កម្ពុជា​នឹង​រៀបចំ​ការ​បោះឆ្នោត​ថ្នាក់​ជាតិ នាថ្ងៃទី២៣ ខែកក្កដា ឆ្នាំ២០២៣ ខាងមុខ។ អ្នកស្រី ប្រុក វ៉ាន្នី ប្រធាន​គណៈកម្មាធិការ​ដោះស្រាយ​វិវាទ និង​វិន័យ​របស់​គណបក្ស​ប្រជាធិបតេយ្យ​មូលដ្ឋាន​ បាន​ថ្លែង​ថា​ អ្នកស្រី​បារម្ភ​អំពី​ជម្លោះ​នយោបាយ​កើត​ឡើង​នៅ​មុន​ការ​បោះឆ្នោត​ថ្នាក់​ជាតិ​នា​ពេល​ខាង​មុខ៕ (ស៊ុន ណារិន, Hello VOA, ភ្នំពេញ, ៨ ធ្នូ ២០២២)

អ្នក​ជំនាញ​ខាង​សារព័ត៌មាន​ឯករាជ្យ​នៅ​កម្ពុជា លើក​ឡើង​ថា​ ការ​ដោះស្រាយ​បញ្ហា​និទណ្ឌភាព​លើ​ឧក្រិដ្ឋកម្ម​ប្រឆាំង​អ្នក​សារព័ត៌មាន​នៅ​កម្ពុជា ទាមទារឱ្យ​មាន​តុលាការ​និង​មន្ត្រី​អនុវត្ត​ច្បាប់​ដែល​ឯករាជ្យ​ហើយ​ឈរ​លើ​គោលការណ៍​យុត្តិធម៌ ដោយ​មិន​ពុករលួយ​ឬ​បក្សពួកនិយម។ លោក​ ណុប វី នាយក​ប្រតិបត្តិ​នៃ​សមាគម​សម្ព័ន្ធ​អ្នក​សារព័ត៌មាន​កម្ពុជា​បាន​ថ្លែង​បែប​នេះ​ក្នុងបទ​សម្ភាសន៍​នៅ​ក្នុង​កម្មវិធី«វិជ្ជាជីវៈ​សារព័ត៌មាន​សំខាន់»កាល​ពី​ថ្ងៃ​ចន្ទទី​២៨​ ខែ​វិច្ឆិកា​ ​ឆ្នាំ​២០២២។ សូម​លោក​អ្នក​ស្តាប់​បទ​សម្ភាសន៍​នេះ​ដូច​តទៅ៖

ពលករ​កម្ពុជា​យ៉ាងហោចណាស់​ជាង​មួយ​លាន​នាក់​ បាន​និង​កំពុង​ធ្វើ​ចំណាក​ស្រុក​ទៅ​ធ្វើការ​នៅក្រៅ​ប្រទេស។ ពលករ​ចំណាក​ស្រុក​ខ្មែរ​ភាគ​ច្រើន​ធ្វើ​ការ​ក្នុង​វិស័យ​កសិកម្ម​សំណង់​អ្នក​បម្រើ​តាម​ផ្ទះ​សេវាកម្ម​ឧស្សាហ​កម្ម​ផលិតកម្ម​ និង​ចិញ្ចឹម​សត្វ។​ ពួក​គេ​ភាគ​ច្រើន​ទទួល​បាន​ប្រាក់​ចំណូល​មិន​គ្រប់គ្រាន់ ​ហើយ​ជាប់​បំណុល​ធនាគារ។​ លោក​ ប៉ាល់ ចំរើន អ្នកស្រាវជ្រាវ​ជំនាញ​ផ្នែក​សុខភាព​សាធារណៈ​ថ្លែង​ក្នុង​កម្មវិធី Hello VOA ស្តី​ពី​ពលករ​ចំណាក​ស្រុក​ថា ភាគ​ច្រើន​នៃ​ពលករ​ចំណាក​ស្រុកខ្មែរ​មាន​ជំងឺ​ផ្លូវ​ចិត្ត ដោយសារបរិយាកាស​រស់នៅ និង​សម្ពាធ​ការងារ។​ (អ្នកនាង កាន់ វិច្ឆិកា, ភ្នំពេញ, ២៤ វិច្ឆិកា ២០២២)

