Al Tavulin litterar sa scuntran questa giada Clà Riatsch, anteriur professer da litteratura rumantscha a l'universitad da Turitg, e l'istoricher e romanist Martin Camenisch. «Davos ils mugrins», il nov roman da la Lumneziana Leontina Lergier-Caviezel e "Denter las alas dil temps", ina collecziun cun poesias da reverenda Martin Fontana da Trin, quai èn ils dus cudeschs sin il Tavulin litterar.

«Denter las alas dil temps» cuntegna poesias en sursilvan e tudestg che mainan tras las quatter stagiuns. Ellas avran ils egls per las bellezzas a l'ur da la via, miraculs ch'ins na percorscha savens betg.

En «Davos ils mugrins» raquinta Leontina Lergier-Caviezel d'ina tragedia capitada en in vitg alpin e che ha stremblì l'entira cuminanza. Anc onns pli tard n'èn bleras blessuras betg guaridas. La giuvna Andrea da la Bassa marida en il vitg e vul vegnir a savair dapli da la chaussa.