Il stgaudar cun laina è pli actual che mai. Dad ina vart entschaiva la stagiun fraida, da l'autra survegn il stgaudar cun laina ina muntada actuala en vista a la tema da memia pauc energia e da memia pauc gas.

Ma enfin tar la stiva chauda datti bler da far. Igl è da far laina! L'autur Casper Nicca, che fa sez laina, ha perquai vulì savair dapli dal far laina ed ha fatg in viadi tar glieud che viva dal e cun il far laina. El è ì tar in interprendider da guaud, che raquinta, cura che igl è il meglier da tagliar la laina. El ha visità in fravi da guaffens che fa sigirs, in tschentapignas che ha fatg 3'000 pignas ubain simplamain glieud che fenda gugent laina ed ha fatg quai l'entira vita. Il viadi auditiv da Casper Nicca maina profund en quest mund masculin dal far laina.