Í fréttum er þetta helst

„Ok flott þá gerum við þetta“ - Þorsteinn Már og týndu skilaboðin til Namibíu

Allt að helmingur barna sem eru á leikskólum í borginni hefur verið fjarverandi síðustu vikur vegna veikinda. Leikskólastjóri segist ekki muna eftir öðru eins á rúmlega þrjátíu ára starfsferli.

Síðasti tvöfaldi kaflinn milli Hafnarfjarðar og Reykjanesbæjar vígður

Landsréttur þyngdi í dag dóm yfir þeim Amir Ben Abdallah og Mohamed Ali Chagra fyrir nauðgun. Þeir voru báðir dæmdir í þriggja ára fangelsi en höfðu áður hlotið tveggja og hálfs árs dóm í Héraðsdómi Reykjavíkur.

Formaður Tilveru segir erfiðar tilfinningar vakna þegar börn sem getin eru með gjafarsæði gætu átt hundruð blóðskyldra einstaklinga. Heilbrigðisráðherra segir þetta vera sláandi dæmi, meira eftirlit þurfi og frumvarp verði á næsta þingi.

Varaformaður Miðflokksins segir að hagsmunum Íslands sé betur borgið utan EES verði ekki hægt að setja bremsu á fjölgun útlendinga hér á landi. Dómsmálaráðherra segir það árás gegn íslensku efnahagslífi.

Fjármála- og efnahagsráðherra telur að breyting á kílómetragjaldi ætti ekki að hafa bein áhrif á ferðaþjónustuna eða rekstur bifreiða. Forstjóri Bílaleigu Akureyrar segir breytinguna auka gjöld á bílaleigur um 7,5 milljarða.

Takk fyrir í dag, sjáumst á morgun.

Í fréttum er þetta helst

Fjögur börn voru getin hér á landi með sæði dansks manns. Sjaldgæf og hættuleg genastökkbreyting fannst í erfðaefni hans sem getur valdið krabbameini. Ekki er vitað hvort þau beri stökkbreytinguna. Þetta kemur fram í umfjöllun Ríkisútvarpsins.

RÚV tekur ekki þátt í Eurovision árið 2026. Þetta kemur fram í fréttatilkynningu sem send var út eftir fund stjórnar RÚV í dag.

Hæstiréttur hefur sýknað Arion banka af öllum kröfum neytenda í máli sem sneri að skilmálum í lánasamningi um verðtryggt lán með breytilegum vöxtum. Um eitt vaxtamálanna svokölluðu var að ræða og Arion banki taldi 4,5 milljarða króna vera undir.

Karlmaður um þrítugt hefur verið úrskurðaður í vikulangt gæsluvarðhald á grundvelli rannsóknarhagsmuna vegna rannsóknar lögreglu á mannsláti í heimahúsi á Kársnesi í Kópavogi í síðustu viku.

Kvikusöfnun undir Svartsengi er svipuð og hefur verið síðustu vikur. Því eru áfram auknar líkur á kvikuhlaupi og eldgosi. Þetta segir í tilkynningu Veðurstofunnar.

Ekki króna fékkst upp í 2,6 milljarða króna gjaldþrot ítalska verktakafyrirtækisins Rizzani de Eccher Ísland ehf. sem kalla mætti martröð Kópavogsbæjar eftir deilur við byggingu Barnaskóla Kársness. Undirverktakar sitja eftir með sárt ennið og ógreidda reikninga. Kópavogsbær undirbýr skaðabótamál á hendur móðurfyrirtækinu.

Gular veðurviðvaranir taka gildi klukkan sex í fyrramálið fyrir Suður- og Suðausturland vegna austan- og norðaustanstorms með hvössum hviðum sem slegið geta í 35 metra á sekúndu.

Takk fyrir í dag, sjáumst á morgun.

Í fréttum er þetta helst

Sæðisgjafi með lífshættulegan genagalla gat 197 börn - sæðið meðal annars selt til Íslands

Umræða um frumvarp til laga um kílómetragjald á ökutæki stóð yfir í um níu klukkustundir. Enn voru sautján eftir á mælendaskrá þegar málinu var frestað rétt fyrir miðnætti.

