Margir hafa áhyggjur af því að börn og unglingar lesi ekki nógu mikið í dag en þó eigum við Íslendingar fjöldann allan af rithöfundum sem senda frá sér hverja barnabókina á fætur annarri ár eftir ár. Í ellefta og næstsíðasta þætti Hve glötuð er vor æska? beinir Þorvaldur Sigurbjörn Helgason sjónum að barnabókum og skoðar þær bæði frá sjónarhorni lesenda og höfunda. Spjallað er við tvíburana Bjarna Dag og Braga Leó Stefánssyni auk þess sem Ævar vísindamaður segir frá og les upp úr væntanlegri bók sinni Þitt eigið tímaferðalag. Þitt eigið tímaferðalag eftir Ævar Þór Benediktsson kemur út hjá Forlaginu í nóvember. Upphafsstef þáttarins er Gunshowers með BADBADNOTGOOD. Millistef þáttarins er Stutt skref með Moses Hightower. Lokalag ellefta þáttar er The Kids Are Alright með The Who.

Á hverju ári koma út á Íslandi þúsundir bóka sem flestar eru gefnar út nokkrum mánuðum fyrir jól á tímabili sem kallað er jólabókaflóðið. Á bak við allar þessar bækur standa ýmsar bókaútgáfur og forlög sem hafa það hlutverk að sjá til þess að texti höfundarins skili sér yfir í prentaða bók. Í tíunda þætti Hve glötuð er vor æska? fjallar Þorvaldur Sigurbjörn Helgason um bókaútgáfur og ræðir við þrjá útgefendur. Adolf Smári Unnarsson og Tanja Rasmussen segja frá útgáfum sínum Lús og Kallíópu og lesa upp úr nýjustu bókum sínum, auk þess er rætt við Hólmfríði Úu Matthíasdóttur, útgefanda Forlagsins. Bréf frá Bergstaðastræti 57 eftir Adolf Smára Unnarsson og Brynhildi Karlsdóttur var gefin út af Lús í ágúst 2018. Skotheld eftir Birgittu Björg Guðmarsdóttur var gefin út af Bókaútgáfunni Kallíópu í ágúst 2018. Upphafsstef þáttarins er Gunshowers með BADBADNOTGOOD. Millistef þáttarins er Stutt skref með Moses Hightower. Lokalag tíunda þáttar er Wrapped Up in Books með Belle & Sebastian.

Þrátt fyrir að rúm 10% Íslendinga séu innflytjendur þá eru enn mjög fáar bækur gefnar út hér á landi eftir aðflutta rithöfunda og hlutur þeirra í bókmenntasamfélaginu virðist vera nokkuð rýr. Í níunda þætti Hve glötuð er vor æska? beinir Þorvaldur Sigurbjörn Helgason sjónum að bókmenntum innflytjenda og ræðir við tvo rithöfunda frá ólíkum uppruna sem bæði hafa gert Ísland að heimili sínu, palestínska rithöfundinn Mazen Maarouf og Bandaríska þýðandann og skáldið Meg Matich. Cold Moons eftir Magnús Sigurðsson í þýðingu Meg Matich var gefin út af Phoneme Media árið 2017. The Rats That Lick a Karate Champion's Ears eftir Mazen Maarouf var gefin út af Al-Mutawassit útgáfunni í Mílan árið 2017. Ljóðið How-To eftir Anders Carlson-Wee var birt í tímaritinu The Nation þann 5. júlí 2018: https://www.thenation.com/article/how-to/ Pistill Grace Schulman „The Nation Magazine Betrays a Poet - and Itself“ var birtur í The New York Times þann 6. ágúst 2018: https://www.nytimes.com/2018/08/06/opinion/nation-poem-anders-carlson-wee.html Grein John McWhorter „There's Nothing Wrong With Black English“ var birt í The Atlantic þann 6. ágúst 2018: https://www.theatlantic.com/politics/archive/2018/08/who-gets-to-use-black-english/566867/ Meistararitgerð Sólveigar Ástu Sigurðardóttur úr bókmenntafræði við Háskóla Íslands frá árinu 2015 „Landvistarleyfi í bókmenntaheiminum. Birtingarmyndir innflytjenda í íslenskum samtímaskáldsögum“ er aðgengileg á Skemmunni: https://skemman.is/handle/1946/21030 Upphafsstef þáttarins er Gunshowers með BADBADNOTGOOD. Millistef þáttarins er Stutt skref með Moses Hightower. Lokalag níunda þáttar er HUMBLE. með Kendrick Lamar.

