ITGELRADIO

Хуучин гэрээн дээр Израильчуудыг жилд нэг удаа Эвлэрүүллийн өдрийг тэмдэглэдэг байсан тухай өгүүлсэн байдаг. Тэр өдөр Израилийн Тэргүүн тахилч сүмийн онцгой ариун газар луу нэвтрэн орж бүх Израильчуудын өмнөөс эвлэрүүллийг хийдэг байсан. Тэргүүн тахилчийн хувьд тийнхүү Бурханы оршихуйд орж, Түүнтэй уулзах нь үнэхээр онцгой ивээл ерөөл, онцгой эрх дарх байсан.

Тэгвэл өнөөдөр та бидний хувьд Бурхантай уулзахын төлөө Хуучин гэрээний ёс жаягийг дагах шаардлагагүй болсон. Есүс Христээр дамжуулан бид Бурхантай хэзээ ч, хаана ч, ямар ч шалтгаанаар уулзан ярилцах боломжтой болсон. Энэ бол итгэгч бидний хувьд үгээр илэрхийлшгүй онцгой их ивээл ерөөл, онцгой их эрх дарх юм шүү.

Зарим хүмүүс эргэн тойрондоо байгаа хүмүүсээс илүү эрх дарх эдэлдэг. Тэд бизнесийн ч юмуу, улс төрийн ч юмуу, нийгмийн тодорхой нэг хүрээнд хамаарч жирийн хүмүүсийн эдэлж чаддаггүй онцгой эрх дархыг эдэлдэг. Тэгвэл өнөөдөр бид итгэгч хүмүүст өгөгдсөн нэгэн онцгой эрхийн талаар ярилцах болно. Энэ бол Бурхан Эцэгийн өмнө очин залбирах эрх юм. Есүс Христэд итгэх итгэлээр дамжуулан бид ямар ч үед, ямар ч шалтгаанаар Бурханы өмнө очин зогсох боломжтой болсон. Тэгвэл итгэгч бидэнд өгөгдсөн энэ эрх дарх ямар гайхалтай зүйл болохыг та энэ цагт олж мэдээрэй.

Бидний амьдралд гэнэтийн таагүй зүйлс олонтаа тохиолддог. Заримдаа дарга маань биднийг дуудаад “Уучлаарай, таныг цомхтголд оруулахаас өөр аргагүй боллоо” гэж хэлдэг. Эсвэл эмч бидэнд “Уучлаарай, танд дуулгах муу мэдээ байна” гэж хэлдэг. Энэ мэт тохиолдлууд бидний дотор айдас түгшүүрийг бий болгодог. Бидний амьдрал гэнэтхэн л бүхэлдээ хяналтаас гараад явчих шиг санагддаг. Тэгвэл ийм нөхцөл байдалд орсон үедээ бид хэрхэн өөрсдийгөө тайвшруулах вэ? 

    Өнөөдөр Др.Стэнли бидэнд, хамгийн хүнд хэцүү найдвар тасарсан үед ч бидэнд хийж чадах зүйл бий гэдгийг сануулж байна. Бид тэр хүнд хэцүү цагт Бурхан руу хандан хашхирах үед юу болдог вэ гэдгийг та энэ цагт сонсоорой.

Хэрвээ таныг дэлхийн хамгийн том компанийн захирал өөрийнхөө хувийн туслагчаа болооч гэж хүсвэл та яах вэ? Эсвэл таныг бизнесийнхээ хамгийн чухал байр суурин дээр томилохыг хүсвэл танд ямар санагдах вэ? Энэ санал таны хувьд гайхалтай санал санагдахгүй гэж үү?

            Тэгвэл өнөөдөр Др.Стэнли бидэнд итгэгч байна гэдэг нь бид ямар нэгэн компанийн захирлаас хол илүү Нэгэнд үйлчлэхийн нэр гэдгийг сануулж байна. Бурхан Өөрт нь итгэгч хүн нэг бүрт Өөрт нь үйлчлэх онцгой дуудлагыг өгсөн юм. Ингээд хамтдаа итгэлийн амьдралаар амьдрахад амин чухал ойлголтуудын нэг болох үйлчлэлийн талаар сурцгаая.

Элч Петр бол төрөлхийн удирдагч нэгэн байсан. Тэр үргэлж бусдын түрүүнд үсрэн гардаг, бүхнийг өөрийнхөөрөө шийдэх гэж оролддог хүн байсан. Гэтэл Есүсийн манлайллын арга барил Петрийнхээс тэс өөр байсан. Есүс Христ бүхнийг итгэлтэйгээр удирддаг байсан. Гэхдээ Өөрийг нь дуулгавартай дагахыг шаардахын оронд Есүс дагалдагч нарынхаа тоос шороон болсон бохир хөлийг угааж байсан юм. Энэ дэлхийн Аврагч Эзэн ийм зүйлийг хийх нь зохимжтой гэж үү? Есүс Эзэн энэ асуултад “тийм” гэж хариулсан юм. Учир нь Түүний хаанчлалд “та нарын дунд хэн чинь агуу болохыг хүснэ, тэр нь та нарын зарц болог” гэсэн зарчим үйлчилдэг юм.

            Үнэндээ Бурханд үйлчлэх үйлчлэл бол итгэгч бидний хувьд хамгийн дээд хүндэтгэл юм. Чухам яагаад ийм болохыг хамтдаа энэ цагт сурцгаая.

