អ្នកស្រី​ មូរ សុខហួរ​ ដែល​ធ្លាប់ជា​អនុប្រធានគណបក្ស​សង្គ្រោះ​ជាតិ​ បាន​លាលែង​ពី​គណបក្ស​ប្រឆាំងនេះមក​ដឹកនាំ​ចលនា​នយោបាយ​មួយ​ ក្នុង​គោលបំណង​ស្តារ​ដំណើរការ​លទ្ធិ​ប្រជាធិបតេយ្យ​នៅ​កម្ពុជា​ដែល​បាន​ធ្លាក់​ចុះ​ជាបន្តបន្ទាប់។ «ចលនា​ខ្មែរ​ដើម្បី​ប្រជាធិបតេយ្យ​»​នឹង​ចាប់​ផ្តើម​ដំណើរការ​ជា​ផ្លូវការនៅ​ថ្ងៃ​ទី​២៣ ខែ​មីនា នៅ​ទីក្រុង Long Beach រដ្ឋ California​ ដោយ​ប្រមូល​ផ្តុំ​សហគមន៍​ខ្មែរ​ទាំង​អស់​នៅ​ក្រៅ​ប្រទេស​មក​ធ្វើការ​ជាមួយ​គ្នា។ អ្នកស្រី មូរ សុខហួរ ​ជឿជាក់​ថា ​សហគមន៍​ខ្មែរ​ មាន​សំឡេង​ដែល​អាច​ប្រើ​សម្រាប់​អប់រំ​សហគមន៍​អន្តរជាតិ​អំពី​បញ្ហា​ប្រឈម​ដែល​ប្រជា​ពលរដ្ឋ​កម្ពុជា​ជួប​ប្រទះ​ជារៀងរាល់​ថ្ងៃ​ក្នុង​មាតុភូមិ។ លោក​ ម៉ែន គឹមសេង​ នៃ​វីអូអេ​បាន​សម្ភាស​ អ្នកស្រី​ មូរ សុខហួរ​ អំពី​ចលនា​នេះ​ដូច​តទៅ៖

ពលរដ្ឋខ្មែរដែលមករស់នៅសហរដ្ឋអាមេរិកភាគច្រើនជ្រើសរើសយកទីក្រុងដែលមានសាច់ញាត្តិ និងជនជាតិខ្មែររស់នៅច្រើន ដើម្បីទទួលបានការគាំទ្រនិងការជួយយកអាសាផ្សេងៗ។ ទីក្រុងឡូវែលនៃរដ្ឋ Massachussetts មានសហគមន៍ខ្មែរធំបំផុតទី២នៅសហរដ្ឋអាមេរិក ហើយក៏ជាកន្លែងសំបូរសេវាកម្មបណ្តុះបណ្តាលចំណេះដឹងនិងជំនាញផ្សេងៗសម្រាប់ពលរដ្ឋខ្មែរផងដែរ។ ក្នុងចំណោមនោះ មជ្ឈមណ្ឌលអប់រំក្រុងឡូវែល បានចូលរួមពង្រឹងសមត្ថភាពនិងជីវភាពពលរដ្ឋខ្មែរជាច្រើនរួប។ លោក ពិន ស៊ីសុវណ្ណ នៃ VOA រាយការណ៍អំពីរឿងនេះ។

កាសែតខ្មែរប៉ុស្ដិ៍ (KhmerPost USA) ដែលបោះពុម្ពផ្សាយព័ត៌មានជាភាសាខ្មែរអំពីសហគមន៍ខ្មែរនៅសហរដ្ឋអាមេរិក គឺជាមោទនភាពមួយសម្រាប់ពលរដ្ឋខ្មែរអាមេរិកាំងនៅទីក្រុងឡូវែល រដ្ឋ Massachusetts។ ប៉ុន្តែដោយសារបញ្ហាទម្លាប់អាន និងសមត្ថភាពអានភាសាខ្មែរ កាសែតនេះបន្តដំណើរការយ៉ាងលំបាកក្នុងទីក្រុងដែលមានសហគមន៍ខ្មែរធំបំផុតទី ២ នៅសហរដ្ឋអាមេរិក។ លោក ពិន ស៊ីសុវណ្ណ នៃវីអូអេ រាយការណ៍លម្អិតពីទីក្រុងឡូវែល៕