Myndasögur hafa stundum haft þann stimpil á sér að vera aðeins fyrir börn þó þær hafi margoft sannað sig sem eitt fjölþættasta bókmenntaform okkar tíma. Í áttunda þætti Hve glötuð er vor æska? beinir Þorvaldur Sigurbjörn Helgason sjónum að myndasögum og ræðir við þrjá höfunda sem allir hafa lagt formið fyrir sig. Skáldin og teiknararnir Elín Edda Þorsteinsdóttir og Þorgrímur Kári Snævarr segja frá nýjustu verkum sínum auk þess sem Hugleikur Dagsson ræðir myndasögur, grín og nördakúltúr. Glingurfugl eftir Elínu Eddu Þorsteinsdóttur var gefin út af höfundi vorið 2018. Verk Elínar Eddu má finna á heimasíðu hennar: http://www.elinedda.info/ Skögla eftir Þorgrím Kára Snævarr var gefin út af Óðinsauga árið 2016. Verk Hugleiks Dagssonar má finna á heimasíðu hans: https://dagsson.com/ Upphafsstef þáttarins er Gunshowers með BADBADNOTGOOD. Millistef þáttarins er Stutt skref með Moses Hightower. Lokalag áttunda þáttar er Got to Be Real með Cheryl Lynn.

Hip hop er án efa vinsælasta tónlistarstefnan hjá ungu fólki í dag en getur það að rappa og semja rímur flokkast undir ljóðlist? Í sjöunda þætti Hve glötuð er vor æska? fjallar Þorvaldur Sigurbjörn Helgason um rapp og ræðir bókmenntalegar tengingar tónlistarstefnunnar við nokkra núverandi og fyrrverandi rímnasmiði. Rappararnir Arnar Freyr Frostason úr Úlfi Úlfi og Þuríður Blær Jóhannsdóttir úr Reykjavíkurdætrum koma í spjall auk þess sem Dóri DNA segir frá og les upp úr nýjustu ljóðabókinni sinni. Hugmyndir: Andvirði Hundrað Milljónir eftir Halldór Laxness Halldórsson var gefin út í takmörkuðu upplagi af Tunglinu árið 2015 og var endurútgefin af Bjarti haustið sama ár. Órar, martraðir og hlutir sem ég hugsa um þegar ég er að keyra eftir Halldór Laxness Halldórsson var gefin út af Bjarti haustið 2017. Upphafsstef þáttarins er Gunshowers með BADBADNOTGOOD. Millilag sjöunda þáttar er Háfleygt Orðalag með Reykjavíkurdætrum. Lokalag sjöunda þáttar er Úrið mitt er stopp pt.2 með Úlfi Úlfi og Gísla Pálma.

