Sign up to save your podcastsEmail addressPasswordRegisterOrContinue with GoogleAlready have an account? Log in here.
香海文化簡介 開卷,捻一頁菩提香; 悅讀,覺諸佛智慧海。 書不讀,不為我有;理不明,不為我知。 香海文化創辦人星雲大師說:「讀知一些事,讀明一點理,讀做一個人,讀懂一世情,讀通一顆心,讀悟一分緣。」做人要從讀書開始,多讀好書使人知事明理而豐足善美。 創辦人星雲大師為「香海」,定義為「香雲海會,即書香雲集,智慧如海... more
FAQs about 風吹─周蘇宗臺語詩:How many episodes does 風吹─周蘇宗臺語詩 have?The podcast currently has 53 episodes available.
September 26, 2024情批情批 曲/主唱:鄭臣皓 欲共你講的話,已經揣無言語 欲寫予你的詩,嘛想袂出來半字 挽一片雲抑是遏一蕊花送你 敢有才調表達阮的情意 用日頭光寫批,日鬚藏佇批裡 金黃色的光芒,炤出一字一字的相思 趁每一工你起床的時 送予你規房間的溫暖 用春風寫批,風激甲無意仔無意 共阮的數念 吹過你的窗仔門邊 講是無啥物代誌 偷偷仔想你 用雨水寫批,雨滴袂輸墨水 tòo甲批紙澹漉漉 簾簷跤ti-ti-ta-ta 字寫甲含含糊糊 思念嘛起起落落 用月光寫批 迷人的月娘,含情帶意 對樹葉仔的空隙 掖落來一沿一沿 寫佇塗跤兜 溫柔的情網 留言告訴我你對這一集的想法: https://open.firstory.me/user/clzkwp8750bwo01tk9ndc27fn/comments Powered by Firstory Hosting...more6minPlay
September 25, 2024阿母的新厝阿母的新厝 作曲:楚為仁 主唱:楚為仁 北海岸玫瑰園 一港溫暖的海風 親像阿母燦爛的笑容 安慰阮毋通悲傷 阿母講 遮有山有海閣有佛寺 可比是天堂 阿母講 遮有花有草嘛有寶塔 敢若是西方 阮毋敢放聲吼 恐驚傷過澹溼的目屎 會擾亂已經焦燥的所在 阮毋敢過頭想你 煩惱傷過沉重的思念 會硩歹墓園的植栽 阮嘛想欲化做千風 定定來阿母身軀邊做伴 熱人佇你四箍輾轉踅玲瑯 予你消涼 寒天罩佇你四周圍熁燒氣 予你溫暖 透早用日頭光喊你起床 暗時用月光守護你的身影 化作千風會較扭掠 三不五時做伙 早起來去( la̋i) 海邊 散步聽海看日出 黃昏來去( la̋i) 山頂 開講泡茶看紅霞 母仔囝毋是干焦一世人的親情 彼是累世萬劫的緣份 白色的山桂花發穎進前 阮會閣來看你 阮會交代in 墓草毋免修剪 按呢才知影 阮對阿母的思念 有偌深 偌長 留言告訴我你對這一集的想法: https://open.firstory.me/user/clzkwp8750bwo01tk9ndc27fn/comments Powered by Firstory Hosting...more4minPlay
