Den CSV-Deputéierte Jean-Paul Schaaf huet den 22. Juli 2025 dorop higewisen, datt 5 Prozent vun de Schüler:innen am Conservatoire du Nord hir Coursë wärend dem Schouljoer ofbriechen. Dat féiert zu Onkäschte vu ronn enger hallwer Millioun. Dofir fuerdert de Jean-Paul Schaaf (Éischte Schäffe vun Ettelbréck a President vum SYVICOL - Syndicat intercommunal des villes de Diekirch et d’Ettelbruck pour l’organisation et la gestion d’un établissement musical) an der zoustänneger Chamberkommissioun finanziell Hëllefe vum Staat. Dat am Kader vun der geplangter Evaluatioun vum Gesetz, dat zënter September 2022 gratis Musekscoursen hei am Land erméiglecht. Wéi et am Communiqué vun der Chamberkommissioun fir Educatioun heescht, briechen zanterhier “tëschent 2,5 an 10 Prozent vun de Schüler:innen, jee no Schoul oder Conservatoire, de Cours am lafende Schouljoer of”.

Mee wéi gesäit et an anere Musekschoulen aus?

Op sengem Summerconcert spillt den Orchestre National des Jeunes du Luxembourg Beethoven, Schnittke a Mozart. Invitéiert gëtt och bei dësem Projet e bekannte Solist. Dës Kéier steet den Orchester mam Felix Klieser op der Bün. Den däitschen Hornist ass nieft sengem musikaleschen Talent och dofir bekannt, datt hien de Cor ganz anescht spillt wéi aner Hornisten. Hie gouf ouni Äerm gebuer an huet dofir geléiert d'Ventiller mam lénkse Fouss ze bedéngen. En aussergewéinleche Solist fir d'Saison 24/25 ofzeschléissen!

De Concert ass Samschdeg, de 26. Juli 2025 am Mierscher Theater. D'Opnam vun dësem Concert ass bis de 25. August 2025 disponibel.

Programm:

Ludwig van Beethoven: Ouverture aus der Oper "Fidelio"

Wolfgang Amadeus Mozart: Concerto fir Cor an Orchester Nr. 4 a Mi bémol Majeur, KV 495

Alfred Schnittke: Moz-Art à la Haydn

Ludwig van Beethoven: Sinfonie Nr. 7 a La Majeur, op.92

Interpreten:

Felix Klieser, Cor

Orchestre National des Jeunes du Luxembourg (ONJ)

Pit Brosius, Direktioun

4 Fotografen a Fotografinne suerge wärend der Saison vun der Philharmonie dofir, dass all Concert, all Event op Bild festgehale gëtt. Mëttlerweil sinn esou eng 108.000 Fotoen entstanen, aus deenen ee lo am Kader vum 20. Anniversaire déi 40 monumentaalst ausgestallt goufen. De Lex Kauffmann vum opus huet een Tour duerch d'Ausstellung gemaach an e puer Anekdoten zu de jeeweilege Biller opgeschnaapt.

Virun zwee Joer war de Skalljö Sommarorkester schonn eemol op Besuch zu Lëtzebuerg. Dëse Freideg, de 25. Juli zitt et si da fir ee weidere Concert an de Park vun der Villa Vauban fir ee Concert de midi.

De Skalljö Sommarorkester ass eng schweedesch Formatioun, déi sech 2013 gegrënnt huet. Nach haut trieden déi haaptberufflech Profimuseker:innen all Summer bei enger Tournée duerch Europa op, bäi där si weise wëllen, wéi ënnerhalsam klassesch Musek ka sinn.

Egal ob beim Eraussiche vum Programm oder der Location vum Concertsevent. Si soen: "Museker musse schaffen a sech ëmmer nees Neies ausdenken, fir d'Leit ze erreechen. Wann dat net geléngt, ass et de Museker:innen hir Schold."

