ITGELRADIO

Нэгэн ээж хүүтэйгээ нар жаргах үеэр уулан дээр тоглож байжээ. Гэнэт хүү нь маш ихээр догдлон, "Ээж ээ! Тэнгэрийг хар даа! Энэ дэндүү гоё үзэсгэлэнтэй юм аа!” гэж хашхирах шахам хэлээд, ээжийнхээ гараас нь хөтлөн баярлан хөөрөн гүйв. “Энэ урт үгийг бяцхан үр минь яаж сурсан юм бол, үнэхээр голыг нь олоод хэлчихлээ шүү дээ” гэж ээж нь бодохдоо баяр бахдал төрж, хайр нь ундарч байлаа. Балчирхан үрийнх нь хэлсэн тэдгээр үгс тэр л мөчөөс хойш ээжийнх нь сэтгэлд хоногшин үлджээ.

Тиймээ, Бурхан энэ хорвоо ертөнцийг үгээр илэрхийлшгүй үзэсгэлэнтэйгээр бүтээсэн. Та энэ цагт хэдхээн хором өөрийнхөө амьдралын тухай бодоод үз дээ.

Таны амьдарч буй газарт Бурхан үгээр илэрхийлшгүй ямар гоо үзэсгэлэнг авчирсан байна вэ?

Дуулал 92:12-14 дээр:

"Зөвт хүн далдуу мод шиг цэцэглэж,

Ливан дахь хуш мод шиг ургана.

ЭЗЭНий өргөөнд тэд суулгагдаж

Бурханы маань хүрээнүүдэд тэд цэцэглэнэ.

Тэд хөгширсөн ч жимс гаргана.

Тэд шүүслэг ба ногоон байна” хэмээн бичжээ.

Би энэ хэсэгт дуртай. Хөгшрөлтийн тухай хэлсэн эдгээр үгс миний амьдралд биелэх болно гэж найддаг. Та ч бас өтөлсөн ч үр жимсээ ургуулж, шүүслэг ногоон хэвээр байгаарай.

Бид бүгд материаллаг дэлхий ертөнцөд амьдарч байна. Өдөр бүр бид аз жаргал, гуниг зовлон, амжилт ололт, уналт бүтэлгүйтлийг мэдрэн амьдардаг. Тэр бүхэн бидэнд маш бодитой мэт санагддаг.

Тэгвэл ХАМТДАА нэвтрүүлгийн өнөөдрийн дугаараар Др.Чарльз Стэнли бидэнд Бурханы үг бидний сэтгэл хөдлөл, бидний дотор төрдөг мэдрэмжээс ч илүү бодитой болохыг сануулан хэлж байна. “ҮНЭН ТАНЫГ ЧӨЛӨӨЛНӨ” хэмээх энэхүү цувралаар дамжуулаад Др.Стэнли бидэнд Христэд итгэгчид бид гэм нүглийн хүлээсийг ялан дийлж, баяр хөөр, урам зоригтой амьдралаар амьдрах нууцыг танилцуулж байгаа билээ.

Компьютерүүд гаднаас нь харахад бүгд адилхан мэт харагддаг ч өөр хоорондоо харилцан адилгүй байдаг. Учир нь тухайн компьютерт суулгасан программуудын улмаас компьютерүүд харилцан адилгүй байдаг. Тэгвэл Христэд итгэгчид бид ч бас гаднаа төстэй харагдаж байж болох ч бидний дотор буй програм бидний амьдралд хандах хандлага болон амьдралаа авч явах арга замд нөлөөлдөг болохыг сануулж байна. Учир нь Бурханы үнэнийг зүрх сэтгэл оюун санаандаа шингээсэн итгэгчид болон сэтгэл хөдлөл, өнгөрсөн амьдралдаа хөтлөгдсөн итгэгчдийн үг яриа, үйл хөдлөл хоорондоо тэнгэр газар шиг ялгаатай байдаг ажээ. Ингээд хамтдаа Бурханы үнэн биднийг хэрхэн чөлөөлдөг талаар үргэлжлүүлэн суралцацгаая.

“Есүс харин завины хитэгт дэрлэн дээр унтаж байлаа. Тэд Түүнийг сэрээж, Түүнд

—Багш аа, бидний сүйрэх нь Танд хамаагүй гэж үү? гэлээ. Есүс сэрээд, салхийг зандарч, нуурт

—Чимээгүй. Намд гэж хэлэв. Салхи зогсож бүр нам гүм болов.” ‭‭Марк‬ ‭4‬:‭38‬-39‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬

Амьдралын догшин хар шуурга чамайг хуу хамах үед, хамаг чадлаараа хичээсэн ч үл ойшоогдох үед, бухимдан шаналах бүрт чинь Бурхан чамайг анхааран халамжилж, санаа тавьдаг гэдгийг санаарай.

Христэд итгэгч маш олон хүмүүс өөртөө төрж буй мэдрэмжиндээ хөтлөгдөн амьдардаг. Тэд өөрсдийгөө Бурханы дүр төрхийн дагуу бүтээгдсэн гэдгийг мэддэг ч өөрсдийгөө үнэ цэнгүй гэсэн мэдрэмжинд автан амьдардаг. Хэдийгээр Бурхан биднийг хайрладаг гэдгийг тэд толгойдоо мэддэг ч үл хайрлагдсан нэгэн мэт мэдрэмжинд автан амьдардаг.

