Esta vez si, o tempo non o impediu e a Coordinadora 'Eólica Así Non' volveu saír á rúa en protesta polo que considera un modelo de expolio enerxético por parte da Xunta. Ía facelo o pasado 26 de xaneiro, Día Mundial da Enerxía Limpa, pero daquela o temporal aconselleu suspendelo. Hoxe si... puideron levar a súa mensaxe a nove localidades galegas.

E domingo tamén de resaca dos Goya... Dos candidatos galegos, só os vigueses Lorena Ares e Carlos Fernández conseguiron o galardón. Neste caso á mellor curta de animación por "Cafunè".

No tempo da entrevista, falamos dos fogares que acollen temporalmente a rapaces, e da necesidade de priorizar este modelo fronte á estancia en centros de menores.

Manuel Gutiérrez da Silva conversa con Carmen Dourado, directora de Acougo, Asociación Galega de Familias de Acollida

Finalmente foron 486 quilos de cocaína incautados no último golpe contra o narcotráfico. Case media tonelada de droga localizada na costa asturiana nun dispositivo no que dous dos cinco detidos son galegos. Un deles quedou en liberdade tras pasar esta mañá a disposición xudicial en Ribeira. O outro acolleuse ó seu dereito a non declarar en Asturias. O fiscal pediu prisión provisional, comunicada e sen fianza.

Por outra banda, sábado de citas políticas, neste caso en torno á ciencia, o idioma, a Sanidade e a vivenda

Acadar unha estrela michelín é, posiblemente, o soño de moitos cociñeiros. Acadar dúas xa é unha fantasía que poucos logran cumprir. A día de hoxe hai 33 restaurantes en España con ese recoñecemento, só tres en Galicia.

Un deles é o Retiro da Costiña, en Santa Comba, un concello do interior da provincia da Coruña, duns 10.000 habitantes... e onde o cociñeiro Manuel Costiña rexenta este tesouro gastronómico que vai camiño dos 90 anos de vida.

Neste tempo de entrevista, achégamonos aos fogóns do restaurante pra conversar co chef da man da nosa compañeira ROSALÍA MARTÍNEZ

A Policía Nacional e a Garda Civil detiveron dous homes de Ribeira relacionados co alixo de 400 quilos de cocaína incautado na costa de Asturias. A droga apareceu flotando no mar tras o afundimento dunha narcolancha na madrugada do mércores.

O Tribunal Superior de Xustiza de Galicia ratificou a condena de 22 anos de prisión para José Eirín polo asasinato de Jessica Méndez en Barro, Pontevedra, en marzo de 2022.

O acusado chocara de forma intencionada contra o coche da vítima cando esta estaba detida nun cruzamento na N-550, causándolle a morte

Rexeitamento frontal da patronal das Vivendas de Uso Turístico, AVITURGA, á ordenanza que aprobou onte o pleno do Concello da Coruña. Xa anuncian que presentarán alegacións agora que pasa a exposición pública.

Desde Aviturga denuncian que só vai beneficiar aos grandes grupos empresariais capaces de adqurir edificios enteiros para destinalos a uso turístico e que tamén pretende contentar aos establecementos hoteleiros da cidade.

Cren, que como xa sucedeu noutras cidades, acabará por ser declarado ilegal. Dulcinea Aguín, presidenta de Aviturga

Máis pasos contra as vivendas de alugueiro turístico en Galicia. Un fenómeno que segundo inquilinos e algunhas forzas políticas está a agrava-los problemas de acceso á vivenda residencial. A patronal adianta alegacións contra o proxecto aprobado pola Coruña que aspira a reducilas á metade e expulsalas do casco vello e zonas protexidas salvo en edificios íntegramente destinados a esta fin. Dinque só beneficiará ós hosteleiros e grandes propietarios. Mentres, o sindicato de inquilinos pide firmeza, e mira con esperanza ó novo PXOM de Vigo, que tamén regulará estas vivendas... A cidade olívica ten 4 de cada 10 VUTS das cidades galegas

- Incautados 142 quilos de tabaco de contrabando nunha operación realizada en Pontevedra.

Ademais permitiu localizar maquinaria e productos necesarios para o establecemento dunha fábrica clandestina en Pontevedra.

- Os sindicatos policiais consideran insuficientes as novas prazas destinadas polo Goberno a Galicia.

Están previsto cubrir 114 prazas, pero o Sindicato Unificado da Policía cre que son necesarias 200.

- O BNG propón un Sergas dos coidados.

Os nacionalistas avogan por deseñar todo un sistema garantista en torno á atención á dependendencia e ós servizos sociais.

- O PSdeG presentará medio cento de enmendas ó proxecto de lei que regulará a intelixencia artificial.

Entre outras eivas sinala que non ten en conta os dereitos de autor nin inclúe medidas concretas que incentiven o uso do galego.

- O tempo. Predominan as nubes, aínda que se van ir abrindo claros, e temperaturas máis baixas

A oposición tumba os orzamentos do goberno socialista pra o 2025...e Inés Rey someteráse a unha cuestión de confianza o próximo martes.

No pleno aprobouse ademáis a ordenanza que eliminará máis de 600 pisos turísticos.

- Os traballadores dos servizos sanitarios coruñeses concentráronse este xoves nos hospitais contra as agresións nos seus centros de traballo. Hoxe a concentración será nos centros de saúde da Costa da Morte.

- Un informe do Defensor do Pobo advirte da vulneración dos dereitos máis básicos nos pacientes do sanatorio psiquiátrico da Robleda, no concello do Pino.

-Preocupación na ría de Muros-Noia pola situación dos bancos marisqueiros. Os fortes temporais cos que se pechou xaneiro volveron causar importantes taxas de mortandade nos bivalvos