Innviðaráðherra hyggst festa Reykjavíkurflugvöll í sessi og byggja nýja flugstöð. Forsætisráðherra segir ekki hægt að láta flugvöllinn grotna niður meðan ekki finnist aðrir kostir. Forstjóri Icelandair segir að ekki muni standa á félaginu að fara í samstarf við stjórnvöld um uppbyggingu.

Þórunn Sveinbjarnardóttir, forseti Alþingis, baðst afsökunar á þingfundi í morgun fyrir að láta óviðurkvæmileg orð falla um stjórnarandstöðuna á föstudag.

Óvenjumörg alvarleg umferðarslys hafa orðið síðustu vikur sem aðalvarðstjóri umferðardeildar lögreglunnar á höfuðborgarsvæðinu segir miður. Aukið stress skili sér í glæfralegum akstri og allt of lítið sé um að gangandi vegfarendur noti endurskinsmerki.

Dagmar Ýr Stefánsdóttir, sveitarstjóri Múlaþings, segir nýja samgönguáætlun ríkisstjórnarinnar mikil vonbrigði fyrir sveitarfélagið og Austurland allt.

Íslenska hugbúnaðarfyrirtækið LS Retail hefur verið yfirtekið af framtakssjóði í rekstri norræna fjárfestingafélagsins Axcel. Þetta er fyrsta fjárfesting Axcel hér á landi en seljendur eru bandarískt félag sem keypti LS Retail fyrir fáeinum árum.

Takk fyrir í dag, sjáumst á morgun.

Í fréttum er þetta helst

Hluthafar Íslandsbanka, sem eiga meira en fimm prósent hlutafjár í bankanum, hafa krafist þess að boðað verði til stjórnarkjörs. Krafan barst sama dag og stjórnarformaðurinn tilkynnti að hún myndi ekki sækjast eftir endurkjöri.

Breikkun Suðurlandsvegar meðfram Rauðavatni og Norðlingaholti frestast fram á næsta áratug, sem og breikkun Reykjanesbrautar milli Njarðvíkur og Leifsstöðvar. Endurbætur á Reykjanesbraut um Hafnarfjörð bíða og einnig gerð mislægra gatnamót við Bústaðaveg.

Ópíóða- og kókaínfíkn er að aukast og reglulega kemur fólk sem reykir kókaín sem er enn hættulegra að sögn formanns Matthildarsamtakanna. Hún telur núverandi stefnu stjórnvalda í málaflokknum hafa gengið sér til húðar því þrátt fyrir met í haldlagningu vímuefna séu vísbendingar um að bæði framboð og eftirspurn hafi aukist á árinu.

Tæplega tvö hundruð þúsund vottorð voru gefin út af Landspítalanum og heilsugæslum á höfuðborgarsvæðinu árið 2023, en þau voru mun fleiri á landsvísu. Heilbrigðisráðherra vill skoða hvernig fækka megi útgáfum vottorða og tilvísana til að draga úr skriffinnsku.

Háskólinn á Akureyri og lögregluskólinn í Reykjavík eru með til skoðunar nafnlausar ábendingar kvenkyns nemenda á hendur hóp nokkurra lögreglunema um að þeir hafi stundað það að deila myndum af bekkjarsystrum sínum á samfélagsmiðlinum Snapchat.

Lögmaður sem er laus úr rúmlega tveggja vikna einangrun í gæsluvarðhaldi telur lögreglu herja á sig til að kortleggja betur albanska glæpahópa hér á landi. Hann segist اندlega í molum eftir dvölina í fangelsinu á Hólmsheiði þar sem hann þó kynntist besta fólki í heimi, fangavörðunum.

Dómsmálaráðherra hefur birt áform um lagasetningu vegna sveitarstjórnarkosninga í Grindavík í vor. Áformað er að fara þá leið að þeir sem áttu lögheimili í Grindavíkurbæ 9. nóvember 2023 hafi val um að kjósa í Grindavík eða því sveitarfélagi sem þeir eiga nú lögheimili í.

Takk fyrir í dag, sjáumst á morgun.

Í fréttum er þetta helst

Krefjast þess að samgönguáætlun verði endurskoðuð

Kennslustjóri sérnáms segir hættu á að skortur verði á læknum í ákveðnum sérgreinum bregðist stjórnvöld ekki við breyttum reglum í Svíþjóð og Noregi.