September 25, 2024風吹風吹 曲/主唱:許大俠 我是風吹,你是線 愛阮飛偌遠,你就放偌長 飛對海邊,加放一尺 飛上山頂,加放一丈 無論盤山過嶺,我知影 阮攏佇咧你的手中心 數念我的時陣 擢一下 阮就轉來你的心肝頂 留言告訴我你對這一集的想法: https://open.firstory.me/user/clzkwp8750bwo01tk9ndc27fn/comments Powered by Firstory Hosting...more5minPlay
September 10, 2024《風吹》特別收錄 永遠的臺灣島:寫予竹內昭太郎先生*特別收錄 永遠的臺灣島:寫予竹內昭太郎先生 獅頭山頂,天清雲薄;七星嶺上,菅草雺霧 臺北州四界遨,大稻埕好𨑨迌 你是灣生,思念晟養你的母親 永遠的臺灣島 昭和20年5月31,戰雲對天邊鳴金擊鼓而來 幾若百隻美軍B24轟炸機, 共臺北州城掔甲頭眩目暗,炮火連天 袂輸草蜢仔大軍的戰魔,青面齴牙,兵臨城頂 予人強欲袂喘氣的戰火,𧿬踏本成萬里無雲的城市 高校拄才入學的學徒兵隨參加一場 無偌熟似的祖國愛你拍的戰爭 險險玉碎當欲奢颺的18歲的青春 欶一喙武士牌的紙薰,敢會成做正港的武士? 切腹,嘛無法度證明咱流的是仝款的血 臺灣神社火燒厝,無才調守護這个皇軍霸占的島嶼 新高山恬恬懸懸徛佇遐 總督府予炸彈磅甲去一半 生離死別,朝代轉踅,伊攏看佇目睭底 若像表參道的明治橋,迒過淡淡清幽的基隆河 臺灣神宮佇圓山仔頂懸哀聲嘆惜 花開花謝,節氣變換;無得定的戰火繼續湠 草山挖防空壕的日子,懵懂少年時淡薄仔的稀微 逐工愛唱的溫柔校歌,變調做無奈出征的戰曲 七星寮看過去的山邊紅霞,染做美軍擲落來的無情戰火 南門口恬靜堅持的城牆,陪伴你行過偌濟灣生的青春 植物園荷花池邊的蟲豸,敢猶會記得你的心聲 大世界館的電影一幕一幕咧重搬 草山眾樂園的硫磺味,小可仔𣻸𣻸又閣溫暖的記持 西門市場八角堂,早就妝娗做紅樓入夢中 崛川道路月色炤光的南國之夜 Drigo小夜曲響起的河堤草埔 敕使街道行七擺,嘛袂當坐清你的情懷 紅色的日頭已經落山 四箍輾轉陷入烏暗的眠夢 天皇無條件投降的詔文透濫冷冷的山風 吹過心酸的門口埕 投降矣!大日本帝國不敗的神話破滅矣! 玉音放送,魩仔魚食鮕鮘的大東亞戰爭煞鼓 八紘一宇的神國幻影嘛全然破碎 在地抾額的兵仔營除隊,你的靈魂嘛得著疏開引揚佮安慰 共參戰的五摠頭剃清氣,頭鬃埋入厝前的木瓜樹跤 安葬走縒的青春,嘛鉸掉不義的戰爭 這片土地本底就毋是恁的 勇敢共臺灣還予臺灣人,才是大和民族的尊嚴 古亭菜市仔邊一六軒的弓蕉牛奶糖,滋味難忘的喙食物 太平町丸公園路邊擔仔的米粉湯, 規世人攏會記得的古早味 榮町光食堂的枝仔冰,gàn喙齒閣透心涼 東門町二條通的配給米,並啥物攏較芳甜 士林的「防空壕小姐」聽講徙去水道町某番地 通學路裡相拄毋捌請問芳名的「臺北小姐」是走去佗位? 投降、除隊、疏開、引揚,你是欲轉去佗一个高天原? 臺灣敢毋是你出世徛起的所在? 新店溪,海鳥千風;紫色山茶花,文文的笑容 四分之一世紀25年的久別重逢 「南國ラジオ」的音樂又閣響起, 敢若美玲姊仔的叮嚀佮吩咐 囡仔伴姿碧小姐的日語早就生鉎, 你的臺灣話舊底就袂輾轉 歡喜寫佇鬢邊,感動刻佇眼神; 噗噗惝的心跳千言萬語斷半字 再會啦圓山仔、大稻埕;再會啦竹仔湖、舊草山 觀音山䖙踮關渡淡水河出海口遠遠的所在 就予戰爭的亡魂崁魂佇連綿的大屯山裡 無論雷公爍爁,風雨交加,烏雲密布 伊是咱的母親,上媠的島嶼 永遠的臺灣島 留言告訴我你對這一集的想法: https://open.firstory.me/user/clzkwp8750bwo01tk9ndc27fn/comments Powered by Firstory Hosting...more9minPlay
