Síðasta vetrardag árið 1971 komu fyrstu tvö handritin aftur heim til Íslands frá Danmörku, eftir að Handritamálið svokallaða leystist. Þetta voru þjóðargersemarnar Flateyjarbók og Konungsbók eddukvæða sem hafa síðan verið varðveittar á Stofnun Árna Magnússonar. Þessum handritum, og átta öðrum merkisbókum, má nú fletta í stafrænni handritahirslu stofnunarinnar sem opnuð verður á sumardaginn fyrsta. Við fengum Svanhildi Óskarsdóttur rannsóknarprófessor við Stofnun Árna Magnússonar til að segja okkur frekar frá þessari sumargjöf stofnunarinnar til íslensku þjóðarinnar.

Hrafnhildur Björnsdóttir óperusöngkona hefur búið í Englandi í rúm 15 ár. Hún býr þarna ásamt fjölskyldu sinni og saman reka þau hjónin lítið fyrirtæki Impromtu Opera, nokkurs konar umboðsskriftstofa fyrir söngvara og hljóðfæraleikara auk þess sem þau koma fram sjálf en eiginmaðurinn er píanóleikarinn Martyn Parkes. En hvernig gengur lífið núna fyrir sig í miðjum kórónuveirufaraldrinum? Við slógum á þráðinn til Hrafnhildar í þættinum.

Vísindamenn um heim allan hafa brett upp ermarnar og vinna baki brotnu við að þróa bóluefni við COVID-19 sjúkdóminum. Fjöldi lyfja- og líftæknifyrirtækja hafa líka tekið upp samstarf til að hægt sé að þróa bóluefnin á sem stystum tíma. Þetta segir Ingileif Jónsdóttir, prófessor í ónæmisfræði og starfsmaður Íslenskrar erfðagreiningar. Bergljót Baldursdóttir ræddi við hana á Heilsuvaktinni í dag.

UMSJÓN GUÐRÚN GUNNARSDÓTTIR OG GUNNAR HANSSON