Dëse Freideg, 11. Juli um 8 Auer owes, kann een zu Hesper am Park en Open-Air-Concert vum Orchestre de Chambre du Luxembourg kucke goen. Ënner der Leedung vum Jonathan Kaell begleede si ënner anerem och den Cellist Mathis Grisò. Um Programm Wierker vun David Popper, Ethel Smyth oder och Isaac Albeniz. D’Marie Trussart huet mam Dirigent ënnert anerem doriwwer geschwat, wat fir Challenges op en Orchester bei engem Open Air duerkommen.

Wien zu Lëtzebuerg op de Musekschoulen a Conservatoiren en Instrument léiert ass et gewinnt, reegelméisseg Prüfungen oder Examen ze maachen. Fir e puer geet dat awer net duer. Verschidde jonk Schüler:inne maachen och mat bei nationalen an internationale Museksconcoursen. Fir d'Maria Miteva, Enseignante fir Querflütt un der UGDA-Musekschoul, ass et wichteg, dat ze erméiglechen. Hir Schülerin Candice Diederich huet 10 Joer an huet scho mat 8 Joer bei internationale Concourse matgemaach. Viru Kuerzem huet hatt den zweete Präis bei der MOYSE Competition zu Sofia a Bulgarie gewonnen.

Déi jonk Schülerin an hir Enseignante verroden am Gespréich mam Marie Schockmel méi.

Et ass den Ofschloss vun engem Austauschprogramm tëschent dem Publikumsorchester vum Konzerthaus Berlin an dem Orchestre Place de l'Europe. Concerte ware geplangt an der Lëtzebuerger Philharmonie an am Konzerthaus um Gendarmenmarkt zu Berlin. Gëschter Owend war de leschte Concert an der däitscher Haaptstad. Duerch dëse Projet hat den Orchestre Place de l'Europe, kuerz OPE, d'Méiglechkeet fir seng éischt Tournée ze organiséieren.

All fënnef Sënner matenee verbannen - dat mécht een net bewosst an net all Dag. Beim nächste Concert vum Ensembel United Instruments of Lucilin an der Fondation Valentiny zu Rëmerschen de Sonndeg 13. Juli gëtt et net nëmmen Nei Musek vum US-Amerikaner Aaron Einbond ze genéissen, mee gläichzäiteg och ee 4-Gäng-Menü als Mëttegiessen. Dee gëtt op der Plaz zesummegestallt vun de Chefkäch Carlo Sauber an Thomas Murer an der Ekipp aus dem Bouneweger Lycée. Do gëtt de Carlo Sauber schonn zanter 28 Joer seng Passioun vum Kachen un déi méi Jonk weider.

Am Gespréich mam Marie Schockmel verroden de Chefkach an de Komponist, wéi et zu der aussergewéinlecher Kollaboratioun fir de Concert vu Lucilin koum, wat si bis elo iwwerrascht huet, a wat hinnen am meeschten dru gefält.

Um Programm stinn um Concert samschdes, den 5. Juli, Extraiten aus dem Georges Bizet senger Oper "Carmen", dem Wolfgang A. Mozart senger Oper "Le nozze di Figaro" an dem Georg Friedrich Händel senger Oper "Serse". Dëse Concert am Kader vum Festival Kinnekswiss loves... vun der Stad Lëtzebuerg ass de leschten Optrëtt vum Gustavo Gimeno als Chefdirigent vun de Lëtzebuerger Philharmoniker.

Den opus 100,7 an de radio 100,7 iwwerdroen de Summerconcert mat de Lëtzebuerger Philharmoniker e Samschdeg, 05. Juli um 9 Auer owes live vun der Kinnekswiss. De Concert ass duerno nach bis den 12. Juli hei an der Mediathéik disponibel.

Programm:

• Gioacchino Rossini (1792-1868):

Ouverture aus Guillaume Tell)

Cruda sorte aus L’Italiana in AlgeriDi tanti palpiti aus Tancredi

Ouverture aus Il barbiere di Siviglia

• Wolfgang Amadeus Mozart (1756-1791)

Voi che sapete aus Le nozze di Figaro

Strider sento la procella aus Lucio Silla

• Georg Friedrich Händel (1685-1759): Ombra mai fu aus Serse

• Léo Delibes (1836-1891): Duo des fleurs Sous le dôme épais aus Lakmé

• Emmanuel Chabrier (1841-1894): España

• Pablo Luna (1879-1942): De España vengo aus El niño judío

• Gerónimo Giménez (1854-1923): Me llaman la primorosa aus El barbero de Sevilla

• Georges Bizet (1838-1875): Habanera L’amour est un oiseau rebelle aus Carmen

• Leonard Bernstein (1918-1990): Ouvertur aus Candide

• George Gershwin (1898-1937): By Strauss, Arrangement vum Russell Warner

• Leonard Bernstein (1918-1990): Glitter and be gay aus Candide

• Frederick Loewe (1901-1988): I Could Have Danced All Night aus My Fair Lady, Arrangement vum Johnny Green

Interpreten

Chelsea Zurflüh, Sopran

Joyce DiDonato, Mezzosopran

Luxembourg Philharmonic

Gustavo Gimeno, Direktioun

Joyce DiDonato trëtt mat der frëndlecher Geneemegung vun Erato/Warner Classics op.

