د دې اونۍ د "هارون باچا هنري ګړۍ" خپرونې مېلمه د ملاکنډ د تاڼې کلي يو پېژندلی رباب غږوونکی ماسټر اظهار دی. نوموړی وايي زده کړه يې له بېلا بېلو استادانو کړې او د خپل محنت په مټ بريالی شوی چې په پښتو رباب کې کلاسيکي رنګ جوت کړي. اظهار زياتوي چې په رباب کې يې يو تار اضافه کړی چې په خبره يې، دې کار يې هنر نور هم غښتلی کړی دی. د ماسټر اظهار خبرې او ځينې نغمې يې په خپرونه کې اورېدای شئ.

د دې اونۍ د "هارون باچا هنري ګړۍ" خپرونې مېلمه پېژندلی سندرغاړی اسحاق خان دی. نوموړی د افغانستان د ننګرهار ولايت دی، خو يوه موده يې په پېښور کې ژوند کړی او له تېرو شاوخوا ۱۵ کلونو راهيسې د چېک جمهوريت په پلازمېنه پراګ کې اوسېږي. خان د مشال راډيو په مرکزي دفتر کې د تخنيک په برخه کې د کار ترڅنګ وخت په وخت نوې سندرې هم خپروي. خو دی په خپګان وايي چې مساپرۍ يې د سندرو جوړولو امکانات ورته کم کړي دي. د اسحاق خان دا خبرې او ځينې سندرې يې په خپرونه کې اورېدای شئ.

د دې اونۍ د "هارون باچا هنري ګړۍ" خپرونې مېلمه پېژندلی وايلن غږوونکی او د موسيقۍ ثبتوونکی زياد خان دی. نوموړی د خيبر پښتونخوا د نوښار د يوې هنري کورنۍ دی، خو له تېرې څه مودې راهيسې په پېښور کې اوسي او هلته اډيو سټوډيو لري. د زياد خان په وينا، دی دا مهال په خيبر پښتونخوا کې یوازینی وايلن غږوونکی دی. نوموړي په خپله سټوډيو کې ګڼو پښتنو سندرغاړو ته سندرې جوړې او په موسيقۍ کې يې نوې تجربې کړې دي. خان وايي چې د سندرغاړو د سندرو د راجسټرولو کاروبار هم کوي. د زياد خان د هنري هلو ځلو په اړه یې خبرې او جوړې کړې سندرې په خپرونه کې اورېدای شئ.

د دې اونۍ د "هارون باچا هنري ګړۍ" مېلمه د سيمې يو سندرغاړی الماس خان اورکزی دی. نوموړی وايي، ۳۰ کلونه کېږي چې کورنۍ يې پېښور ته کډه کړې او د پښتو موسيقۍ په ميدان کې فعاله دی.

اورکزي يوشمېر غزلونه او ولسي سندرې ويلي دي خو وايي غزل يې زیات خوښ دی. نوموړی وايي، دوه زامن يې هم هنرمندان دي او ورسره يوځای موسيقي کوي. د اورکزي د ژوند او هنر په اړه یې خبرې او ځينې سندرې په خپرونه کې اورېدای شئ.

د دې اونۍ د "هارون باچا هنري ګړۍ" خپرونې مېلمه پېژندلی سندرغاړی اسفنديار مومند دی. نوموړي په وروستيو کې د سيمې له يوې سندرغاړې ثنا ګل سره د ویلو غبرګو ټپو ویډیو پر خپل رسمي یوټیوب چینل خپره کړه چې په دوو اونیو ۲.۵ مېلیونه ځلې ولیدل شوه. مومند دا يوه لويه لاس ته راوړنه بولي او وايي چې ده ته يې د لا ښو سندرو جوړولو روحيه بخښلې. دی زياتوي، کوښښ يې دی چې اسان فهمه شعرونه د سيمې له روايتي سازونو سره ووايي. د نوموړي دا خبرې او د مشهورو شويو ټپو ترڅنګ ځينې نورې سندرې يې په خپرونه کې اورېدای شئ.

