Ils sauts enconuschents da Stefan Battaglia e da Sarin Oswald.

La populara dad oz deditgain nus a dus musicants e cumponists grischuns. In da Veulden, l'auter da Müstair. Il Jauer è Sarin Oswald, annada 1902, in musicant da vaglia da la dinastia dals Oswalds ch'ha era cumponì blers sauts. Ils pli enconuschents èn: Salüds a Müstair, a Brenta voll Milch e l'Alp Zadra. Quels laschain nus sunar da la chapella da ses figl Ludwig Oswald, e nus udin er interpretaziuns d'autras furmaziuns.

Da Veulden è Stefan Battaglia. El è naschì là ils 4 da schaner 1911 e mort ils 10 da matg 1977. El era marangun ed in fitg bun clarinettist, sco ses grond idol Kasi Geisser.

Da Stefan Battaglia datti dapli che 130 sauts, la gronda part populars, divers tocs per musica instrumentala e 10 chanzuns rumantschas. Cun sia chapella «Stefan Battaglia» ha el fatg musica a partir dal 1931 fin ils onns 1970, e vitiers ha el accumpagnà tranter auter Karl Grossmann, Peter Tscharner, Fredy Storz e Sepp Peretti.