Samfélagsmiðlar eru einn stærsti tímaþjófurinn í lífi fólks nú á dögum en jafnvel þar leynist þó ýmis skáldskapur. Í sjötta þætti Hve glötuð er vor æska? Fjallar Þorvaldur Sigurbjörn Helgason um bókmenntir á tímum samfélagsmiðla. Rætt er við ljóðskáldin Dag Hjartarson og Eydísi Blöndal sem lesa upp úr verkum sínum. Auk þess er tekið viðtal við Ingibjörgu Evu Þórisdóttur, doktorsnema í sálfræði, sem rannsakað hefur áhrif samfélagsmiðla á íslensk ungmenni. Tíst og bast eftir Eydísi Blöndal var gefin út af forlaginu Lús árið 2015, Án tillits var gefin út af höfundi árið 2017. Þar sem vindarnir hvílast eftir Dag Hjartarson var gefin út af Bjarti árið 2012, Heilaskurðaðgerðin var gefin út af JPV árið 2017. Twitter aðgang Dags Hjartarsonar má finna á: https://twitter.com/DagurHjartarson Twitter aðgang Eydísar Blöndal má finna á: https://twitter.com/eydisblondal Instagram aðgang Rupi Kaur má finna á: https://www.instagram.com/rupikaur_/ Ítarlegri umfjöllun um sögu internetsins má finna í greininni „Brief History of the Internet“ eftir Barry M. Leiner, Vinton G. Cerf, David D. Clark, Robert E. Kahn, Leonard Kleinrock, Daniel C. Lynch, Jon Postel, Larry G. Roberts og Stephen Wolff frá árinu 1997: https://www.internetsociety.org/internet/history-internet/brief-history-internet/ Bókasafn föður míns eftir Ragnar Helga Ólafsson var gefin út af Tunglinu í júní 2018 en seldist upp á útgáfukvöldinu. Upphafsstef þáttarins er Gunshowers með BADBADNOTGOOD. Millistef þáttarins er Stutt skref með Moses Hightower. Lokalag sjötta þáttar er Tóti Tölvukall með Ladda.

Leikrit eru eitt af grundvallarformum bókmennta en óuppsett eru þau þó aðeins hálft verk. Í fimmta þætti Hve glötuð er vor æska? fjallar Þorvaldur Sigurbjörn Helgason um leikrit og sviðslistir. Rætt er við þrjá sviðslistamenn á ólíkum aldri, sviðshöfundarnir Gréta Kristín Ómarsdóttir og Matthías Tryggvi Haraldsson segja frá nýjustu verkefnum sínum auk þess sem leikstjórinn og leikskáldið Hlín Agnarsdóttir deilir reynslu sinni. Griðstaður eftir Matthías Tryggva Haraldsson var frumsýnt í Listaháskóla Íslands í maí 2018 og verður sýnt í Tjarnarbíó aftur í haust. Stóri Björn og kakkalakkarnir eftir Matthías Tryggva Haraldsson í leiksstjórn Salvarar Gullbrár Þórarinsdóttur var frumsýnt á leiklistarhátíðinni Ungleik í Þjóðleikhúsinu í nóvember 2016. Stertabenda eftir Marius von Mayenburg í leikstjórn Grétu Kristínar Ómarsdóttur var frumsýnt í Listaháskóla Íslands í maí 2016 og var sýnt aftur í Þjóðleikhúsinu haustið sama ár. Upphafsstef þáttarins er Gunshowers með BADBADNOTGOOD Millistef þáttarins er Stutt skref með Moses Hightower Lokalag fimmta þáttar er The Weight Of My Words með Kings of Convenience.

Þó að smásögur séu sjaldnast miklar að vexti eru þær, rétt eins og önnur bókmenntaform, heill heimur út af fyrir sig. Í fjórða þætti Hve glötuð er vor æska? fjallar Þorvaldur Sigurbjörn Helgason um smásögur og ræðir við þrjá rithöfunda sem allir hafa fengist við það form. Svikaskáldin Fríða Ísberg og Þórdís Helgadóttir segja frá og lesa upp úr sínum fyrstu smásagnasöfnum sem bæði eru væntanleg með haustinu. Auk þess er rætt við rithöfundinn Kristínu Eiríksdóttur sem nýlega hlaut Íslensku Bókmenntaverðlaunin fyrir skáldsögu sína Elín, ýmislegt. Slitförin eftir Fríðu Ísberg var gefin út af Partusi haustið 2017. Ég er fagnaðarsöngur var gefin út af Svikaskáldum vorið 2018. Fyrsta smásagnasafn Fríðu Ísberg kemur út hjá Partusi haustið 2018. Fyrsta smásagnasafn Þórdísar Helgadóttur kemur út hjá Bjarti haustið 2018. Doris deyr eftir Kristínu Eiríksdóttur var gefin út af JPV árið 2010. Upphafsstef þáttarins er Gunshowers með BADBADNOTGOOD. Millistef þáttarins er Stutt skref með Moses Hightower. Lokalag fjórða þáttar er Meat Is Murder með The Smiths.

