Discussiuns sco anc mai hai dà avant il campiunadi mundial da ballape. Igl è stà il pli dispitaivel turnier da ballape da tut ils temps. Emoziuns e larmas da legria u tristezza hai dentant er dà al campiunadi mundial en il Qatar. RTR dat in sguard enavos ed enavant.

Numerusas istorgias da sport èn vegnidas scrittas las ultimas emnas. Dad in nunditg debachel èsi per exempel vegnì discurrì en Germania. En Svizra hai dà l'emprim ina laudatio, suenter il gieu cunter la Serbia, e mo paucs dis pli tard è la consternaziun stada gronda suenter la terrada en l'otgavelfinal cunter il Portugal.

Critcia anc mai vesida

Mintga turnier scriva quellas istorgias magicas che restan nunemblidaivlas. Ma il campiunadi mundial en il Qatar è stà bler dapli che mo in turnier sportiv. Anc mai n'è in campiunadi mundial stà uschè en la critica sco quest onn. Dretgs umans, morts sin ils plazzals dal campiunadi mundial, in lieu senza tradiziun da ballape èn mo intgins chavazzins che mussan, tge ch'è tut vegnì crititgà.

Co èn questas quatter emnas dal campiunadi mundial uss propi stadas? RTR prenda las ultimas quatter emnas sut la marella e dat er in sguard en il futur dal Qatar e da la Fifa.