Ils inscunters da chapellas a Safien, Furgglis, Brambrüesch, Strada ed ils segunds dis da musica populara grischuna per giuvenils a St. Antönien.

En l'emissiun dad oz dain nus in sguard sin in pèr eveniments da musica populara ch'èn sin il program las proximas emnas ed ils proxims mais. Il chalender d'inscunters da musica populara è emplenì bain. En la Val Stussavgia sunan ils 7 da fanadur las chapellas Fiin und gmüetli, Landquarter Ländlerfründa, il Jodelduett Seraina e Ladina Hug, il Ländlertrio 7.7.24, e las chapellas Scäragruas e Markant. Ils 18 d'avust è l'inscunter da chapellas a Furgglis sur Tschiertschen. Sin il palc: las chapellas grauBÜNDIG, Dreibünda, Örgeliplausch vom Spycherweg, Schesaplana, il Handorgelduett Hunger-Hunger, e las chapellas Via Mala e Bergüner Ländlerfründa.

Er en Engiadina datti musica populara, e quai ils 24 d'avust, cun furmaziuns sco: Schwyzerörgeliquartett Schlitzohrä, Chapella Jünaiver, Echo vom Kontrabassshop, Bündner Überhöckler – e si Brambrüesch è ils 25 d'avust l'eveniment «Musig für alle» cun las chapellas Oberalp, Arflina, Grünberg, Davoser Ländlerfründa e la chapella Bärgfrida.