September 10, 2024《風吹》 送行─寫予蘇嫚送行─寫予蘇嫚 共你穿彼軀你上佮意的粉紅仔色的 素花仔裙 陪你起程 爸爸媽媽欲𤆬你來去換新衫 佛菩薩講這領皮衣穿傷久矣,袂合軀 愛你放下,另外揀一領 逐工,你用獨一無二的司奶喊阮起床 16个形影相隨的春夏秋冬 有咱才知影的齣頭 耍甲厝蓋強欲夯起來 媽媽欲掠戰犯,你跤手猛捷走去覕 爸爸䀐著你天真浪漫的好笑神 嘛發現你愛作孽的個性 Touch down 是你上愛耍的運動之一 你是高手天生出世,走袂贏你 一入門,你就是上𠢕迎客的禮賓司長 規工的費心操勞隨㧒佇腦後擴 頭一改褪齒,袂輸你的青春發穎 爸爸媽媽攏替你歡喜 木工壁堵有你的齒痕 若像樹仔的年輪 一痕一跡攏刻佇爸爸媽媽的心肝窟仔 欲離開阮的時 你挽掉15齒早都已經害去的蛀齒 無親像你囡仔時,這改阮干焦有傷悲 雄雄袂記得你並爸爸媽媽較老矣 嫚寶,爸爸足想你 𢯾佇胸前的溫柔佮囥佇腦海的記持 竟然,天差咧地 閣較濟的影跡,嘛毋值得你彼粒活跳跳的心 彼粒予爸爸媽媽歡喜展笑容的心 品好袂吼,目屎煞袂輸思念崩岸的海湧 轉到厝,看袂著你天真等待的好笑神 這个家無你溫暖的等候 敢若暗so-so的厝,失去光彩 姊姊講你變做天頂的「小星星」 爸爸卻是成做迷航佇宇宙的太空船 揣無降落的星球 爸爸甘願是流浪的隕石 思念失速、跋馬敗輦 化做焚身的火石 陪伴你佇恬靜寂寞的星河 嫚寶,你上𠢕變鬼變怪 敢會得親像爸爸愛聽的彼首歌 化做千風,千絲萬縷的微微仔風 按呢,爸爸媽媽就會當不管時佇窗仔門邊 鼻著你敢若杏仁的芳味 嫚寶, 你上愛看「崖上的波妞」 敢講你正經投胎轉世做古錐肥白的紅嬰仔 按呢, 等你會行會走 爸爸媽媽可能攏愛攑枴仔囉 無的確佇街仔路無張持閣看著彼个熟似燦爛 的好笑神 嫚寶, 你上愛聽Bocel l i 的歌 爸爸媽媽若是放伊的曲盤 你敢會閣𤲍 倚來做伙聽 抑是你已經幻化做美妙的音符 佮過往仝款 暝日踮爸爸媽媽的耳空邊嗤舞嗤呲 嫚寶寶, 爸爸媽媽知影你是有志氣閣 善良的囡仔 咱厝邊頭尾仝沿的𨑨迌伴只賰你一个 知影你嘛是小可仔孤單 毋免掛心爸爸媽媽 十方三世無限曠闊 由在你隨心四界行徙 爸爸媽媽深深知影 就算累世萬劫, 只要因緣的花若閣開 咱會閣做爸仔囝、母仔囝 留言告訴我你對這一集的想法: https://open.firstory.me/user/clzkwp8750bwo01tk9ndc27fn/comments Powered by Firstory Hosting...more6minPlay
September 10, 2024《風吹》─大寒 Tāi-hân 大寒大寒 Tāi-hân 大寒 曆日最後的一个節氣 總參過去一年所有的寒暑 流年親像流水 春天猶未起飛 大寒先來降落 天氣愈冷,田園愈青 氣候愈寒,霜雪嘛愈白 大寒袂寒,春分就袂溫暖 無霜凍的耐心聽候 欲哪有美麗的 春暖花開 留言告訴我你對這一集的想法: https://open.firstory.me/user/clzkwp8750bwo01tk9ndc27fn/comments Powered by Firstory Hosting...more2minPlay