Тэгвэл ХАМТДАА нэвтрүүлгийн өнөөдрийн дугаараар Др.Стэнли бидэнд мэдрэмжиндээ хөтлөгдөн амьдрах нь бидний амьдралыг хэрхэн хүлээсэнд оруулдаг болохыг тайлбарлаж өгөх болно. Харин бид Бурханы үнэнээр дамжуулан эрх чөлөөтэй болох үедээ сая Бурханаас бидэнд бэлдсэн гайхамшигтай бүрэн дүүрэн амьдралаар амьдарч чаддаг ажээ. Тиймээс бид өөрсдийн дотор төрж буй мэдрэмжийг дарж, Бурханы хувиршгүй үгнээс зуурч, итгэлийн амьдралдаа баяр хөөр, урам зоригоор дүүрэн амьдрах учиртай юм. Энэ болон өөр олон чухал зүйлсийг Др.Стэнли бидэнд өнөөдөр хэлж өгөх болно.

Та нэг зүйлийг төсөөлөөд үзээрэй. Нэгэн залуу хүү нэгэн томоохон хотод амьдардаг байжээ. Гэвч түүний цалин маш бага учраас арай ядан амьдралаа авч явдаг байжээ. Түүнд энэ нөхцөл байдлаасаа гарах ямар ч найдвар байсангүй. Тиймээс тэр аажмаар цөхөрч, сэтгэлээ унасаар байв. Гэтэл тэр нэгэн өдөр гэнэт маш чухал мэдээг хүлээж авсан байна. Тэр дэлхийд алдартай нэгэн одын хамаатан болохоо олж мэдсэн байна. Үүнийгээ олж мэдсэнээр амьдралыг харах түүний хараа эрс өөрчлөгджээ. Тэгээд тэр коллежид суралцаж, илүү дээр амьдралаар амьдрахаар тэмүүлж эхэлсэн байна. Тэгвэл юу энэ залуу хүүг өөрчлөгдөхөд хүргэсэн бэ? Түүний ур чадвар биш, нөхцөл байдал биш харин өөрийгөө харах хараа нь өөрчлөгдсөнөөр тэр амьдралаа өөрчилж чадсан юм.

Тэгвэл ХАМТДАА нэвтрүүлгийн өнөөдрийн дугаараар Др.Стэнли бидэнд өөрсдийгөө Бурханы үнэний дагуу харах нь ямар чухал болохыг сануулан хэлж өгөх болно. Бид өөрсдийгөө Бурханы хүүхдүүд гэдгээ ойлгож ухаарах үед энэ чухал ҮНЭН ТАНЫГ ЧӨЛӨӨЛӨХ БОЛНО.

Энэ үйлчлэлийг “Есүсийн төлөөх хүрэм” гэж нэрлэдэг. Ням гараг бүр пастор Эрик Дентон болон түүний багийнхан Калифорниагийн Риверсайдаас хөдөлж 80 орчим км зайг туулж, Лос Анжелесын гудамжин дахь орон гэргүй хүмүүст халуун хоол хүнс, дулаан хувцас аваачиж өгдөг байна. Тэдгээр орон гэргүй хүмүүсийн ихэнхийнх нь хувьд тэдний бэлэг үнэлж баршгүй үнэ цэнтэй юм.

Дуулал 51-р бүлэгт Давид хаан, “Харагтун, сэтгэлийн гүнд үнэн байхыг Та хүсдэг бөгөөд дотоод чанадад минь Та мэргэн ухааныг мэдүүлнэ” гэсэн байдаг. Үнэхээр Бурхан Өөрийн төгс мэргэн ухааныг бидний зүрх сэтгэл, оюун санааны гүнд гүн нэвчин уусаасай гэж хүсдэг.

Тэгвэл ХАМТДАА нэвтрүүлгийн өнөөдрийн дугаараар Др.Стэнли бидэнд “ҮНЭН ТАНЫГ ЧӨЛӨӨЛНӨ” хэмээх цуврал хичээлээ үргэлжлүүлэн заах болно. Өнөөдрийн хичээлээр Др.Стэнли Христэд итгэгчдийн анхаарлыг Христийн доторх тэдний байр сууринд хандуулах болно. Христэд итгэгчид бид өөрсдийгөө хэн болохыг бүрэн дүүрэн ойлгож ухаарах үедээ өөрсдийнхөө үнэ цэнийг өөр хэн нэгэн хүнээр тодорхойлуулах гэж оролдохоо больдог. Учир нь бид бүгд Христийн дотор Бурханы гэр бүлийн гишүүд юм. Энэ нь биднийг үгээр илэрхийлэхийн аргагүй үнэ цэнтэй болгодог. Тиймээс Др.Стэнлийн хичээлийг сонсох явцдаа энэ чухал үнэнийг та эргэцүүлэн бодоорой.

Бүхий л амьдралынхаа туршид эрх чөлөөнийхөө төлөө тэмцсэн хүмүүсийн түүх олон бий. Зарим хүмүүс эрх чөлөөнийхөө төлөө ажил хөдөлмөр, гэр бүл, амь амьдралаа хүртэл зориулдаг. Хэдийгээр асар их төлөөсийг төлсөн ч эрх чөлөөний төлөөх тэмцлээ тэд зогсоолгүй дарангуйллын эсрэг тэмцсэн байдаг.

Тэгвэл ХАМТДАА нэвтрүүлгийн өнөөдрийн дугаараас эхлэн биднийг гэм нүглийн хүнд ачаанаас чөлөөлөгдөхөд туслах зорилготой 10 хэсэгт цуврал хичээл эхэлж байна. Др.Стэнли энэхүү хичээлээрээ дамжуулан итгэлийн амьдралдаа баяр хөөр, ялалтаар цанган амьдарч буй тэр л итгэгчдэд хандан ярих болно. Ингээд хамтдаа “ҮНЭН ТАНЫГ ЧӨЛӨӨЛНӨ” гэсэн сэдвээр суралцацгаая.