នាព្រឹកថ្ងៃទី៨ ខែមីនានេះ ក្រុមអង្គការសង្គមស៊ីវិលដែលធ្វើការលើការលើកកម្ពស់សិទ្ធិស្ត្រី បានប្រមូលផ្តុំគ្នានៅទីលានប្រជាធិបតេយ្យ ដើម្បីប្រារព្ធទិវាអន្តរជាតិនារី ហើយបានលើកឡើងពីបញ្ហាប្រឈមនានាដែលបន្តកើតមានចំពោះស្ត្រីនៅក្នុងសង្គមកម្ពុជា។ ពួកគេក៏បានស្នើឱ្យរដ្ឋាភិបាលបន្តអនុវត្តគោលនយោបាយ និងធានាសិទ្ធិសេរីភាពសម្រាប់ស្ត្រី ក្នុងនោះក៏ជំរុញឲ្យបើកលម្ហសេរីភាពសម្រាប់ពលរដ្ឋផងដែរ។ លោក ស៊ុន ណារិន រាយការណ៍លម្អិតឱ្យវីអូអេពីរាជធានីភ្នំពេញ៕

កាលពីថ្ងៃព្រហស្បតិ៍ មេដឹកនាំនយោបាយជំទាស់លោក កឹម សុខា បានបង្ហាញខ្លួនជាលើកទី ៣ នៅក្នុងសាលសវនាការសាលាឧទ្ធរណ៍ភ្នំពេញ ទីដែលលោកត្រូវបានក្រុមប្រឹក្សាជំនុំជម្រះសួរអំពីការបង្កើតគណបក្សសិទ្ធិមនុស្សឈានដល់ការបង្កើតអតីតគណបក្សសង្គ្រោះជាតិ និងបដិវត្តន៍នៅប្រទេសយូហ្គោស្លាវី។ លោក ស៊ឹម ចាន់សំណាង រាយការណ៍ឲ្យវីអូអេពីរាជធានីភ្នំពេញ៕

កាលពីថ្ងៃចន្ទ អតីតគរុនិស្សិតម្នាក់ឈ្មោះ កែវ សុវណ្ណឫទ្ធិ ដែលត្រូវបានក្រសួងអប់រំ យុវជន និងកីឡា ផាត់ឈ្មោះចេញពីវគ្គបណ្តុះបណ្តាលគ្រូបង្រៀនកម្រិតមូលដ្ឋាន ឯកទេសអប់រំកាយ និងកីឡា បានតវ៉ាសាជាថ្មីទៀត ដោយធ្វើធម្មយាត្រានាំញត្តិទៅដាក់នៅក្រសួងអប់រំ ដើម្បីស្នើឱ្យពន្យល់ឱ្យបានជាក់ច្បាស់អំពីមូលហេតុនៅពីក្រោយការលុបឈ្មោះចេញពីវគ្គបណ្តុះបណ្តាលកាលពី៣ឆ្នាំមុន។ យុវជនមួយចំនួនទៀតដែលចូលរួមធម្មយាត្រានោះ ក៏បានស្នើឱ្យក្រសួងអប់រំដោះស្រាយសំណុំរឿងនេះឱ្យបានត្រឹមត្រូវ ដើម្បីបញ្ចៀសកុំឱ្យមានករណីស្រដៀងគ្នានេះកើតលើយុវជនផ្សេងទៀត។ លោក ហ៊ុល រស្មី រាយការណ៍លម្អិតឱ្យវីអូអេពីរាជធានីភ្នំពេញ៕

