Muri iki kiganiro turavuga ku buzima mu nkambi z'abanyekongo barimo guhungira mu Rwanda. Twarabasuye mu nkambi z'agateganyo za Nkamira na Kijote mu burengerazuba bw'U Rwanda ndetse dusura n'abamaze kwimurirwa mu nkambi ya Mahama mu burasirazuba bw'U Rwanda. Mu nkambi z'agateganyo za Kijote na Nkamira twahasuye hari abagera ku 1200 biganjemo abagore, abana n'abasheshe akanguhe. Izi mpunzi zivuga ko zavuye muri Rutshuru na Masisi mu burasirazuba bwa Repubulika ya demokarasi ya Congo zihunga ubwicanyi bw'imitwe yitwaje intwaro izita abatutsi b'abanyarwanda cyangwa abo mu mutwe wa M23 urwana n'igisirikare cya leta ya Congo. Iki kiganiro mwagiteguriwe kandi murakigezwaho na Yves Bucyana.