د دې اونۍ د "هارون باچا هنري ګړۍ" خپرونې مېلمه د خيبر پښتونخوا يو ځوان او پېژندلی سندرغاړی نصيب ګل دی. نوموړی پېښور ته نيږدې د ماشو خېلو کلي د يوې هنري کورنۍ غړی دی. نصيب ګل وايي، ماشوم وو چې پلار يې مړ شو او دی اړ شو چې د کورنۍ د کفالت لپاره سندرې ووايي. دی زياتوي، موسيقي يې له څلورو بېلا بېلو استادانو زده کړې. د ده په خبره، د حجرو په محفلونو کې سندرې وايي او ترڅنګ يې د پېښور په ډبګرۍ کې د عبدالستار شاه باچا په دربار کې قوالي هم کوي. د نصيب ګل دا خبرې او ځينې سندرې يې په خپرونه کې اورېدای شئ.

د دې اونۍ د "هارون باچا هنري ګړۍ" خپرونې مېلمه ځوان سندرغاړی عمران سواتی دی. نوموړی د سوات د مینګورې دی، خو د خپلو هنري کارونو لپاره په پېښور کې اوسي. دی وايي، د موسيقۍ زده کړې يې له بېلا بېلو استادانو کړي. د ده په خبره، له يوشمېر ښځينه سندرغاړو سره یې ویلې غبرګې سندرې د خلکو زياتې خوښې شوې دي. سواتی زياتوي، د افغانستان او پاکستان د وګړو ترمينځ یې د دوستۍ په موخه يوه سندره جوړه کړې، چې ژر به يې خپره کړي. د عمران سواتي دا خبرې او ځينې سندرې يې په خپرونه کې اورېدای شئ.

د دې اونۍ د "هارون باچا هنري ګړۍ" خپرونې مېلمه د پېښور يو سندرغاړی نياز خان دی. نوموړی وايي، له هندي کلاسيکي موسيقۍ سره خپلې مينې اړ کړ چې په لاهور کې د موسيقۍ د يوې مشهورې کورنۍ “پټياله ګهرانه” شاګرد شي. نياز خان زياتوي، د موسيقۍ د زده کړې لپاره مسلسل محنت شرط دی. نوموړی پر پښتنو غږ کوي چې د خپلو هنرمندانو قدر وکړي. د نياز خان دا خبرې او ځينې سندرې يې په خپرونه کې اورېدای شئ.

د دې اونۍ د "هارون باچا هنري ګړۍ" خپرونې مېلمه د خيبر پښتونخوا د کرک ضلعې يو ځوان سندرغاړی سيد ماهي شاه دی. نوموړی په انګليسي ادبياتو کې ماسټري لري او له تېرو څو کلونو راهيسې په پېښور پوهنتون کې استاد دی. شاه هنر ته هم وخت ورکړی او وخت په وخت پښتو سندرې خپروي. دی وايي، کورنۍ ورته په دې شرط د موسيقۍ کولو اجازه ورکړه چې خپل تعليم به پوره کوي او معياري شعر به وايي. نوموړی زياتوي، تعليم يافته پښتانه ځوانان د موسيقۍ ميدان ته راتلل غواړي خو د زدکړې موقعې ورته برابرې نه دي. د سيد ماهي شاه دا خبرې اوځينې سندرې يې په خپرونه کې اورېدای شئ.

د دې اونۍ د "هارون باچا هنري ګړۍ" خپرونې مېلمه د پېښور يو ځوان سندرغاړی ذيشان جنت ګل دی. نوموړی د يوې هنري کورنۍ دی او وايي په اته کلنۍ کې یې له خپل پلار سره پر سټېج سندرې ويل پيل کړي ول. ۲۴ کلن جنت ګل زياتوي چې په پېښور کې خپله اډيو سټوډيو لري او ترڅنګ يې د پښتو موسيقۍ د پرلیکه یا انلاین خپراوي کاروبار هم کوي. د نوموړي د هنري کارونو په اړه یې خبرې او ځينې سندرې په خپرونه کې اورېدای شئ.