អមដោយការប្រគុំតន្ត្រីដ៏រំជួលចិត្តនិងកន្ត្រាក់អារម្មណ៍ ល្ខោន Cambodian Rock Band ឬក្រុមភ្លេងសម័យខ្មែរ បាននិងកំពុងទាក់ទាញទស្សនិកជនមកពីសហគមន៍ចម្រុះ រួមទាំងសហគមន៍ខ្មែរ នៅរោងល្ខោន Arena Stage ក្នុងរដ្ឋធានីរបស់សហរដ្ឋអាមេរិក។ ផលិតនិងសម្តែងជាលើកដំបូងកាលពីដើមឆ្នាំ ២០១៨ ល្ខោនដែលឈ្នះពានរង្វាន់ជាច្រើននេះ ត្រូវបានផ្អាកការសម្តែងរបស់ខ្លួន ក្នុងអំឡុងវិបត្តិជំងឺកូវីដ ១៩ អស់រយៈពេលជាង ៤ ឆ្នាំ។ នាពេលបច្ចុប្បន្ន ល្ខោននេះកំពុងចាប់ផ្តើមសន្ទុះនៃការសម្តែងដោយទទួលបានការពេញចិត្តនិងគាំទ្រខ្លាំងជាបន្តបន្ទាប់។ អ្នកនាង ទែន សុខស្រីនិត នៃវីអូអេ រាយការណ៍លម្អិតពីរដ្ឋធានីវ៉ាស៊ីនតោន៕

ប៉ៃលិន​ជា​តំបន់​សម្បូរ​រ៉ែ​ត្បូង​ដ៏ល្បី​នៅ​ប្រទេស​កម្ពុជា​កាលពី​សម័យ​ដើម ​និង​ជា​មូលដ្ឋាន​តស៊ូ​របស់​ក្រុម​ខ្មែរក្រហម​ដែល​សម្បូរ​ដោយ​មីន។ ​បច្ចុប្បន្ន​ក្រោយ​ពី​មីន​នៅ​តំបន់​នេះ​ត្រូវ​បាន​ដោះ​ចេញ​នោះ បរិមាណ​រ៉ែ​ត្បូង​ក៏​ចុះ​ថយ​ដែរ​ ហើយ​ប៉ៃលិន​ក្លាយ​ជា​តំបន់​ចម្ការ។​ លោក ​ហ៊ុល រស្មី​ សូមជូន​សេចក្តី​រាយ​ការណ៍​ពី​ក្រុង​ប៉ៃលិន ​ខេត្ត​ប៉ៃលិន​ដូច​ត​ទៅ៖

ដឹកនាំ​ដោយ​មន្ត្រី​គណបក្ស​សង្គ្រោះ​ជាតិ ពលរដ្ឋ​នៅ​ទីក្រុង Lowell រដ្ឋ Massachusetts និង​សកម្មជន​គណបក្ស​សង្គ្រោះ​ជាតិ​មកពី​រដ្ឋ​ផ្សេងៗ​ទៀត​បាន​ធ្វើ​បាតុកម្ម​ប្រមាណ​៣​ម៉ោង​ប្រឆាំង​ដំណើរ​ការបោះឆ្នោត​នៅ​កម្ពុជា​និង​រដ្ឋាភិបាល​ឈាម​ថ្មី​របស់​គណបក្ស​ប្រជាជន​កម្ពុជា​ដែល​បាតុកម្ម​នេះ​ហៅ​ការផ្ទេរ​អំណាច​គ្មាន​ប្រជាធិបតេយ្យ។ លោក ពិន ស៊ីសុវណ្ណ នៃ​វីអូអេ​រាយការណ៍​ពី​ទីក្រុង Lowell រដ្ឋ Massachusetts៕