Och wärend der Summervakanz bitt den opus 100,7 ronderëm d'Auer Concerten u fir nozelauschteren oder live matzeerliewen. De Lex Kauffmann mécht een Iwwerbléck vun all de Concerten, déi deemnächst op der Antenn wéi och an der Mediathéik vum opus 100,7 ze héiere sinn. Den Highlight: E Samschdeg iwwerdroe mir e Concert live aus dem Mierscher Theater mam Orchestre National des Jeunes du Luxembourg an dem Solist Felix Klieser.

Den 20. Juli kann een e ganz besonnesche Velostuer maachen. De Start ass op der Mierscher Gare, an a puer Etappe fiert een op Schëndels, Mamer, Kohler a Péiteng. Bei all Statioun kann een e Concert mat Musek vum Johann Sebastian Bach lauschteren. De Rosch Mirkes, President vun der Bach-Vereenegung Lëtzebuerg huet mam Marie Trussart iwwer de Programm geschwat an ënner anerem verroden, wéi de Projet entstanen ass.

Hanner den Téin ass ee Podcast iwwer zäitgenëssesch Musek mam Pit Brosius. Den Dirigent trefft sech mat Musekerinnen a Museker a wëll vun hinne wëssen, wat si an hirem Liewe beweegt an un der Neier Musek inspiréiert. Et entsteet eng Aart Schnuppercours mat kuerze musikalesche Beispiller a vill spannend Anekdoten.

Am mëttlerweil siwenten Episod ass d’Geiistin Sandrine Cantoreggi op Besuch. De virtuose Klang vun der Gei ass eis duerch de groussen a klassesche Repertoire bekannt. Op virun engem Orchester oder méi intim bei der Kammermusek, d'Gei gëtt gäre ganz villsäiteg agesat. Wéi se an der Neier Musek vun haut ka kléngen, erkläert d'Geiistin Sandrine Cantoreggi an dësem neien Episod.

Genee wéi säi Papp, ass och den Olivier Nilles Bariton-Sänger. Hien ass Mëtt 20, nach am Studium, an elo um Wee fir eng professionell Karriär opzebauen. Säin Debut an der Liederhalle zu Stuttgart ass den 19. Juli, wou hien zesumme mam Brenzhaus Orchester optrëtt. Um Programm stinn dräi Lieder vum Schubert, ënner anerem och an enger verschaffter Versioun vum Wolfgang Rihm - e Komponist, mat deem den Olivier Nilles scho perséinlech geschafft huet. Et ass och net säin éischten Optrëtt mam Brenzhaus Orchester, wéi et den Olivier Nilles am Interview mam Christophe Mirkes verréit.

Och wa vill Concertshaiser an d'Summerpaus ginn, bitt den opus 100,7 ronderëm d'Auer Concerten u fir nozelauschteren. De Lex Kauffmann mécht een Iwwerbléck vun all de Concerten, déi deemnächst op der Antenn wéi och an der Mediathéik vum opus 100,7 ze héiere sinn.

“Mosella” ass e Gedicht iwwer d'Musel, geschriwwe vum réimeschen Dichter Decimius Magnus Ausonius. Deen huet sech schonn deemools am 4. Joerhonnert mat Tréier a Lëtzebuerg gutt auskannt. Den Dënschdeg, 15. Juli, kritt deen historeschen Text zu Éinen en neit Liewen an enger Liesung vum Lex Roth, mat passender Musek gespillt vum Ensemble Vocal Sainte Cécile. Dat am Kader vum Éiner Wënzerdag, en traditionelle Rendez-vous fir dat kulturellt Ierwe vum Duerf ze éieren.

Wéi d'Anne Berna vum Ensemble Vocal Sainte Cécile verréit, ass de Grupp fest verankert zu Éinen. Déi musikalesch Liesung ass organiséiert vum Joseph Groben, deen eng grouss Passioun fir d'Miseler Regioun huet. Si zwee verroden am Gespréich mam Marie Schockmel méi.