En il magliacudeschs discurra Esther Krättli cun giasts davart cudeschs che dattan en egl.

En il center da l'emissiun stattan dus cudeschs che discurran da gronds siemis, ma betg tuts èn s'accumplids. Ils giasts dal magliacudeschs èn questa giada Fadrina Hofmann e Roman Caviezel.

Protagonist da «Panuglias da fim» da Viola Cadruvi è Benedetg Deplazes che viva dapi in pèr mais en l'asil da vegls. Tut para paschaivel, fin che sia stgatletta da cigarettas d'argient svanescha in bel di. Benedetg vul chattar il lader e sa metta sin in viadi che leventa caos, protest, scumbigl e regurdientschas gia daditg stgatschadas.

Il roman «Greta und Janis» da l'autura Sarah Kuratle, raquinta sco en in siemi fantastic l'istorgia fascinanta, ma era tragica dals dus protagonists che s'inamureschan senza savair ch'els èn fragliuns. Il cudesch è scrit en in alingua poetica cun maletgs surreals che fan endament la paraula da Gionin e Grettina.