Í síðustu viku höfðu 369 leitarbeiðnir borist lögreglu vegna týndra barna.

Ekið var á hjólreiðamann á Sauðárkróki seinnipartinn í gær nálægt gatnamótum Skagfirðingabrautar og Sauðárkróksbrautar. Um alvarlegt slys var að ræða.

Varað er við því í nýrri þjóðaröryggisstefnu Bandaríkjanna að Evrópa standi frammi fyrir útrýmingu siðmenningar.

Seðlabankastjóri býst við að verðbólga verði komin mjög nálægt markmiði tveggja komma fimm prósenta markmiði bankans á næsta ári.

Hinn 26 ára gamli Lando Norris, ökumaður McLaren, er heimsmeistari ökumanna í Formúlu 1 árið 2025 og í fyrsta skipti á sínum ferli.

Takk fyrir í dag, sjáumst á morgun.

Í fréttum er þetta helst

Formaður Skólameistarafélags Íslands segir vendingar síðustu daga hafa fengið skólameistara víðs vegar um landið til að íhuga stöðu sína. Félagið á fund með mennta- og barnamálaráðherra og krefst formaðurinn skýringa á boðuðum breytingum sem voru rökstuðningur ráðherrans fyrir því að auglýsa tvö embætti skólameistara laus til umsóknar.

Þórunn Sveinbjarnardóttir, forseti Alþingis, biðst afsökunar á ummælum sínum á Alþingi í gær þar sem hún kallaði stjórnarandstöðuna „andskotans pakk“. Hún kveðst vera mannleg eins og annað fólk.

Karlmaður um þrítugt var handtekinn fyrr í vikunni í tengslum við rannsókn Lögreglunnar á höfuðborgarsvæðinu á mannsláti í Kópavogi um síðustu helgi.

Ný þjóðaröryggisstefna Bandaríkjanna undirstrikar heimssýn Donald Trump um að setja Bandaríkin í fyrsta sæti. Í henni ætla stjórnvöld að endurvekja yfirráð sín á vesturhveli jarðar, byggja upp hernaðarmátt í Indlands- og Kyrrahafi og hugsanlega endurmeta samband sitt við Evrópu. Evrópskir bandamenn eru harðlega gagnrýndir í stefnunni, sem var birt aðfaranótt föstudags.

1,1 milljarði verður veitt í uppbyggingu á neyðarvistun Stuðla og eins milljarðs tímabundin fjárveiting verður veitt til stofnanna sem vinna gegn fíknivanda, samkvæmt breytingartillögum meirihlutans á fjárlögum næsta árs.

Sumir greinendur hafa hækkað nokkuð verðmöt sín á stóru sjávarútvegsfélögin í Kauphöllinni eftir að veiðigjöld næsta árs voru í birt í gær. Útlit er fyrir að aukning gjaldanna á næsta ári verði „töluvert minni“ en áður var ráðgert.

Rússar nota á annað þúsund misgamalla og lúinna fraktskipa undir ýmsum hentifánum til að koma olíu og öðrum varningi framhjá viðskipta- og hafnbanni Vesturvelda. Skipin eru illa eða ekki tryggð, bila oft - og eru orðin skotmörk úkraínska hersins.

Takk fyrir í dag, sjáumst á morgun.

