euroradio.fm

Чаму сельская гаспадарка і прамысловасць у мінусе? — Еўразум за 31 ліпеня | Новости Беларуси за 31 июля by Euroradio

Цягам 6 месяцаў бягучага года ў ІТ-індустрыі Беларусі стала на 100 кампаній больш. Увогуле ж, у гэтай галіне рост назіраецца нязменна і такіх кампаній у краіне ўжо 4 тысячы. У прынцыпе, у эканоміцы Беларусі паўсюдны рост – расце інфляцыя, растуць кошты на прадукты. Чыноўнікі кажуць, што і рост заробкаў не спыняецца, але ў людзей наконт праўздзівасці лічбаў “сярэдняга заробку” ўсё ж маюцца пытаннечкі. А яшчэ расце колькасць прадпрыемстваў, якія працуюць на вайну, курс долара і колькасць мігрантаў. Вось толькі колькасць здабытай нафты ў беларускіх нетрах нешта расці адмаўляецца.

Чаму пры росце золатавалютных рэзерваў, заробкаў і агульным эканамічным росквіце Лукашэнка па-ранейшаму вымушаны прасіць у Пуціна грошай на “падтрымку штаноў”? Што стаіць за лічбамі пра рост колькасці ІТ-кампаній у Беларусі і як гэта ўплывае на бюджэт краіны? Ці ўратуюць эканоміку заводы па вырабе БПЛА для расійскай арміі? І што адбываецца на рынку валют? Гэтыя ды іншыя эканамічныя тэмы абмяркоўваем у жывым эфіры Еўрарадыё з эксперткай у сферы дзяржаўнага кіравання і міжнароднага развіцця, магістаркай эканомікі Алісай Рыжычэнка

31 ліпеня ў эфіры Еўрарадыё — музыка і фронтмэн гурта “паўтарычалавека” Андрэй Манкевіч.

Беларусы праз новыя пакуты і здзекі прыйшлі да разумення, што шукаць сілы для выжывання і захавання сябе неабходна ў сваім: сваёй гісторыі і культуры, сваіх героях і сваіх паразах, сваіх продках і сваіх традыцыях. Нават калі гэтыя традыцыі падаюцца не адпаведнымі часу. Але менавіта ў гэтых нацыянальных каштоўнасцях і ёсць наш падмурак, на якім мы здолеем выстаяць самі і пабудаваць свой новы дом, перакананы Андрэй Манкевіч.

Пра тое, чаму тое, што сёння перажывае беларуская нацыя, можна і трэба апісваць па-беларуску, што рабіць, каб вярнуць сабе сваю ідэнтычнасць і ці магчыма вярнуць сабе сваю краіну без крыві, мы і разважаем у праграме “Ідэя Х” з Андрэем Манкевічам.

Мы жывем у часы, калі самавызначэнне — гэта не толькі пра сцяг і мову, але і пра тое, як мы бачым сябе ў мінулым і будучыні. Ці можа ліцвінская ідэнтычнасць стаць альтэрнатывай традыцыйнаму разуменню “беларускасці”? Філосаф і палітолаг Пётр Рудкоўскі правёў унікальнае даследаванне ліцвінізму і распавядзе, што хаваецца за гэтым паняццем — міф, перапісаная гісторыя ці нешта большае.

Але будзем гаварыць не толькі пра мінулае. Скандалы, памылкі, маральныя зрывы — як мы на іх рэагуем як супольнасць? Як адрозніць рэальнае прызнанне памылкі ад медыйнай гульні? Што перашкаджае адрозніць справядлівае асуджэнне ад калектыўнай расправы? Ці гатовае наша грамадства не толькі асуджаць, але і даваць шанс на выпраўленне?

Лукашэнка паабяцаў вялікія прэміі тым кіраўнікам раёнаў, якія перамогуць малыя надоі і падзеж скаціны. Паралельна Беларусь становіцца галоўным імпарцёрам расійскай свініны. Што адбываецца з сельскай гаспадаркай? Чаму ўбухваннне грошай у тым ліку падаткаплацельшчыкаў у сяльгаспрадпрыемствы не дае плёну?

Пра гэта, а таксама пра завод дронаў у цэнтры Мінска, дыверсіфікацыі экспарту і апошнія дні таннага долара гутарым з эканамістам, кіраўніком праекта "Кошт Урада" Уладзімірам Кавалкіным.