កម្ពុជា​កំពុង​ធ្វើ​ជា​ម្ចាស់​ផ្ទះ​នៃ​កិច្ច​ប្រជុំ​កំពូល​អាស៊ាន ​ដែល​ចាប់​ផ្តើម​ជាផ្លូវការ​កាល​ពី​ថ្ងៃ​សុក្រ​ ហើយ​នឹង​បញ្ចប់​នៅ​ថ្ងៃ​អាទិត្យ​នេះ។ ​កិច្ច​ប្រជុំ​នេះ​ក៏​មាន​ការ​ចូលរួម​ពី​មេ​ដឹកនាំ​ពិភព​លោក ​ក្នុង​នោះ​ក៏​មាន​ប្រធានាធិបតី​អាមេរិក​ លោក​ Joe Biden ​ផងដែរ។ លោក​បាន​ជួប​ជាមួយ​លោក​នាយករដ្ឋមន្រ្តី ​ហ៊ុន សែន ​កាលពី​ល្ងាច​ថ្ងៃ​សៅរ៍។​ ត​ទៅ​នេះ ​សូម​ស្តាប់​កិច្ច​សន្ទនា​រវាងអ្នកនាង ​កាន់ វិច្ឆិកា ​និង​លោក ​ស៊ុន ណារិន ​ដែល​បាន​តាម​ដាន​កិច្ច​ប្រជុំ​នេះ​នៅ​រាជធានី​ ភ្នំពេញ៖​

លោក​ Joe Biden (ចូ បៃដិន) ​ប្រធានាធិបតី​អាមេរិក​បាន​ធ្វើ​ដំណើរមក​ដល់​កម្ពុជា​ ហើយ​ដើម្បី​ចូលរួម​កិច្ច​ប្រជុំ​កំពូល​អាមេរិក-អាស៊ាន​ ដូច​មេ​ដឹក​នាំ​ពិភព​លោក​ផ្សេង​ទៀត​ និង​លោក​អគ្គលេខាធិការ​អង្គការ​សហ​ប្រជាជាតិ​ផង​ដែរ។ កិច្ច​ប្រជុំ​ទាំងនេះ​រំពឹង​ថា ​នឹង​ពិភាក្សា​លើ​បញ្ហា​ប្រឈម​ក្នុង​តំបន់​ និង​សាកល។ ​លោក​ សុខ ខេមរា​ នៃ​វីអូអេ​ដែល​កំពុង​ចុះ​យក​ព័ត៌មាន​ផ្ទាល់​នៅ​ក្នុង​ពេល​កិច្ច​ប្រជុំ​កំពូល​អាស៊ាន​ និង​កិច្ច​ប្រជុំ​កំពូល​ពាក់ព័ន្ធ​ ជូន​កិច្ច​សន្ទនា​ជាមួយ​អ្នក​នាង​ កាន់​ វិច្ឆិកា​ ដូចតទៅ៖

ប្រធានាធិបតីសហរដ្ឋ​អាមេរិក​លោក Joe Biden ​នឹង​ចូលរួម​កិច្ច​ប្រជុំ​កំពូល​ជាមួយ​នឹង​មេដឹកនាំ​អាស៊ាន​ដែល​រៀបចំ​នៅ​រាជធានី​ភ្នំពេញ​នៅ​ថ្ងៃសៅរ៍​នេះ។ ក្នុង​នោះ​ដែរ​ក៏​នឹង​លោក​ប្រធានាធិបតី​ក៏​នឹង​ជួប​ពិភាក្សា​ទ្វេភាគី​ជាមួយ​នឹង​លោក​ ហ៊ុន សែន​ នាយក​រដ្ឋមន្ត្រី​កម្ពុជា​ក្នុង​ឋានៈ​ជា​ប្រធាន​ប្តូរវេន​សមាគម​អាស៊ាន។ នេះ​បើ​តាម​ការ​បញ្ជាក់​របស់​មន្ត្រី​សហរដ្ឋ​អាមេរិក។​ លោក​សម រង្ស៊ី​ប្រធាន​ស្តីទី​គណបក្ស​សង្គ្រោះ​ជាតិ​ដែល​កំពុង​រស់​នៅ​និរទេស​ខ្លួន​ក្រៅ​ប្រទេស​ទទូច​ឲ្យ​លោក ​Biden ​ផ្តោត​លើការ​នាំ​យក​លទ្ធិ​ប្រជាធិបតេយ្យ​ត្រឡប់​មក​កម្ពុជា​វិញ​និង​រក្សា​ការពារ​អធិបតេយ្យ​របស់​កម្ពុជា​ទល់​នឹង​ការពង្រីក​ឥទ្ធិពល​កាន់តែ​ធំ​របស់​មហាអំណាច​ចិន។ លោក ម៉ែន គឹមសេង​ នៃ​វីអូអេ​បាន​សម្ភាស​លោក សម រង្ស៊ី​ នៅ​ថ្ងៃសុក្រ​នេះ​ដូចតទៅ៖

