Felix sendi okkur Fram og til baka að þessu sinni frá Berlín. Hann lét tónlistina ráða för og hún teymdi okkur í ýmsar áttir, allt frá Herstöðvaandstæðingum til Bítlanna og skoðunarferðar um Liverpool.

Þá var fjallað um það helsta sem gerðist á þessum degi, 20. maí.

Það var Gunnlaugur Jónsson sem var gestur Felix í Fram og til baka. Hann talaði um fimm fjölmiðlaverkefni sem hann hefur komið að í gegnum tíðina en tilefnið eru nýir þættir í seríunni Árið er sem verða á Rás 2 í tilefni af 40 ára afmæli rásarinnar. Að auki ætlar Gulli að taka stóra stökkið og reyna sig við að vinna sem fjölmiðlamaður í fullri vinnu.

Felix spilaði svo popptónlist frá Liverpool en hann er staddur þar vegna Eurovision 2023

Sonja Ýr Þorbergsdóttir hefur vakið athygli fyrir skörulega framgöngu sem formaður BSRB og hún var gestur Felix í fimmunni í Fram og til baka. Fimm verkföll eða vinnudeilur urðu þemað og Sonja fór um víðan völl í skemmtilegu spjalli um réttindi af öllum toga og lífið og tilveruna.

Í síðari hluta þáttarins töluðu Inga Rós Vatnsdal og Karl Ágúst Ipsen um Eurovision keppnina í Liverpool sem fer fram í byrjun maí

Birgir Steinn Stefánsson hefur vakið mikla athygli sem tónlistarmaður frá því að hann fór að senda frá sér tónlist fyrir nokkrum árum og hefur gríðarlega hlustun á Spotify. Birgir er sonur Önnu Bjarkar Birgisdóttur og Stefáns Hilmarssonar þannig að hann á ekki langt að sækja hæfileikana. Hann kom í ljúft spjall í Fram og til baka og sagði af fimm áhrifavöldum í lífi sínu.

Í síðari hluta þáttarins fjölluðum við um söngleikinn Eitthvað rotið (Something Rotten) sem söngleikjadeild Söngskóla Sigurðar Dementz setur upp í Gaflaraleikhúsinu. Einn leikaranna, Sigríður Ósk Hrafnkelsdóttir eða Sigga Ózk, kom í morgunkaffi daginn eftir frumsýningu!

Bjarni Snæbjörnsson hefur vakið mikla athygli fyrir leikverk sitt Góðan daginn faggi sem hann hefur leikið yfir 100 sinnum á síðustu tveimur árum, bæði í Þjóðleikhúsinu og út um allt land. Bjarni kom í fimmuna og sagði okkur af fimm bókum sem hafa haft djúp áhrif á líf hans og hjálpuðu til dæmis við skrifin á leikverkinu. Bækurnar eru:

The Velvet Rage - Alan Downs

Daring Greatly - Brene Brown

Untamed - Glenon Boyle

Big Magic - Elisabeth Gilbert

Human Kind - Rutger Brekman

Og við héldum áfram að ræða bækur því framkvæmdastjóri Bókmenntahátíðar í Reykjavík, Stella Soffía Jóhannesdóttir, mætti í spjall og talaði um hápunkta hátíðarinnar sem hefst á síðasta vetrardag. Nánari upplýsingar má finna bokmenntahatid.is

Felix verður í Berlín í þessum páskaþætti af Fram og til baka. Hann spilar tónlist sem tengist borginni og segir sögur af listamönnum sem þar hafa gengið um götur. Í seinni hlutanum skoðar hann það sem gerðist á deginum og þar koma við sögu meðal annarra Clash, NIrvana og Twin Peaks. Svo hitar hann upp fyrir Alla leið þátt kvöldsins í sjónvarpinu

gestur Felix í fimmunni í Fram og til baka var Þórarinn Eyfjörð, formaður Sameykis stéttarfélags í almannaþjónustu. Þórarinn hefur komið víða við á ferli sínum og sagði af ýmsum ævintýrum lífsins í gegnum fimm veiðistaði. Þar hóf hann leik á bryggjunni í Keflavík og endaði með vinahópi í Vatnsdalsá.

Svo hringdi Felix til Helsinki og heyrði í Reyni Þór Eggertssyni. Vorið er á leiðinni þó það sé enn snjór á jörðu og kalt í veðri. En sólin skín og Finnar eru bjartsýnir um gott gengi í Eurovision

Erna Hrönn söngkona, táknmálsfræðingur og fjölmiðlakona var gestur Felix í fimmunni í Fram og til baka. Hún sagði okkur af mikilvægustu já-unum í lífinu sem voru allt frá því að fá að komast í söngnám níu ára og yfir í jáið sem hún fékk frá Virk árið 2019, þá algjörlega búin á sál og líkama.

Síðan kom menntaskólaneminn Heimir Árni Erlendsson úr Landeyjunum en hann sló í gegn í Gettu betur með liði FSu. Heimir Árni er líka mikill Eurovision aðdáandi og sagði okkur af uppáhaldslögunum sínum í keppninni í ár

Gestur Felix þennan ljúfa laugardag er Gísli Einarsson fjölmiðlamaður, sögumaður og uppistandari. Gísli segir okkur af mismunandi hnjaski sem hann hefur orðið fyrir í gegnum tíðina en hefur alltaf leitt til jákvæðrar niðurstöðu. Gísli er þessa dagana að leika uppistandið sitt Ferðabók Gísla Einarssonar (en hvorki Eggerts né Bjarna) í Landnámssetrinu í Borgarnesi

Gestur Felix Bergssonar í fimmunni í Fram og til baka er María Reyndal leikstjóri og handritshöfundur. Hún segir hlustendum af fimm skólum sem börnin hennar Hrafnhildur og Jörundur gengu í á ferðum fjölskyldunnar um heiminn. Skólarnir eru á Nýja Sjálandi, í Kanada, Bandaríkjunum, Portúgal og Íslandi.

Í síðari hluta þáttarins koma þær Díana Júlíusdóttir og Ósk Ebenesardóttir og segja af sýningu félags áhugaljósmyndara í Borgarbókasafninu í Spönginni