លោក សុន ឆ័យ អនុ​ប្រធាន​គណ​បក្ស​ភ្លើងទៀន បាន​ថ្លែង​នៅ​ក្នុង​បទ​សម្ភាសន៍​ជាមួយ​អ្នកស្រី ធីតា វីន អ្នកយក​ព័ត៌មាន​ឱ្យ​វីអូអេ​ថា បើ​ទោះបីជា​ការបោះឆ្នោត​ជាតិ​អាណត្តិ​ទី ៧ នេះ​ មិន​បាន​ផ្តល់​ជម្រើស​គ្រប់​ជ្រុងជ្រោយ​ក្តី ក៏​អនាគត​នៃ​ស្ថានភាព​នយោបាយ​និង​លទ្ធិប្រជាធិបតេយ្យ​នៅ​កម្ពុជា គួរតែ​ទទួល​បាន​ការ​បើក​ទំព័រ​ថ្មី ដោយ​ជំរុញ​ឱ្យ​មាន​ការ​រួបរួម​គ្នា​រវាង​អ្នក​នយោបាយ​ពី​គ្រប់​និន្នាការ។ ជាពិសេស​នៅ​ពេលដែល​រដ្ឋាភិបាល​អាណត្តិ​ថ្មី​ដែលដឹកនាំ​ដោយ​ក្រុម​អ្នក​ដឹកនាំ​វ័យ​ក្មេង​របស់​គណបក្ស​កាន់អំណាច នឹង​ចាប់ផ្តើម​អាណត្តិ​ការងារ​របស់​ខ្លួន បន្ទាប់​ពី​លោក​នាយក​រដ្ឋមន្ត្រី ហ៊ុន សែន បាន​ប្រកាស​ចុះចេញ​ពី​តំណែង​និង​ផ្លាស់ប្តូរ​សមាសធាតុ​គណៈរដ្ឋមន្ត្រី។ ទោះជា​យ៉ាង​ណា​ក្តី អ្នក​នយោបាយ​ជើង​ចាស់​រូប​នេះ ក៏​បាន​បង្ហាញ​ក្តី​បារម្ភ​អំពី​សមត្ថភាព​និង​បទពិសោធន៍​ដឹកនាំ​ប្រទេស​របស់​ក្រុម​អ្នក​ដឹកនាំ​ជំនាន់​ថ្មី ស្រប​ពេល​ដែល​លើក​ទឹកចិត្ត​ឱ្យ​លោក ហ៊ុន ម៉ាណែត ដែល​នឹង​ឡើង​កាន់​តំណែង​ជំនួស​ឪពុក​របស់​លោក ដោះលែង​អ្នក​ទោស​នយោបាយ សកម្មជន​សិទ្ធិ​មនុស្ស និង​បរិស្ថាន​ទាំងឡាយ​ដែល​កំពុង​ជាប់​ឃុំ ដើម្បី​ស្តារ​ស្ថានភាព​សិទ្ធិមនុស្ស​និង​ប្រជាធិបតេយ្យ​ឡើង​វិញ៕

លោក ​សុខ​ ឥសាន ​អ្នក​នាំ​ពាក្យ​គណបក្ស​ប្រជាជន​កម្ពុជា​ បាន​ថ្លែង​នៅ​ក្នុង​បទសម្ភាសន៍​ជាមួយ​អ្នក​ស្រី​ ធីតា​ វីន ​អ្នកយកព័ត៌មាន​ឱ្យ​វីអូអេ​ថា ​កេរដំណែល​របស់នាយក​រដ្ឋ​មន្ត្រី​កម្ពុជា លោក ហ៊ុន ​សែន ​មាន​ច្រើន​រាប់​មិន​អស់​ តាំង​ពី​សម័យ​ខ្មែរ​ក្រហម​រហូត​មក​ដល់​ពេល​បច្ចុប្បន្ន​នេះ។ ការ​រំដោះ​ប្រជាជន​ចេញ​ផុត​ពី​របប​ខ្មែរ​ក្រហម​ ផែន​ការ​ «ក៥»​ សន្ធិ​សញ្ញា​សន្តិភាព​ទីក្រុង​ប៉ារីស​ ការ​បង្ក្រាប​ព្រឹត្តការណ៍​ឆ្នាំ​ ១៩៩៧​ ការ​គ្រប់​គ្រង​ស្ថាន​ភាព​ជំងឺកូវីដ ​និង​ចាក់​វ៉ាក់​សាំង​កូវីដ ​ផ្លូវ​ថ្នល់​ ស្ពាន​ កំណើន​សេដ្ឋកិច្ច​ជា​ដើម​ សុទ្ធ​តែ​ជា​សមិទ្ធិ​ផល​របស់​លោ​កនាយក​រដ្ឋ​មន្ត្រី ហ៊ុន​សែន។ ក៏ប៉ុន្តែ ស្រប​ពេល​ជាមួយ​គ្នា​នេះ មេដឹកនាំ​ចាស់​វស្សា​របស់​កម្ពុជា​ ក៏​ត្រូវបាន​និង​កំពុង​រងការ​រិះគន់​ជាបន្តបន្ទាប់​អំពី​ការ​បង្ក្រាប​លើ​សំឡេង​ប្រឆាំង និង​ការ​រឹតត្បិត​លម្ហ​សេរីភាព​ក្នុង​ការបញ្ចេញ​មតិ កិច្ចការ​របស់​សង្គមស៊ីវិល និង​ប្រព័ន្ធ​ផ្សព្វផ្សាយ​ឯករាជ្យ​ផងដែរ។ បើ​ទោះ​បី​ជា​យ៉ាង​ណាក្តី លោក សុខ ឥសាន អះអាង​ថា ​ការ​ទិតៀន​ទាំង​អស់​នេះ​នៅតែ​មិន​អាច​រារាំង​ដល់​ដំណើរ​ការ​អភិវឌ្ឍ​ប្រទេស​រហូត​ទទួល​បាន​សន្តិភាព ​ក្រោម​ការ​ដឹក​នាំ​របស់​លោក​ ហ៊ុន​ សែន​ បាន​ឡើយ៕

