Ozendi dura in sgol da Paris a Mauritius be 11 uras. L'onn 1765 era quai in viadi da 4'000 uras, en bartga sur la mar. Sin ina da quellas bartgas è er Gion Casper Collenberg passagier. El raquinta dal viadi d'in mez onn.

Il giuven chombrer da Lumbrein accumpogna ses patrun, in ritgun da Paris, sin l'insla colonisada dals Franzos. Per ses confamigliars en Lumnezia scriva el in rapport detaglià da quest viadi che dura in mez onn e che oscillescha tranter lungurella da plum e cumbats per vita e mort. El descriva la vastezza da la mar, el rapporta da las baraccas dals mariners, el raquinta da sias temas d'inscuntrar sirenas ed el documentescha il sistem brutal da sclavaria che regna sin l'Île de France (Mauritius).

Il linguist Michele Badilatti ha transcrit, analisà e rendì public quest document rumantsch da valur istorica. En discurs cun Anna Serarda Campell parta el las aventuras dal simpel giuven da Lumbrein che s'ha fatg in num fin en la curt roiala franzosa.

Quest'emissiun è ina repetiziun dal december 2022.