Il Grandhotel Waldhaus a Vulpera n'exista betg pli. Oz regordan mo anc in bigl, amez ina surfatscha verda, ed intgins pilasters solitaris a la splendur d'ina giada. E tuttina viva ils Waldhaus, ch'è ars il 1989, sco legenda en la memoria da blera glieud.

Il biro da Rolf Zollinger, il davos directur da l'hotel, è plain cun objects e documents che regordan al Waldhaus. Tranter auter trais stgatlas che cuntegnan 20'000 cartinas da giasts. Quai èn 20'000 differents destins ed istorgias. Dacurt ha el ensemen cun il fotograf austriac Lois Hechenblaikner e l'istoricra da cultura Andrea Kühbacher publitgà ina part da quellas. Il Waldhaus viva vinavant er en la memoria d'Annatina Pinösch, hoteliera ed affarista, ch'è creschida si cun quest hotel. La dinastia d'hoteliers Pinösch aveva fatg or da la pitschna fracziun purila da Vulpera in lieu da renum internaziunal per la haute-volée europeica.