Skáldsagan er af mörgum talin vera höfuðvígi bókmenntanna en sjaldgæfara er þó að ungir íslenskir höfundar skrifi skáldsögur heldur en ljóð. Í þriðja þætti Hve glötuð er vor æska? fjallar Þorvaldur Sigurbjörn Helgason um skáldsögur og ræðir við þrjá rithöfunda sem allir hafa fengist við það form. Arngunnur Árnadóttir og Jónas Reynir Gunnarsson lesa upp úr fyrstu skáldsögum sínum, Að heiman og Millilendingu, auk þess sem Jón Kalman Stefánsson segir frá upphafsárum sínum sem rithöfundur. Að heiman eftir Arngunni Árnadóttur var gefin út af Partusi árið 2016. Stór olíuskip og Millilending eftir Jónas Reyni Gunnarsson voru gefnar út af Partusi árið 2017. Saga Ástu eftir Jón Kalman Stefánsson var gefin út af Benedikt árið 2017. Skuggi vindsins eftir Carlos Ruiz Zafón kom út í íslenskri þýðingu Tómasar R. Einarssonar hjá Máli og menningu árið 2005. „Dauði höfundarins“ eftir Roland Barthes kom út í ritgerðasafninu Spor í bókmenntafræði 20. aldar í íslenskri þýðingu Kristínar Birgisdóttur og Kristínar Viðarsdóttur árið 1991. Upphafsstef þáttarins er Gunshowers með BADBADNOTGOOD. Millistef þáttarins er Stutt skref með Moses Hightower. Lokalag þriðja þáttar er Seven Days of Falling með Esbjörn Svensson Trio.

Ljóðasenan á Íslandi hefur sennilega sjaldan verið jafn sterk og um þessar mundir, á síðustu árum hafa fjölmörg ungskáld stigið fram á ritvöllinn og getið sér hljóðs. En hvaða merkingu hefur það að vera ungskáld á tímum þar sem æskan er stöðugt að lengjast og farið er að þykja eðlilegt að dvelja á Hótel mömmu langt fram á þrítugsaldurinn? Í öðrum þætti Hve glötuð er vor æska? skoðar Þorvaldur Sigurbjörn Helgason hugtakið ungskáld með hjálp tveggja ungra skálda; þeim Brynju Hjálmsdóttur og Brynjari Jóhannessyni. Auk þess er rætt við eldra og reynslumeira skáld, Anton Helga Jónsson, sem segir frá upplifun sinni að vera ungskáld á 8. áratug síðustu aldar. Brotið í byrjun þáttar kemur úr ljóðinu Árstíð í Helvíti eftir Arthur Rimbaud sem kom út í bókinni Uppljómanir & Árstíð í helvíti í þýðingu Sigurðar Pálssonar og Sölva Björns Sigurðssonar hjá JPV haustið 2016. Nánari skilgreiningar á hugtökunum strætóskáld og spíttskáld má finna í grein Brynjars Jóhannessonar „Af spítt- og strætóskáldum“ sem birtist á Starafugli í maí 2018: http://starafugl.is/2018/af-spitt-og-straetoskaldum/ Ljóðabækurnar Kraðak, Mæri, Endalok og Flótti eftir Brynjar Jóhannesson komu allar út árið 2017 og eru fáanlegar til sölu hjá höfundi: https://www.facebook.com/tolfutgafa/ Söguna Hvísl eftir Brynju Hjálmsdóttur má finna í bókinni Hljóð Bók sem gefin var út vorið 2018 af hópi meistaranema í ritlist og ritstjórn frá Háskóla Íslands. Upphafsstef þáttarins er Gunshowers með BADBADNOTGOOD. Millistef þáttarins er Stutt skref með Moses Hightower. Lokalag annars þáttar er Forever Young með Alphaville.