Í fréttum er þetta helst

Í fréttum er þetta helst\nSkipulögð glæpastarfsemi hefur aldrei verið eins umfangsmikil hér á landi og er nú svipuð og á öðrum Norðurlöndum að sögn stjórnanda hjá ríkislögreglustjóra. Gríðarlegt magn fíkniefna flæði til landsins samfara þróuninni. Það komi því ekki á óvart að hvert metið á fætur öðru hafi verið slegið í haldlagningu fíkniefna.\nSvo virðist sem fokið hafi í Þórunni Sveinbjarnardóttur, forseta Alþingis, á þingfundi í dag. Þingmenn stjórnarandstöðunnar stigu í stríðum straumi í ræðustól til þess að gagnrýna Eyjólf Ármannsson innviðaráðherra og samgönguáætlun hans, undir liðnum fundarstjórn forseta. „Ég er komin með nóg. Djöfulsins, helvítis, andskotans pakk,“ heyrðist Þórunn segja eftir að hafa gert tíu mínútna hlé á þingfundi.\nÍbúar í Laugardal í Reykjavík stefna á að setja upp umferðarljós við gatnamót Kirkjuteigs og Reykjavegar þar sem keyrt hefur verið á þrjú börn í haust. Fyrst eitt barn á hjóli í september og svo tvö börn, annað á hjóli, í október. Laugarnesskóli er rétt fyrir ofan gatnamótin og börnin labba þarna yfir götuna til að komast í til dæmis skólasund og tómstundir eða á leið sinni heim.\nÞingmenn stjórnarandstöðu segja allar forsendur samgönguáætlunar brostnar þar sem innviðaráðherra las ekki skýrslu sem var birt til stuðnings breyttri forgangsröðun. Höfundur skýrslunnar segir hana ekki hygla Fjarðagöngum frekar en Fjarðarheiðargöngum en innviðaráðherra segist ekki vísa í umrædda skýrslu.\nÍbúar í Ölfusi eru langþreyttir á mengun í Varmá sem kemur frá nágrönnum þeirra í Hveragerði. Skólplykt leggur yfir íbúðahverfi í Ölfusi og fiskar hafa drepist í ánni vegna klórs frá sundlauginni í Laugaskarði. Bæjaryfirvöld tilkynntu ekki um klórslys sem varð í vor fyrr en daginn eftir að það átti sér stað.\nVeiðigjöld fyrir árið 2026 hafa verið birt en þau eru þau fyrstu frá breytingu á útreikningi veiðigjalda. Veiðigjöld á þorski fara til að mynda úr 26,68 krónum á kíló af óslægðum afla upp í 50,79 krónur. Það gerir hækkun upp á 90,4 prósent. Gert er ráð fyrir að tekjur ríkisins af veiðigjaldi næsta árs verði um fimmtán milljarðar.\nStjórn Ríkisútvarpsins liggur nú undir feldi vegna þátttöku Íslands í Eurovision eftir að ákveðið var í gær að leyfa Ísraelum að taka þátt. Fjögur lönd hafa þegar tilkynnt að þau muni draga sig úr keppni. Páll Óskar Hjálmtýsson skorar á stjórnina að segja Ísland úr keppni.\nTakk fyrir í dag, sjáumst á morgun. .

Í fréttum er þetta helst

Máli Alberts Guðmundssonar, landsliðsmanns í knattspyrnu, verður ekki áfrýjað. Þetta staðfestir verjandi hans, Vilhjálmur H. Vilhjálmsson.

Skólameistari Borgarholtsskóla ætlar ekki að hætta þegjandi og hljóðalaust eftir að menntamálaráðherra framlengdi ekki skipunartíma hans. Hann telur alræmt símtal formanns Flokks fólksins hafa átt sinn þátt í atburðarásinnni. Skólameistarar eru furðu lostnir - Formaður Skólameistarafélagsins furðar sig á yfirlýsingu aðstoðarmanns ráðherra í fréttum RÚV í gær.

Áfallateymi Austurlands hefur verið virkjað fyrir Seyðisfjörð vegna banaslyss á Fjarðarheiði í gær. Bænastund verður haldin í Seyðisfjarðarkirkju klukkan 18:00 á morgun. Þorgeir Arason, sóknarprestur í Egilsstaðaprestakalli, segir áföll hafa dunið á Seyðfirðingum undanfarin misseri.

Eyjólfur Ármannsson innviðaráðherra viðurkennir að hann hafi ekki lesið skýrslu Rannsóknamiðstöðvar Háskólans á Akureyri um jarðgangakosti á Austurlandi, sem hann vísaði til í kynningu nýrrar samgönguáætlunar í gær.

Öll loðdýrabú á Suðurlandi eru nú að hætta starfsemi þar sem ekki er lengur rekstrargrundvöllur fyrir búunum. Unnið er að því að slátra öllum eldisdýrum af búunum, þau eru um 30 þúsund. Frá þessu er greint í nýjasta tölublaði Bændablaðsins.

Færeyska lögþingið samþykkti í dag, með eins atkvæðis mun, að veita konum þungunarrof frítt út 12. viku meðgöngu. Lögin taka gildi 1. júlí, en það er til að gefa heilbrigðisstofnunum svigrúm til að gera ráðstafanir vegna þessa.

