E tuttina datti els. Er en Svizra, era en il Grischun ed er en la Rumantschia. Ils toxicomans e las dependentas da drogas. Savens han els ed ellas destins a l'ur da nossa societad e quels èn perquai in tema da tabu, insatge ch'ì «na dat betg tar nus.»

L'istorgia da Gian Reto è in exempel da blers. En la Marella raquinta Gian Reto Blumenthal da sia istorgia cun las drogas. El raquinta co ch'el ha vivì ses onns en la dependenza e co ch'el emprova da sortir da quella. El raquinta da sias experientschas, sias regurdientschas e da ses puncts ils pli auts sco era ils pli bass. Ed el raquinta da ses cumbat, in che cuntinuescha ed accumpogna el per vita duranta.

Ina repetiziun dal favrer da quest onn. Durant la stad preschenta la Marella er quest onn inqual perla radiofonica or da noss archiv.