En il magliacudeschs discurra Esther Krättli cun giasts davart cudeschs che dattan en egl.

La collecziun da poesias «Launa da pavagls» è la cuntinuaziun da la lavur lirica da la poetessa engiadinaisa Jessica Zuan che viva a Barcelona. Ils elements centrals che caracteriseschan ses texts èn puspè preschents en quest cudesch: las relaziuns tranter ils umans, l'ir e turnar ed il spetgar.

En «Terra pels peis – Den Füssen ein Grund» preschenta Linard Bardill per l'emprima giada sias poesias en rumantsch e tudestg. Quellas giogan cun tut ils elements ed ans laschan ralentar. E perquai che Bardill è in narratur e chantautur versà, è sia lingua ludica ed autentica, ella funcziuna il mument ed è tuttina misteriusa e ponderada.