Hoe verklaar jy dit?

Het jy al ooit 'n wit reënboog gesien? Hoekom wys perde en ander plaasdiere soms hulle tande asof hulle grynslag? En op watter maniere kommunikeer diere met mekaar?

Kan 'n mens werklik toets of 'n flitsbattery dood is, deur dit op 'n sekere manier op die grond te laat val? Hoe bepaal 'n mens of dele van 'n fossiel, soos 'n tand en 'n skedel, aan mekaar behoort as dit naby mekaar gevind word? Watter rol speel sonlig en klimaat in die mens se velkleur?

Hoe meet 'n mens die temperatuur op die oppervlak van die son, asook by die kern van die aarde? Hoekom is die limfklier in die boud van 'n bosbok baie groter as die van 'n koedoe? Watter gevaar hou natuurlike swaar metale in die grond vir mens en dier in?

Hoe word 'n fossiel wat soos 'n varingblaar lyk in 'n gesteente gevorm? Wat veroorsaak geel knoppe aan sommige geitjies se nekke? En hoekom is daar so baie mites oor die medisinale waarde van renosterhoring as dit basies uit dieselfde materiaal bestaan as voëls se snawels, bokke se horings en selfs mense se naels?

Hoekom sien 'n mens nie hadida-neste of –kuikens nie? Waarom gebruik ons rooi en groen waarskuwingsligte as rooi-groen kleurblindheid die algemeenste vorm van kleurblindheid is? En hoe word sneeuvlokkies gevorm?

Kan dit paddas reën? Is dit veilig om met wingerdstompies te braai, gegewe die hoeveelheid gif wat jaarliks in wingerde gespuit word? En hoe het seemeeue geleer om mossels op die rotse te laat stukkend val om die binnegoed te kan eet?

Het jy al gehoor van 'n seeslak wat bloublasies eet en die se gif stoor om self te gebruik? Wat is die doel van die SKA-projek by Carnavon en watter voordele hou dit vir ons in? En waar kom die miere vandaan wat skielik miershope begin bou op lande waarop nou minimum bewerking toegepas word?

Het jy al kennis gemaak met 'n erd- of draadslangetjie? Hoekom word groot hoeveelhede sand gereeld op die rotslae langs die Suid-Afrikaanse kus gedeponeer om na 'n jaar of twee, oornag te verdwyn en weer 'n kaal rotsagtige kus agter te laat? Wat veroorsaak dat 'n enkele telefoonpaal in die Timbavati 'n aanhoudende gedruis veroorsaak, terwyl daar geen geluid by die ander pale te hoor is nie?

Hoekom word dag- en nagtemperature in grade Celsius aangedui en nie in grade Kelvin nie? Watter dier het die skerpste tande? En hoekom word daar tydens opgrawings groot ronde spoelklippe meer as 'n kilometer vanaf die Eersterivier gevind?

Hoe bekostigbaar is die ontsouting van seewater in Suid-Afrika vir menslike en landbou-gebruik? Hoekom hou sekere hare op die mens se lyf aan groei en ander nie? Waarom is Ermelo op die hoëveld se temperature deesdae gereeld hoër as die van Nelspruit in die laeveld?