រយៈពេល​ជិត​ ៥ ឆ្នាំ​ហើយ​ដែល​លោក ជា ជីវ ​អតីត​ប្រធាន​ប្រតិបត្តិ​ប្រចាំ​ខេត្ត​បាត់ដំបង​របស់​គណបក្ស​សង្រ្គោះ​ជាតិ​ ត្រូវ​បាន​កាត់​ផ្តាច់​សិទ្ធិ​នយោបាយ​ ក្រោយ​តុលាការ​កំពូល​បានរំលាយ​គណបក្ស​នេះ។ ទោះជា​យ៉ាងណា លោក​បាន​បន្ត​ស្នាក់​នៅ​ក្នុង​ប្រទេស​ ទោះ​រង​ការ​ធ្វើ​ទុក្ខ​បុក​ម្នេញផ្នែក​នយោបាយ​ក៏​ដោយ។ ប៉ុន្តែ​ពេល​នេះ លោក​បាន​សម្រេចចាក​ចេញ​ទៅ​ក្រៅ​ប្រទេស ហើយ​បាន​សុំសិទ្ធិ​ជ្រក​កោន​នយោបាយ ដោយសារ​ក្តី​បារម្ភ​អំពី​សុវត្ថិភាព​និង​ការ​ចាប់​ខ្លួន។ នៅ​ក្នុង​បទ​សម្ភាសន៍​មួយ​ជាមួយ​វីអូអេ​កាល​ពី​ថ្ងៃ​ទី​១៩ ខែ​សីហា ឆ្នាំ​២០២២ លោក​ថ្លែង​ថា​ លោក​មិន​ចង់​ចាក​ចេញ​ពី​ស្រុក​កំណើត​ឡើយ។ លោក​បញ្ជាក់​ថា៖ «វត្ថុ​និង​គោល​បំណង​របស់​ខ្ញុំ​មិន​ចង់​ឆ្ងាយ​ពី​ទឹក​ដី​កំណើត​របស់​ខ្ញុំ​ទេ។ ខ្ញុំ​ចង់​ចូល​រួម​ក្នុង​ជីវភាព​នយោបាយ។ ខ្ញុំ​មាន​បំណង​ជួយ​ប្រជាពលរដ្ឋ​នៅ​ទឹក​ដី​ខេត្ត​បាត់ដំបង​របស់​ខ្ញុំ ដែល​ខ្ញុំ​បាន​បំពេញ​កិច្ច​ការងារ​ជាង​រយៈពេល​ ២០ ​ឆ្នាំ​កន្លង​មក​នេះ»៕