Наколькі Лукашэнку хвалюе ўльтыматум Пуціну? — Еўразум за 30 ліпеня | Новости Беларуси за 30 июля by Euroradio

Хактывісцкая суполка “Кіберпартызаны” здзейсніла чарговую паспяховую публічную аперацыю — беларускія хакеры ў супрацы з украінскімі калегамі паламалі расійскі “Аэрафлот”. І пакуль адны называюць хактывістаў абаронцамі свабоды і справядлівасці, іншыя лічаць хактывізм супярэчлівым феноменам. Гэта звязана з незаконнымі метадамі, якімі карыстаюцца гэтыя групы. Каб дасягнуць сваіх палітычна-сацыяльных мэтаў, хактывісты выкарыстоўваюць DDoS-атакі, крадзеж персанальнай інфармацыі, перанакіраванне трафіка і ўзлом акаўнтаў з дапамогай вірусаў. З добрымі і светлымі мэтамі, але…

Як хактывісты становяцца часткай палітычнага супраціву і чым могуць быць карысныя грамадству ў аўтакратыях? Ці ёсць ў адміністрацыі Трампа зацікаўленасць у супрацы з дэмсіламі і вызваленні з лукашэнкаўскіх турмаў як мага большай колькасці вязняў? Ці гатовы Еўрасаюз следам за ЗША пайсці перамоўным трэкам у адносінах з Мінскам і што для гэтага могуць зрабіць дэмсілы? На гэтыя ды іншыя пытанні ў жывым эфіры Еўрарадыё адказвае кіраўніца Цэнтра новых ідэй, дактарантка Універсітэта Карлстада, паліталагіня Леся Руднік

Пра неабходнасць кантактаў з адміністрацыяй Дональда Трампа для беларускіх дэмсіл сказана ўжо шмат. Асабліва гэтая неабходнасць бачная на фоне распачатых паміж Вашынгтонам і Мінскам перамоў. Найперш з таго пункту гледжання, што ў выніку гэтых перамоў на волю з-за кратаў лукашэнкаўскіх турмаў выходзяць вязні. Прычым не толькі замежныя грамадзяне, але і палітвязні з беларускім грамадзянствам. І беларусы мараць пра тое, каб вызваленыя былі ўсе. Тым больш, што амерыканскі перамоўны трэк пакуль адзіны, які гэтых вызваленняў дамагаецца.

Ці атрымліваецца ў Офіса Ціханоўскай наладзіць кантакт з Вашынгтонам і на якім узроўні? Ці ёсць ў адміністрацыі Трампа зацікаўленасць у супрацы з дэмсіламі і ці здольны сваім візітам у ЗША гэтую цікавасць павялічыць Сяргей Ціханоўскі? Як апошнім часам змяніўся графік і праграма візітаў Святланы Ціханоўскай і калі адбудзецца яе паездка ва Украіну? На гэтыя ды іншыя пытанні ў жывым эфіры Еўрарадыё адказвае дарадца Святланы Ціханоўскай па пытаннях дыпламатыі Дзяніс Кучынскі.

Чым больш ударных беспілотнікаў выкарыстоўваецца Расіяй у атаках на Украіну (і наадварот), тым часцей здараюцца выпадкі, калі нейкія з тых беспілотнікаў з тых ці іншых прычын залятаюць на тэрыторыю Беларусі. А чым часцей яны залятаюць, тым больш верагоднасці, што яны не будуць збітыя, не ўпадуць недзе ў лесе, а ўдараць па нейкім доме. Гэта логіка вайны. І колькі ні кажы пра “мірнае неба” і ні ўсхваляй “геніальнага лідара”, які нібыта захаваў мір у краіне, вайна прыйдзе і ў твой дом. Бо гэты так званы лідар акурат і зрабіў шмат для такога развіцця падзей. Што ў выніку і адбылося 29 ліпеня ў Мінску.

Ці выпадкова дрон не проста зяляцеў у Беларусь, але і даляцеў да Мінска, акурат напярэдадні сустрэчы Лукашэнкі і Пуціна? Дрон, паводле сведчанняў СК, апынуўся нібыта ўкраінскім — верым? Чаму прапаганда пачала казаць пра неабходнасць прызвычайвацца да думкі, што “Беларусь — прыфрантавая дзяржава”, і пры чым тут завод па вырабе дронаў у Мінску і супрацьстаянне Расіі з NATO? На гэтыя ды іншыя пытанні ў жывым эфіры Еўрарадыё адказвае палітычны аналітык Валерый Карбалевіч

Збіты дрон у мінскім двары — гэта пра што? — Еўразум за 29 ліпеня | Новости Беларуси за 29 июля by Euroradio