កើត​ក្នុង​របប​ប្រល័យ​ពូជសាសន៍​ខ្មែរក្រហម លោក វន សន្យាធរ៉ូ បាន​រៀបរាប់​អំពី​ដំណើរ​ជីវិត​ដ៏គួរ​ឱ្យកត់​សម្គាល់​របស់លោក​នៅ​ក្នុង​សៀវភៅ​ថ្មីមួយ​ចំណងជើងថា «ដំណើរ​របស់​ជនភៀសខ្លួន ឬ The Refugee Journey» ដែល​បាន​បោះពុម្ព​ផ្សាយកាល​ពី​ខែវិច្ឆិកា ឆ្នាំ២០២៣។ បន្ទាប់​ពី​រស់នៅក្នុង​ជំរំ​ចំនួន​ ៥ នៅ​តាមព្រំដែនថៃ-កម្ពុជា លោក វន សន្យាធរ៉ូ បាន​តាំង​ទី​លំនៅ​ថ្មី​នៅ​សហរដ្ឋ​អាមេរិក​ក្នុងឆ្នាំ ១៩៩២ នៅពេល​មាន​អាយុ ១៥ ឆ្នាំ ហើយ​មិនចេះ​ភាសា​អង់គ្លេសសោះ។ បច្ចុប្បន្ន ជនភៀសខ្លួនវ័យ ៤៧ឆ្នាំរូបនេះ បានរកឃើញភាពជោគជ័យក្នុងការបើកហាងនំដូណាត់និងកាហ្វេ ខណៈ​ធ្វើការងារ​សិល្បៈ​ក្នុង​ការ​ថតរូប និង​គំនូរ​ផងដែរ។ នៅក្នុង​បទសម្ភាសន៍​ជាមួយ លោក ចាប ចិត្រា នៃ​ VOA លោក វន សន្យាធរ៉ូ បាននិយាយថា៖ «ដោយសារ​តែ​ខ្ញុំ​រស់​នៅក្នុង​សេរីភាព​ក្នុងប្រទេសនេះ ទើប​ខ្ញុំ​អាច​សម្រេច​បាន​នូវ​ក្តី​សង្ឃឹម និង​ក្តីសុបិនរបស់ខ្ញុំ»។ លោកបន្ថែមទៀត​ថា វា​ជា​រឿង​សំខាន់​ដែល​មេដឹកនាំ​ជំនាន់​ថ្មី «​ពង្រីក​សេរីភាព​» ក្នុង​ប្រទេស​កម្ពុជា ដើម្បី​ឲ្យ​ «​អ្នក​មាន​ឬ​អ្នកក្រ​ហ៊ានឭសង្ឃឹម និង​ស្រមើស្រមៃ​ដើម្បី​ភាព​ប្រសើរ​នៃ​ប្រទេស​»​។ សូមលោកអ្នកនាង​ស្តាប់​បទសម្ភាសន៍​នេះដូចតួទៅ៖

នាយករដ្ឋមន្ត្រីកម្ពុជាលោក ហ៊ុន ម៉ាណែត បានជួបជាមួយនាយករដ្ឋមន្ត្រីថៃ លោក សេដ្ឋា ថាវីស៊ីន (Srettha Thavisin) ក្នុងដំណើរបំពេញទស្សនកិច្ចលើកដំបូងរបស់លោកនៅប្រទេសថៃ ដែលថ្នាក់ដឹកនាំបានជួបប្រជុំទ្វេភាគី និងផ្តល់សេចក្តីថ្លែងការណ៍រួមមួយ កាលពីថ្ងៃពុធ។ ទីភ្នាក់ងារព័ត៌មាន AFP បានរាយការណ៍ថា ក្នុងជំនួបនេះ លោក ហ៊ុន ម៉ាណែត បានថ្លែងអំណរគុណដល់លោក សេដ្ឋា ថាវីស៊ីន ចំពោះការចាប់ខ្លួនសកម្មជនកម្ពុជាបីនាក់របស់ថៃ កាលពីសប្តាហ៍មុន។ អ្នកនាង ទែន សុខស្រីនិត ប្រែសម្រួលសេចក្តីរាយការណ៍នេះ៕

កាលពីថ្ងៃអង្គារ សាលាឧទ្ធរណ៍បានបើកសវនាការលើបណ្តឹងសាទុក្ខរបស់មេដឹកនាំនយោបាយជំទាស់ លោក កឹម សុខា ក្នុងសំណុំរឿងក្បត់ជាតិដ៏ចម្រូងងចម្រាស។ មេធាវីការពារក្តីលោក កឹម សុខា ថាលោក កឹម សុខា ស្នើសុំឱ្យមានការបន្ធូរបន្ថយការឃុំខ្លួនរបស់លោក ដូចជាការជួបជាមួយអ្នកដទៃជាដើម។ លោក ស៊ឹម ចាន់សំណាង រាយការណ៍លម្អិតឱ្យវីអូអេពីរាជធានីភ្នំពេញ៕

កាលពីដើមខែមករា រដ្ឋបាលខេត្តពោធិ៍សាត់បានចេញសេចក្តីណែនាំឱ្យប្រជាកសិករផ្អាកការបង្កបង្កើនផលស្រូវក្នុងរដូវប្រាំង ដោយថា ប្រជាកសិករបាននាំគ្នាធ្វើស្រែប្រាំងកើនផ្ទៃដីជិត ២ដង នៃផែនការប្រើប្រាស់ទឹក ដែលមានន័យថា ទឹកក្នុងស្ទឹងនិងប្រឡាយមិនអាចផ្គត់ផ្គង់គ្រប់គ្រាន់។ កសិករ​មួយចំនួនប្រាប់វីអូអេថាពួកគេខាតបង់ថវិកា ខណៈបារម្ភអំពីបញ្ហាជំពាក់បំណុល ដោយសារខ្វះទឹកសម្រាប់ស្រោចស្រពស្រែ។ លោក ស៊ុន ណារិន រាយការណ៍ឲ្យវីអូអេពីខេត្តពោធិ៍សាត់៕