof ry, sal jy met ander oë na die omgewing kyk, want op 7 September begin RSG se nuwe vervolgverhaal, Die Wildedruif val deur P.H. Nortje, wat in hierdie wêreld ontvou. Die historiese jeugverhaal is gegrond op die groot vloed wat in 1916 plaasgevind het. Die skrywer is ook bekend vir boeke soos Pennie se vuur, Die Groen Ghoen, Donkerwater, In voetpad se kloof, Aan die sonkant en nog heelwat ander. Hy is in 2012 oorlede in die ouderdom 91. Sy seun deel met ons van die ervaringe wat in die jeugverhaal opduik.

Fleur van Eeden vertel vir Sue Pyler van Swellendam as toerismebestemming.