Il stgaudar cun laina è pli actual che mai. Dad ina vart entschaiva bainprest puspè la stagiun fraida, da l'autra survegn il stgaudar cun laina ina muntada actuala en vista a las dumondas d'energia che vegnan ad ans fatschentar anc pli fitg en il futur.

Fin che la stiva è chauda datti bler da far. Igl è da far laina! L'autur Casper Nicca, che fa sez laina, ha perquai vulì savair dapli dal far laina ed ha fatg in viadi tar glieud che viva dal e cun il far laina. El è ì tar in interprendider da guaud che raquinta, cura ch'igl è il meglier da tagliar la laina. Ed el ha visità in fravi da guaffens che fa sigirs, in tschentapignas che ha fatg 3'000 pignas ubain simplamain glieud che fenda gugent laina e che ha fatg quai l'entira vita.

Il viadi auditiv da Casper Nicca maina profund en quest mund masculin dal far laina.

Quest'emissiun è ina repetiziun da l'october 2022.