ITGELRADIO

Ихэнх тохиолдолд итгэгч хүмүүс өөрсдийнхөө хүчин чармайлтаар бурханлаг амьдрахыг хичээдэг. Эцэстээ бүгд урам хугарч, бүтэлгүйтэж, сэтгэлээр унаж орхидог. Харамсалтай нь бид итгэлийн амьдралыг өөрийн хүчээр туулж чадахгүй гэдгийг ойлгох хүртлээ олон удаа ийнхүү бүтэлгүйтдэг. Үнэндээ Бурхан биднийг өөрсдийнхөө хүчээр итгэлийн амьдралаар амьдраасай гэж хүсдэггүй. Учир нь энэ нь боломжгүй гэдгийг Бурхан маш сайн мэддэг. 

    Тэгвэл бидний хувьд боломжгүй энэ бүхнийг боломжтой болгохын тулд Ариун Сүнс бидэнд тусалдаг гэдгийг Др.Стэнли бидэнд сануулж байна.

Итгэгч хүмүүс бид зөрчилдөөнийг хэрхэн шийдвэрлэх вэ? Зөрчилдөөнд хэрхэн хандах вэ? ХАМТДАА нэвтрүүлгийн маань энэ удаагийн дугаарт Др.Стэнли бидэнтэй энэ сэдвээр ярилцах болно. Хамтдаа энэ цагт бидний амьдралд тулгардаг зөрчилдөөн мөргөлдөөнийг хэрхэн шийдэх, үүнд хэрхэн хандах тухай 4 үндсэн зарчмыг суралцах болно. Ингээд Др.Стэнлийн ярианд анхаарлаа хандуулцгаая.

Заримдаа бидний бодож төлөвлөж байсан зүйлс буруугаар эргэх нь бий. Бүх зүйл буруугаар эргэж байгааг ухаарах тэр үед бидний дотор ямар мэдрэмж төрдөг вэ? Бид тэр үед сэтгэлээр унаж, уурлаж бухимдаж, урам зориггүй болдог. Дахин хэн нэгэн хүнд итгэж чадахгүй болсон юм шиг бидэнд санагддаг. Тэр битгий хэл Бурханд ч итгэхэд хэцүү юм шиг санагддаг. Энэ бол бидний амьдралд гарцаагүй тулгардаг зүйл. Гэхдээ бид ийм сөрөг сэтгэл хөдлөлдөө хэт автаж, амьдралдаа гашуун үндэс ургуулж болохгүй. Бидний амьдралд урам хугарах, сэтгэлээр унах, зориг мохох зүйл олон тохиолддог. Гэхдээ тэглээ гээд бид зүрх алдах ёсгүй юм. Өнөөдөр Др.Стэнли бидэнтэй энэ сэдвээр ярилцах болно.

Мариа Марта 2-н амьдралд юу тохиолдоод байгааг тэд өөрсдөө ч ойлгохгүй байсан. Тэд өөрсдийн сайн найз Есүс рүү хэл хүргүүлж, хайртай ах Лазар нь үхлүүт өвчтэй байгааг хэлүүлсэн ч Есүс ирсэнгүй. Тэр битгий хэл Лазарыг нас барж 3 хоночихоод байсан ч Есүс ирсэнгүй. Есүс дотны найз нараа мартлаа гэж үү? 

    Харин эцэст нь Есүс арай гэж нэг юм ирэхэд Марта Түүнийг тосч уулзаад “Эзэн, Та энд байсан бол ах минь үхэхгүй байх байсан. [Харин] Та Бурханаас юу ч гуйсан Бурхан Танд өгнө гэдгийг одоо би мэдэж байна” гэж хэлсэн байдаг. Хэдийгээр Мартагийн урам хугарсан байсан ч Есүс нөхцөл байдлыг одоо ч өөрчлөх чадалтай гэдэгт Марта бат итгэж байсан. Биднийг урам хугарч, сэтгэлээр унасан үед Бурханд итгэх бат итгэл л биднийг бат зогсоход тусалдаг гэдгийг Др.Стэнли өнөөдөр бидэнд сануулах болно.

Нэгэн алдартай Христ итгэлт зохиолч хэлэхдээ “Бурханд итгэдэг хэрнээ Бурханд бодитой ханддаггүй итгэгчид маш олон, бүр сая саяараа байдаг” гэсэн байдаг. Магадгүй та дотроо “Би ийм биш” гэж бодож байж болох ч хэрвээ бид өөрийнхөө өдөр тутмын амьдралыг анхааралтай ажиглах юм бол бид маш олон тохиолдолд Бурхан байдаггүй юм шиг үйлдлийг хийж байдаг. Бид Бурханаас мэргэн удирдамжийг гуйдаггүй. Бурхан бидэнд мэргэн удирдамжаа өгнө гэдэгт ч итгэдэггүй. Та Бурханаас мэргэн удирдамжийг гуйхын оронд өөрийнхөөрөө аливаа асуудлаа шийдчихээд, дараа нь тэр төлөвлөгөөгөө ивээж өгөхийг Бурханаас гуйж залбирдаггүй гэж үү? 

    Харин Бурхан биднийг удирдан дагуулах болно гэж амласан. Гэхдээ үүний тулд бид өөрсдөө Бурханыг сонсох цагийг гаргах нь чухал. Тиймээс өнөөдөр хамтдаа “Бурханы удирдамжийг эрэлхийлэх нь” гэсэн сэдвийн дагуу суралцацгаая.