Vladímír Tsjírkín, fyrrverandi yfirmaður landhers rússneska hersins, gagnrýndi framkvæmd innrásarinnar í Úkraínu á upphafsdögum hennar í viðtali við rússneska fréttamiðilinn RBC þann 27. nóvember. Hann sagði að þegar innrásin hófst hafi Rússland „enn og aftur“ ekki verið nægilega vel undirbúið fyrir stríð.

Takk fyrir í dag, sjáumst á morgun.

Í fréttum er þetta helst

Miðflokkurinn heldur áfram að sækja í sig veðrið í skoðanakönnunum og mælist nú með nærri 20 prósenta fylgi. Samanlagt fylgi stjórnarflokkanna er komið undir 50 prósent.

Frá árinu 2010 hefur fjöldi erlendra ríkisborgara á endurhæfingarlífeyri meira en 21 faldast, úr 68 manns í 1.464 manns.

Fjármálaráðherra segir markmiðið að ýta undir skipulag á fjölda lóða sem ríkið er eigandi að á höfuðborgarsvæðinu á komandi misserum. Í síðustu viku gerði ríkið samkomulag við Garðabæ um uppbyggingu á Vífilsstaðasvæðinu en Daði Már Kristófersson fjármálaráðherra segir fjölda annarra sveitarfélaga í viðræðum við ríkið um nokkra reiti til viðbótar.

Nanna Margrét Gunnlaugsdóttir, þingmaður Miðflokks og varaformaður efnahags- og viðskiptanefndar Alþingis, segir ýmislegt athugavert við framkvæmd fyrirhugaðra breytinga á lögum um erfðafjárskatt.

Innanlandsflugi hefur víða verið aflýst á landinu í dag vegna veðurs. Það var þó einni vél flogið austur á Egilsstaði, Boeing 757-flugvél sem er talsvert stærri en þær vélar sem alla jafna leggja leið sína þangað.

21% þeirra sem sinna uppeldi og menntun barna í leikskólum landsins er fyrstu kynslóðar innflytjendur.

Kristrún Frostadóttir forsætisráðherra viðraði í dag þá hugmynd að gera fullveldisdag Íslendinga, 1. desember, að rauðum degi.

Takk fyrir í dag, sjáumst á morgun.

Í fréttum er þetta helst

Stjórn Verkalýðsfélags Vestfirðinga segir alvarlegt ástand blasa við smærri sjávarbyggðum á Vestfjörðum verði afnám línuílvunnunar og skerðingar á byggðakvóta að veruleika. Ástandið er fyrirhugað að afnám línuílvunar, rækjubóta og skerðinga á byggðakvóta, sem gæti haft áhrif á 176 störf.

Á annan tug barna sem dvelja hér á landi á grundvelli fjölskyldusameiningar eru í forsjá stjórnvalda eftir að í ljós hefur komið að börnin hafa engin blóðtengsl við þá einstaklinga sem þau eru að sameinast. Börnin eru frá því að vera á leikskólaaldri og upp í menntaskólaaldur.

Norðurál hefur tilkynnt Orkuveitunni um greiðslufall vegna endurtekinna bilana í álveri þess á Grundartanga. Orkuveitan gerir ráð fyrir lægri rekstrarhagnaði í ár vegna þessa og að arðgreiðslur lækki um tvo milljarða króna á næsta ári. Forstjóri Orkuveitunnar gagnrýnir aðgerðir Norðuráls og segir fyrirtækinu bera að greiða fyrir alla umsama orku óháð því hvort hún sé nýtt.

Kristján Guðmundsson myndlistarmaður er látinn, 84 ára að aldri. Hann var sjálflærður myndlistarmaður og einn stofnenda Gallerís SÚM. Hópurinn að baki SÚM olli straumhvörfum í íslenskri myndlistarsenu á sjöunda áratugnum.

Á Kölfunum í Gufunesi í Reykjavík segjast íbúar upplifa sig sem strandaglópa innan eigin hverfis þar sem bílastæði eru af skornum skammti og engar almenningssamgöngur í boði. Mikil gremja er meðal íbúa eftir að hafa verið sektaðir fyrir að leggja ólöglega.

Takk fyrir í dag, sjáumst á morgun.