Era actualitat dera Val d'Aran en aranés. Er Institut d'Aran celebrarà aguest dissabte eth sòn 40au aniversari. En programa parlam damb era directora actuau, Pilar Lladonosa, e tanben damb es que l'an precedit en cargue coma Santiago Cester, Elisabeth Pous, Manel Serrabona, Xose Manuel Rodríguez o Carmen Roy.

Es Musèus dera Val d'Aran se higen ath Dia Internacionau des Musèus damb ua programacion especiau dedicada ara enfança, hiu conductor des activitats d'enguan. Entre es actes destacadi i a era exposicion "En casa o ena consulta. Medecina e enfança en Aran", presentada peth mètge Joan Carles Riera Socasau, que tanben impartirà ua charrada sus es mètges qu'acompanhèren a fòrça generacions d'aranesi.