Өнөөдөр та бид яарч сандарсан, цаг хэмнэж, хурдаа нэмсэн цаг үед амьдарч байна. Тэр утгаараа бид ямар ч зүйл дээр хүлээх дургүй болсон. Ямар нэг зүйлийг бид хүлээхээс өөр аргагүй болвол бид дотроо тавгүйцэж, тухгүйцэж, дургүйцэж цухалддаг. Гэтэл хүлээх нь чухал үе гэж бас бий. Тэр тусмаа бид Бурханы удирдамжийг эрэлхийлж байгаа бол хүлээж сурна гэдэг маш чухал. 

Бид өөрсдийнхөө хүслийн дагуу эсвэл өөрсдийнхөө төлөвлөгөөнд баригдаж шийдвэр гаргах үедээ ихэвчлэн алдаатай шийдвэр гаргадаг. Харин бид Бурхантай зөвлөлдөхөд цаг гаргаж Бурханыг дуулгавартай дагах шийдвэртээ бат зогсох юм бол Бурхан биднийг гарцаагүй хөтлөн дагуулах болно. Хамтдаа энэ цагт Бурханы удирдамжийг эрэлхийлж, Бурханы “яв” гэсэн цагт явж чаддаг, Бурханыг хүлээж чаддаг хүмүүс байх нь ямар чухал болохыг сурж авцгаая.

Бид бүгд үхлийн тухай ярихаас зайлсхийцгээдэг. Магадгүй бид үхлийн дараа биднийг юу хүлээж байгаа тухай тодорхой мэдэхгүй учраас ийнхүү зайлсхийдэг байж болох юм. Тэгвэл өнөөдөр Др.Стэнли бидэнтэй энэхүү сонирхолтой сэдвийн талаар ярилцах болно. Үхлийн дараа юу биднийг хүлээж байдаг юм болоо? Энэ амьдралын маань ажил үйлс үхлийн дараах үйл явдалд нөлөөлдөг болов уу? Бид үхлийн дараа хаана мөнхөд байх вэ? Хамтдаа энэ бүх асуултанд Библийн үнэний дагуух хариултыг авцгаая. Ингээд Др.Стэнлийг урьцгаая.

Хүмүүс бидэнд түгээмэл байдаг нэгэн дайсан бол үхэл юм. Тэгвэл та үхлийн тухай бодохдоо айдаст автан чичирдэг үү? Эсвэл үхэл бол Есүс Христтэй хамт мөнхөд байх тэр амьдралын үүд хаалга хэмээн хардаг уу? 

Өнөөдөр Др.Стэнли бидэнтэй “үхлийн дараа бид мөнхийн мөнхөд хаана байх вэ?” гэсэн сэдвээр ярилцах болно. Өнгөрсөн хичээлээр биднийг зөвхөн 2 л сонголт хүлээж байгаа тухай өгүүлсэн. Ингэхдээ тэр хоёр сонголтын нэг болох мөнхийн улс, диваажингийн тухай Др.Стэнли бидэнд өгүүлсэн. Харин өнөөдөр бид хамтдаа үлдэж буй ганц сонголт болох тамын тухай үзэх болно. Энэ бүхнийг үзэх явцдаа та нэг л зүйлийг санаарай. Хожим таны мөнхөд байх тэр газрыг танаас өөр хэн ч сонгож чадахгүй. Энэ бол таны сонголтоос бүрэн хамаарсан асуудал. Хамгийн чухал нь та энэ сонголтыг өнөөдөр ч хийх боломжтой юм шүү!

Христэд итгэдэггүй хүмүүсийн хувьд Христитгэлийн талаар хүлээн зөвшөөрөхөд хамгийн хэцүү ойлголтуудын нэг бол мөнхийн шийтгэл буюу тамын тухай ойлголт байдаг. Зарим хүмүүс там байдаг гэдэгт итгэдэггүй, итгэхийг ч хүсдэггүй. Зарим хүмүүсийн хувьд хайр энэлээр дүүрэн тэр Бурхан аймшигтай газрыг бий болгож тэндээ хүмүүсийг хаяна гэдгийг төсөөлж чаддаггүй. Бурхан тийм харгис хэрцгий байж чадна гэж үү? гэж тэд боддог.

    Тэгвэл энэ мэт ташаа ойлголтуудад бид ямар хариулт өгөх вэ? гэдэг талаар бид өнөөдөр үзэх болно. Магадгүй та өөрөө ийм ташаа ойлголттой яваа бол галт нуур буюу там үнэхээр байдаг гэдгийг Библи бидэнд хэрхэн нотолж байгааг бид үзэх олно. Ингээд хамтдаа Др.Стэнлийн ярианд анхаарлаа хандуулцгааж, бидний үгүйсгэх эсэхээс үл шалтгаалаад үнэхээр “мөнхийн шийтгэл гэж байдаг” гэдгийг Библиэс мэдэж авцгаая.

Биднийг үхлийн дараа юу хүлээж байдаг юм болоо? Энэ дэлхий дээрх бүхий л шашин шүтлэг энэхүү асуултанд өөрийнхөөрөө хариулт өгөхийг хичээдэг. Гэхдээ тэр бүх шашин шүтлэг нь ямагт таамаг төдий зүйлсийг хэлдэг бол харин Христитгэл нь Библи дээр үндэслэсэн хөдлөшгүй үнэнийг тунхагладаг. Тэгвэл таны итгэл үнэмшил дэлхийн бусад шашин шүтлэгээс юугаараа ялгаатай юм бэ? Библийн үг чухам юугаараа бусдаас онцгой юм бэ? 

    Есүс Христ энэ дэлхий дээр амьдран байхдаа үхэл болон амилалттай холбоотой маш олон зүйлсийг өгүүлсэн байдаг. Түүний өгүүлсэн бүхэн үнэн болохыг Тэр үхлээс амилснаараа бидэнд батлан харуулсан юм. 

    Тэгвэл өнөөдөр Др.Стэнли бидэнд Есүс Христийн энэ л сургаалыг тайлбарлан таниулж өгөх болно.