In dals gronds musicants e cumponists grischuns ed idol per bleras musicantas e musicants è mort avant 35 onns.

El è senza dubi ina da las persunalitads impurtantas da la musica populara svizra e grischuna: Josias Jenny, il cumponist e musicant ch'è naschì ils 29 d'avrigl 1920 ad Arosa e mort avant 35 onns, ils 7 da november 1989 a Köniz. El ha sunà tar bleras chapellas da renum sco il «Berner Ländlerquartett» ed a partir dal 1955 fin il 1980 tar la chapella legendara «Zoge-n-am-Boge». El ha cumponì blers sauts enconuschents cun rassa e schlantsch e divers da quels tadlain nus oz: «En urchige Bündnerwalzer», «Muusig schpüele», «Dr Pfyffestopfer», ubain il «Aroser Schottisch».