Í því ástandi sem hefur verið undanfarið í COVID-19 og öllu sem því fylgir hefur eftirspurn landsmanna að eignast hund aukist gríðarlega. Það er svipað og gerðist á landinu í kjölfar hrunsins og hefur eftirspurnin aukist svo mikið að tala má um að hundaskortur sé í landinu. Við fengum Herdísi Hallmarsdóttur, formann Hundaræktarfélags Íslands í viðtal og spurðumum hana út í þetta og almennt um hundarækt og hundahald í þættinum.

Smáþáttaröðin Heimur ostanna var á sínum stað í dag þar sem þau Svavar Halldórsson og Eirný Sigurðardóttir leiða okkur inní undraveröld ostanna. Ostur er ekki bara ostur, eins og við höfum heyrt í undanförnum tveimur þáttum. Í þessum þriðja þætti tala þau um ferska osta, hvaða ostar falla inn í þann flokk, hvað einkennir þá, hvernig þeir eru búnir til og hvað er best að drekka með þeim.

Lesandi vikunnar að þessu sinni var Þórarinn Eyfjörð leikari og nú framkvæmdastjóri Sameykis stéttarfélags. Við fórum yfir hvaða bækur hann er að lesa núna og hvaða bækur og höfundar hafa haft áhrif á hann í gegnum tíðina.

UMSJÓN GUNNAR HANSSON OG GUÐRÚN GUNNARSDÓTTIR