«Young, gifted and black» - in inscunter cun Nina Simone (1933 – 2003).

Sch'i fiss ì tenor ses plan, chattass ins ozendi il num Eunice Waymon en las enciclopedias da musica: ella vuleva numnadamain daventar «l'emprima pianista classica naira dals Stadis Unids da l'America». Ma ella n'è betg vegnida acceptada al conservatori (tenor ella exact pervia da sia colur da pel). Uschia ha Eunice Waymon cumenzà a sunar en bars ed è daventada Nina Simone. Malgrà il success dals onns che suondan: propi fatg pasch n'ha l'artista mai cun quest destin.

A chaschun da ses 90avel natalizi lascha La Marella vegnir a pled l'artista. Entras excerpts da sia autobiografia e dad intervistas, raquinta ella d'ina vita marcada da paupradad, rassissem, engaschament politic, violenza, relaziuns desastrusas, dependenza e problems psichics. Ma il fil cotschen da questa autobiografia è la musica; l'istorgia da Nina Simone è numnadamain cunzunt l'istorgia dad in talent extraordinari!