តំណាង​សភា​ពាណិជ្ជកម្ម​អាមេរិក​ប្រចាំកម្ពុជា​ (AmCham Cambodia) កាល​ពី​ពេល​ថ្មីៗ​នេះ បាន​បំពេញ​ទស្សនកិច្ច​នៅ​រដ្ឋធានី​វ៉ាស៊ីនតោន ជា​ផ្នែក​មួយ​នៃ​ក្រុម​ប្រតិភូ​សភា​ពាណិជ្ជកម្មអាមេរិក​ប្រចាំ​តំបន់​អាស៊ី​ប៉ាស៊ីហ្វិក ដើម្បី​ជួប​ជាមួយ​អ្នក​មុខ​អ្នក​ការ​អាមេរិកាំង និង​ឈ្វេង​យល់​បន្ថែម​ពី​គោល​នយោបាយ​របស់​រដ្ឋាភិបាល​អាមេរិក​ទាក់​ទង​នឹង​ក្របខ័ណ្ឌ​សេដ្ឋកិច្ច​ឥណ្ឌូ​ប៉ាស៊ីហ្វិក​និង​តំបន់​អាស៊ីអាគ្នេយ៍។ លោក សាយ មុន្នី នៃ​វីអូអេ បាន​សម្ភាសន៍​លោក Anthony Galliano ប្រធាន​សភា​ពាណិជ្ជកម្ម​អាមេរិក​ប្រចាំកម្ពុជា អំពី​ដំណើរ​ទស្សនកិច្ច​នៅ​ខែ​កក្កដា និង​ទំនាក់ទំនង​ពាណិជ្ជកម្ម​រវាង​សហរដ្ឋ​អាមេរិក​និង​កម្ពុជា​ ដូច​តទៅ៖

អ្នក​ដឹកនាំ​ក្រុម​អ្នក​សារព័ត៌មាន​ឯករាជ្យ​នៅ​កម្ពុជា លើក​ឡើង​ថា​គោល​បំណង​នៃ​ការធ្វើ​វិសោធនកម្ម​រដ្ឋធម្មនុញ្ញ​កម្ពុជា​លើក​ទី​១០ គឺ​ដើម្បី​បម្រើ​ផល​ប្រយោជន៍​គណបក្ស​នយោបាយ ច្រើន​ជាង​បម្រើ​ផល​ប្រយោជន៍​ជាតិ​ទាំង​មូល។​ លោក​ ណុប វី នាយក​ប្រតិបត្តិ​នៃ​សមាគម​សម្ព័ន្ធ​អ្នក​សារព័ត៌មាន​កម្ពុជា​បាន​ថ្លែង​បែប​នេះ​ក្នុងបទ​សម្ភាសន៍​នៅ​ក្នុង​កម្មវិធី«វិជ្ជាជីវៈ​សារព័ត៌មាន​សំខាន់»ដែល​ជា​កម្មវិធី​ថ្មី​មួយ​របស់​វីអូអេកាល​ពី​ថ្ងៃ​អង្គារទី​១៩​ខែ​កក្កដាឆ្នាំ​២០២២។ សូម​លោក​អ្នក​ស្តាប់​បទ​សម្ភាសន៍​នេះ​ដូច​តទៅ៖

នាយក​ផ្នែក​ប្រព័ន្ធ​ផ្សព្វផ្សាយ​នៃ​មជ្ឈមណ្ឌល​កម្ពុជា ​ដើម្បី​ប្រព័ន្ធ​ផ្សព្វផ្សាយ​ឯករាជ្យ​ (CCIM) លោក អ៊ិត សូធឿត ថ្លែង​ថា ​ច្បាប់​ស្តីពី​សិទ្ធិ​ទទួល​ព័ត៌មាន​មាន​សារៈសំខាន់​សម្រាប់​ប្រជា​ពលរដ្ឋជាពិសេស​អ្នក​សារ​ព័ត៌មាន​ក្នុង​ការ​ទទួល​បានព័ត៌មាន​ ដើម្បី​ធ្វើ​សេចក្តី​រាយការណ៍​បែប​ស៊ី​ជម្រៅស្តី​ពី​ដំណើរ​ការ​អភិវឌ្ឍ និង​អភិបាល​កិច្ច​នៅ​ក្នុង​សង្គម។ តទៅ​នេះ​សូម​ស្តាប់​កិច្ច​សម្ភាសន៍​រវាង​លោក ណឹម សុភ័ក្រ្តបញ្ញា ដែល​រាយការណ៍ឲ្យវីអូអេ​ពី​រាជធានី​ភ្នំពេញ​ ជាមួយ​លោក​ អ៊ិត សូធឿត នាយក​ផ្នែក​ប្រព័ន្ធ​ផ្សព្វផ្សាយ​នៃ​មជ្ឈមណ្ឌល​កម្ពុជា ​ដើម្បី​ប្រព័ន្ធ​ផ្សព្វផ្សាយ​ឯករាជ្យ​ដូច​តទៅ៖