September 10, 2024《風吹》─ 豆仔點豆仔點 誠濟話毋通直喉一句講到底 歇喘啉一喙仔茶 會使轉聲變好話 人生路途遙遠 有風毋通駛盡帆 停跤歇一下,看一時仔風勢 閣較大的風湧嘛會使安然過渡 予你看著千江月 有一寡工課若破柴,毋通連砧煞破落去(lueh) 你省力別人嘛快活 「逗點」毋是結束,干焦暫時歇睏 毋干焦歇睏,伊是圓滿 伊是有一撇的 烏豆仔點 留言告訴我你對這一集的想法: https://open.firstory.me/user/clzkwp8750bwo01tk9ndc27fn/comments Powered by Firstory Hosting...more2minPlay
September 10, 2024《風吹》─小寒 Siáu-hân 小寒小寒 Siáu-hân 小寒 太陽的羅經 吹上冷的風 飄上柔的雪 勻勻仔行向春天倚靠 若像落葉聲的 「悉唎悉唎,蘇嚧蘇嚧」 殊勝吉祥,大悲的甘露法水 寒星陪伴冷月 搢風冷雪的小寒 是春天進前 上堅凍的跤步 並大寒閣較寒的節氣 謙虛的名號 暗崁冷冽的氣口 雁鳥飛轉北國的故鄉 順紲紮走 拄才溫燒的日頭 留言告訴我你對這一集的想法: https://open.firstory.me/user/clzkwp8750bwo01tk9ndc27fn/comments Powered by Firstory Hosting...more2minPlay
September 10, 2024《風吹》─ 鬥片仔鬥片仔 共美麗的完整拆散 才閣一位一位走揣 一片一片接枝好勢 等甲上落尾彼个欠缺出現 號做咧欲 相倚的是天生一對 無法度鬥陣的 毋是永遠無緣 換一爿 無的確就四配 有緣做伙無緣免怨慼 佮人袂合你無毋著 嘛毋是別人的過錯 先倚來的無一定是適合的彼个 加試幾改才知影 敢通做伙 這搭袂合,換一个所在 凡勢就峇峇峇 每一片鬥片仔攏無仝款 因為按呢 毋才有法度鬥陣 家己有伴 嘛成做逐家的 圓滿 留言告訴我你對這一集的想法: https://open.firstory.me/user/clzkwp8750bwo01tk9ndc27fn/comments Powered by Firstory Hosting...more2minPlay
September 10, 2024《風吹》─冬節 Tang-tseh 冬節圓冬節 Tang-tseh 冬節圓 冬節圓挲圓圓 阿母挲的圓仔一粒一 鹹芳佇喙裡 甜蜜貼心穎 冬節圓烰甜甜 阿母挲的圓仔甜閣綿 甜甲像蜂蜜 khiū甲若麻糍 冬節圓挲媠媠 阿母挲的圓仔有色水 金的像花蕊 銀的有智慧 冬節圓咱團圓 阿母挲的圓仔上入味 思鄉數念放袂記 挲出溫暖飽滇 的團圓 留言告訴我你對這一集的想法: https://open.firstory.me/user/clzkwp8750bwo01tk9ndc27fn/comments Powered by Firstory Hosting...more2minPlay
FAQs about 風吹─周蘇宗臺語詩:How many episodes does 風吹─周蘇宗臺語詩 have?The podcast currently has 53 episodes available.