Hannes Þór Halldórsson, kvikmyndaleikstjóri og fyrrum markvörður íslenska landsliðsins í knattspyrnu var gestur Felix í Fram og til baka. Hann kom með skemmtilega fimmu sem snerist um Vanmetnustu íslensku Eurovisionframlögin að mati Hannesar. Lögin sem hann taldi til voru Angel, Nei eða já, Coming Home, Valentine Lost og Núna. Á milli laga röbbuðu þeir Felix um allt á milli himins og jarðar, uppvöxt í Breiðholti, Svíþjóð og Vesturbæ og það hvernig Hannes Þór fór að fikta við kvikmynda og þáttagerð í Versló.

Gestur Felix í Fimmunni í Fram og til baka var Bjarndís Helga Tómasdóttir, ritstjóri Tímarits Hinsegin daga og varaformaður Samtakanna 78. Hún sagði af fimm lesbíum sem hafa haft áhrif á líf hennar. Þær eru:

Ásta Kristín Benediktsdóttir - lektor í íslensku

Helga Haraldsdóttir - yfirkokkur á Mat og drykk

Vera Illugadóttir - útvarpsmaður

Margrét Pála og Lilja Sigurðardóttir - lesbískar guðmæður

Ilaria Todde - ítölsk baráttukona

Svo hringdi hann norður í Ólafsfjörð og heyrði af skemmtilegu fótboltamóti í sápubolta

Gestur Felix Bergssonar í Fram og til baka var Ásta Laufey Aðalsteinsdóttir aðstoðarskólameistari Borgarholtsskóla. Hún er mikill hlaupagarpur og útivistarkona og sagði af fimm stöðum sem hafa haft mikil áhrif á líf hennar. Staðirnir voru Vestfirðir, Fossvogsdalur, Hálendið, Bandaríkin og Esjan.

Verkalýðsforinginn Ragnar Þór Ingólfsson mætir í Fimmuna. Það eru ekki allir sem vita að Ragnar er trommuleikari. Í þættinum mun hann ekkert ræða VR eða verkalýðsbaráttu, bara um 5 uppáhalds trommarana sína.

Ásgeir Trausti mætir að þessu sinni í Fimmuna og segir frá fimm uppáhalds borgum sínum.

Hulda Geirsdóttir leysti Felix Bergsson af í Fram og til baka í þetta skiptið. Gestur hennar í fimmunni var Guðrún Hulda Pálsdóttir ritstjóri Bændablaðsins og kontrabassaleikari sem ræddi ýmis konar rækt; hrossarækt, matvælarækt, málrækt, sjálfsrækt og tengslarækt. Þá lék Hulda létta tóna og skoðaði aðeins sögu Jónsmessunar í kjölfar nýliðinnar Jónsmessunætur.

Gestur á þjóðhátíðardeginum í Fram og til baka á Rás 2 var enginn annar en Ólafur Þ Harðarson stjórnmálafræðingur. Ólafur talaði um fimm skóla sem höfðu haft djúp áhrif á líf hans en þetta voru Barnaskóli Hafnarfjarðar, Flensborgarskóli, Kennaraskólinn, Háskóli Íslands stjórnmálafræðideild og London School of Economics and Political Science. Ólafur lék líka tónlist af geisladiskum með Tom Lehrer og Spöðum.

Felix heimsótti listakonuna og galleríeigandann Guðnýju Þóru Guðmundsdóttur í Berlín og skoðaði galleríið hennar sem heitir einfaldlega Gallery Guðmundsdóttir. Svo settust þau niður og Guðný sagði af fimm listviðburðum sem hafa haft djúp áhrif á líf hennar

gestur dagsins í fimmunni tengdist auðvitað sjósókn í tilefni af sjómannadeginum sem stendur fyrir dyrum. Það var Jón Frímann Eiríksson stýrimaður og skipstjóri sem settist hjá Felix og talaði um fimm skip sem hafa haft áhrif á líf hans. Listinn var svona: Sturlaugur H Böðvarsson AK10, Rán HF, Heiðrún SH, Hringur SH og Akurey AK10. Jón Frímann talaði um breytingar á vinnulagi á skipum frá því að hann hóf störf átján ára gamall og deildi ýmsum skemmtilegum sögum af uppákomum um borð.

Í síðari hluta þáttarins kom Karl Ágúst Ipsen og talaði um heilsuvandræði Celine Dion og svo fengum við nýjar fréttir af Dolly Parton

Gestur Felix í Fimmunni er Ásdís María Viðarsdóttir tónlistarmaður sem hefur slegið í gegn í Þýskalandi að undanförnu með kraftmikilli popptónlist. Ásdís talar um fimm áhrifavalda í tónlistinni og þar kennir margra grasa. Svo heyrum við af framtíðinni og nýja laginu sem mun koma út í júní

Þátturinn er sendur frá Berlín