Sonda ils 22.09.2018 è ina data ch'il dirigent Corsin Tuor da Trun na vegn betg ad emblidar uschè spert. Quai è il di dal grond success cun sia Brass Band Berner Oberland (BBO). A Corsin Tuor e la giuvna BBO èsi reussì da gudagnar la 29avla ediziun da la concurrenza da Brass Band Swiss Open Contest. Cun sia interpretaziun dal toc da pensum «Phoenicia – Symphonic Sketches for Brass Band» dal cumponist svizzer Stephan Hodel, ha el persvadì la giuria e survegnì ils pli blers puncts dal di. Ensemen cun la buna prestaziun tar il toc da pag «Prometheus» ha quai lura tanschì a la fin per cuntanscher la victoria. Per cumplettar in di perfetg ha la BBO lura gist era dastgà prender encunter il premi spezial per la meglra producziun dal marsch. Quai cun il marsch «Black Knight» da William Rimmer. Oz en l'Instrumentala pudais vus tadlar per l'emprima giada sco la BBO ha sunà, vus pudais tadlar gist tut ils trais tocs da concurrenza. Accumpagnà d'ina u l'autra ulteriura novitad e preschentaziun dal contest.