En l'emissiun dad oz vuless jau preschentar sauts da Lorenz Giovanelli e Hausi Straub. Dad els dus datti fitg blers tocs che vegnan sunads da numerusas chapellas en tut la Svizra.

Lorenz Giovanelli è naschi ils 18 da mars dal 1915 a Frutigen, mort è el ils 18 october dal 1976. Gia d'uffant ha el cumenzà a sunar l'orgelet ed il 1932 ha el fundà sia emprima chapella, la chapella «Alpengruss», cun Walter Isler, clarinetta - Hans Schmid, accordeon e Johann Grossen, cuntrabass. A partir dal 1941 ha el lavurà sco musicant da professiun ed ha accumpagnà blers auters tar lur producziuns, er sch'el na saveva betg leger e scriver notas e sunava tut ordador. Da Lorenz Giovanelli datti sur 250 cumposiziuns e durant sia vita ha el registrà sur 500 sauts cun differentas furmaziuns.

Hausi Straub è naschì ils 17 da december 1928 a Welschenrohr e viva uss a Bienna. Cumenzà a sunar ha el pir cun 18 onns, al principi l'accordeon e pli tard lura l'orgelet che ha fatg vegnir enconuschent el. Ils onns 60 ha el fundà il «Schwyzerörgeliquartett Hausi Straub», ha cumponì numerus sauts ch'èn daventads semperverds e che appartegnan tar il repertori da bleras chapellas. Er el, che ha emprendì a sunar l'orgelet sco autodidact, ha suna en pliras furmaziuns – er cun Lorenz Giovanelli.