De CAPE, de Centre des Arts Pluriels Ettelbruck, huet de Programm fir d'Saison 25-26 virgestallt. An déi start mat enger neier visueller Identitéit, déi deen iwwerschaffte Fokus illustréiere soll. Am Mëttelpunkt soll vun elo un d'Communautéit esou wéi eng méi partizipativ Approche stoen. Dofir ginn niewent der gewinnter Offer nach Workshoppen an interaktiv Projeten ugebueden, déi d'Verbindung an den Dialog mat de lokale Gemeinschafte stäerke sollen. Eng offen, partizipativ a faarweg Visioun fir de 25. Jubiläum vum Kulturhaus ze feieren.

De Chouer vun der uni.lu organiséiert ee Concert de 6. Juli Nomëttes um 5 Auer an der Mäerteskierch zu Diddeleng. An deem Kader kollaboréiert den uni.lu Chouer mam Chouer vun der Universität des Saarlandes. Dirigent ass de musikaleschen Direkter an Dirigent vum uni.lu Chouer Thomas Gareau. 

Um Programm steet Musek vu Komponisten déi aus dem “Norde” kommen. Et ass A Capella Musek an och Musek zesumme mat Orchester. D’Orchestermusek ass virun allem vu folgende Komponisten: Ola Gjeilo, Morten Lauridsen, Karl Jenkins, Johan Svendson, and Edvard Grieg.

Am Ganze wäerte bei dësem Concert méi wéi 100 Stëmme sangen, zesumme mam Orchester Con Nov’arco.

Den Entrée ass fräi, an eng Donatioun ass erwënscht.

Den Thomas Gareau verréit am Gespréich mam Marie Schockmel méi.

Wéi kritt ee méi wéi Dausend Kanner dozou zesummen ze sangen? Op déi Fro huet d'Martina Maenichetti méi wéi eng Äntwert. Si schafft schonn zanter Joren als Pädagogin an der Philharmonie a gëtt hir Passioun fir d'Musek dagdeeglech un déi méi Jonk weider.

Bei hirem neiste Projet Lëtz Sang hu sech 1.200 Kanner am grousse Sall an der Philharmonie getraff, fir zesumme mat de Lëtzebuerger Philharmoniker an der Sängerin Tali ze sangen. Wéi dat Ganzt verlaf ass, wat dee gréissten Challenge war, an ob esou änlech Eventer scho fir d'Zukunft geplangt sinn, alles dat verréit d'Martina Menichetti am Gespréich mam Marie Schockmel.

Den OPUS KLASSIK ass een däitsche Musekspräis fir Perséinlechkeeten a Produktionen aus dem Beräich vun der klassescher Musek. Gëschter (25.6.) gouf bekannt, wien alles gewonnen huet. Mat dobäi ass och ee Lëtzebuerger Vibrafonist. An der Kategorie Neue Klassik/ Neoklassik gewënnt de Pascal Schumacher zesumme mat der däitsch-griichescher Pianistin Danae Dörken, an dat mat hirem éischte gemeinsamen Album “Glass Two”. 2012 hat de Pascal Schumacher schonn en ECHO Jazz gewonnen. Dat war de Virleefer vum OPUS-KLASSIK-Präis.

Den 12. Oktober wäert déi grouss Präisiwwerreechung dann zu Berlin am Konzerthaus sinn - an do moderéiert erëm, wéi d’lescht Joer och schonn, d’Désirée Nosbusch.

De Pascal Schumacher verréit am Gespréich mam Marie Schockmel, wéi d'Danae Dörken an hie reagéiert hunn op d'Nouvelle vum Präis.

An engem opus 100,7-Interview hat den Duo och iwwer hiren Album geschwat.

D'Museker:inne vum Lëtzebuerger Ensembel fir nei Musek United Instruments of Lucilin maachen aktuell eng Residenz an der Fondation Valentiny zu Rëmerschen. Den 29. Juni proposéiere si e Concertsdag ganz ronderëm de Motto Musique + Equilibre. Um Programm steet Nei Musek vu ville verschiddene Komponisten. Am Mëttelpunkt steet den John Cage, ee vun de berüümtste Komponisten aus dem 20. Joerhonnert. Den Olivier Sliepen ass Saxophonist bei Lucilin an ee grousse Fan vum Cage a senger Musek. Wann hien d'Chance gehat hätt, den Amerikaner kennenzeléieren, da wier hie gär zesumme mat him an de Bësch spadséiere gaangen, Champignone sammelen a si hätten duerno zesummen eng Champignonszopp gekacht. Dat a villes méi verréit de Saxophonist dem Marie Schockmel am Gespréich.