“Бууж өгөх” гэсэн үгийг сонсохоор хүмүүсийн дотор ихэвчлэн сул дорой байдал, боолчлол, ялагдал, эзлэн түрэмгийлэл гэх мэт сөрөг төсөөлөл буудаг. Тийм ч учраас хүмүүс үүнээс аль болох зайлсхийдэг. Гэтэл Бурхан биднийг ивээж, ерөөж, шагнахын тулд биднийг Өөрт нь бууж өгөөсэй гэж хүсдэг бол яах вэ? Тэр тохиолдолд бид харин ч бууж өгье хэмээн хүсч тэмүүлэх учиртай юм. 

    Ингээд бүгдээрээ хамтдаа Бурханы ивээл ерөөлийг бүрэн дүүрнээр хүртэх нөхцөл болзол нь чухам юу болохыг хамтдаа сурцгаая. Ингээд Др.Стэнлийн ярианд анхаарлаа хандуулцгаая.

Африкийн зарим үндэстнүүд зэрлэг сармагчинг маш зальжин аргаар барьж авдаг гэнэ. Анчин модон хайрцаг бэлдээд тэр хайрцгандаа сармагчингийн гар шургаж орж болохуйц жижигхэн нүх гаргадаг байна. Тэгээд хайрцган дотроо томхон жимс хийж орхидог байна. Сармагчин тэр нүхээр гараа оруулж доторх жимсийг атгах үед гар нь эргээд жижигхэн нүхээрээ гарах аргагүй болдог байна. Ингээд сармагчин гартаа атгасан олзоо хаяхыг хүсэхгүй тонгочсоор анчны гарт амархан ордог байна. 

    Тэгвэл итгэгчид бид ч бас амьдралынхаа зарим нэг талбарыг Бурханд өргөж, зарим талбарынхаа жолоодлогыг Бурханд атгуулахыг хүсэхгүйгээсээ болоод үүнтэй төстэй занганд ордог байх юм. Бид өөрсдийнхөө буруу бодол, муу зуршил, таагүй харилцаанаас зуурсаар зуурсаар эцэст нь гэм нүгэлд хүлэгдэж орхидог байна. Тэгвэл энэ бүхнээс чөлөөлөгдөх арга зам бол Бурханд бууж өгөх явдал гэдгийг Др.Стэнли бидэнд сануулж байна. Ингээд Др.Стэнлийн ярианд анхаарлаа хандуулцгаая.

Таны хувьд амьдрал чинь бүхэлдээ хүчтэй сэгсрэгдэж байгаа юм шиг санагдаж байсан үе бий юу? Бидний хувьд хайртай дотнын хүнээ алдах, хүнд өвчнөөр өвдөх, санхүүгийн том хямралд орох гэх мэт олон зүйлээс болоод яг ийм байдалд ордог. Бидний итгэж найдаж байсан тэр зүйлс үгүй болох үед бид ямар ч хамгаалалтгүй хоцорч байгаа юм шиг бидэнд санагддаг.

            Хэрвээ таны амьдралд яг одоо тийм зүйл тохиолдсон бол та тэр бүх асуудлаа Бурханы өнцгөөс хараад үзээрэй гэж Др.Стэнли бидэнд сануулж байна. Тэгээд итгэл найдвараа “хэзээ ч ганхашгүй” тэр зүйлст тавихыг урьж байна.

Есүс Христийг энэ дэлхий дээр амьдарч байх үед хүмүүс Есүс рүү татагддаг байсан нэгэн чухал шалтгаан бол Есүсийн бусдыг сонсох чадвар байсан. Есүс бусадтай харилцаа тогтоохыг чин сэтгэлээсээ хүсдэг байсан учраас тэднийг анхааралтай сонсдог байсан. Тэгвэл Эзэн Есүс өнөөдөр ч та биднийг анхааралтай сонссоор байна. Тэгвэл бид Есүс Христэд өөрсдийнхөө гуйлт залбирлыг өргөдөг хэрнээ өөрсдөө Түүний үгийг сонсох цагийг гаргадаг билүү?   

            Бид өөрсдийнхөө төлөвлөгөөг хойш тавиад, Есүс Христийн үгийг сонсоход бүх анхаарлаа хандуулахгүй юм бол бид Христийн хайрыг гүн гүнзгий таньж мэдэж чадахгүйд хүрнэ. Тэгвэл энэ цагт хамтдаа “Бурханы үгийг хэрхэн сонсох вэ?” гэсэн сэдвээр хамтдаа сурцгаая.

Хэрвээ та томоохон онгоцны үйлдвэрт очиж үзэх юм бол тэнд тэсэхийн аргагүй дуу чимээтэй болохыг шууд анзаарна. Ихэнх тоног төхөөрөмж нь агаарын даралтаар ажилладаг маш чанга дуу чимээтэй байдаг учраас тэнд ажилладаг бүх ажилтнуудад сонсголыг нь хамгаалахын тулд чихний хамгаалалт зүүлгэдэг юм. Ажилтнууд чихний хамгаалалтаа зүүгээд, тоног төхөөрөмжөө ажиллуулсан байхад хоорондоо ярилцаж ойлголцох ямар ч боломжгүй болж хувирдаг.

            Тэгвэл маш олон итгэгчид яг л тэр үйлдвэрийн ажилтнууд шиг нөхцөл байдал дунд амьдарч байдаг. Тэд өөрсдийнхөө амьдралыг босгох гээд хэтэрхий завгүй ажиллаж байдаг учраас Бурханы дуу хоолойг сонсож чаддаггүй. Харин Бурхан биднийг Өөрийнхөө сайн замаар хөтлөн дагуулахыг хүсдэг. Тиймээс бид Бурханы үгийг сонсоход тусгайлан цаг гаргадаг байх нь чухал юм. Ингээд хамтдаа “Бурханы үгийг хэрхэн сонсох вэ?” гэсэн сэдвээр сурцгаая.