ប្រវត្តិសាស្ត្រថ្មីមួយនៃនយោបាយកម្ពុជាត្រូវបានកត់ត្រាទុក កាលពីថ្ងៃទី ២៦ ខែកក្កដា ឆ្នាំ ២០២៣ គ្រាដែលលោកនាយករដ្ឋមន្ត្រី ហ៊ុន សែន ដែលបានដឹកនាំប្រទេសជិត ៤០ ឆ្នាំ បានប្រកាសលាលែងពីតំណែង ហើយផ្ទេរតំណែងនេះទៅឱ្យកូនប្រុសច្បងរបស់លោក ដែលជាមេបញ្ជាការកងទ័ពជើងគោក បន្ទាប់ពីគណបក្សប្រជាជនកម្ពុជារបស់លោក បានឈ្នះអាសនៈភាគច្រើននៅរដ្ឋសភាជាតិពីការបោះឆ្នោតជាតិអាណត្តិទី ៧។ សម្រាប់ពលរដ្ឋទូទៅ នេះជាការផ្លាស់ប្តូរជំនាន់នៃអ្នកដឹកនាំប្រទេសដ៏កម្រនិងដែលត្រូវបានរៀបចំទុកជាមុន ឱ្យសមស្របទៅនឹងបរិបទនិងបច្ចុប្បន្នភាពនៃប្រជាសាស្ត្រ និងសេដ្ឋកិច្ចកម្ពុជា។ សម្រាប់ក្រុមអ្នកជំនាញ ការផ្លាស់ប្តូរមុខមាត់មេដឹកនាំនេះ គឺជាកិច្ចការដ៏ចាំបាច់ ខណៈស្ថានភាពសេដ្ឋកិច្ចសង្គម សិទ្ធិសេរីភាព និងនយោបាយក្នុងប្រទេសកំពុងបន្តប្រឈមនឹងបញ្ហាចាស់ឫសមួយចំនួនជាបន្តបន្ទាប់ ស្របពេលដែលការផ្លាស់ប្តូរមេដឹកនាំនេះកើតចេញពីគណបក្សនយោបាយតែមួយដែលខ្វះខ្លឹមសារប្រជាធិបតេយ្យ។ អ្នកនាង កាន់ វិច្ឆិកា អ្នកស្រី ធីតា វីន និងអ្នកនាង ទែន សុខស្រីនិត រាយការណ៍អំពីរឿងនេះ៕

ពលរដ្ឋនៅទីក្រុង Lowell រដ្ឋ Massachusetts បានចាប់ផ្តើមប្រារព្ធពិធីបុណ្យអុំទូកខួប ២៦ ឆ្នាំ។ នេះជាឆ្នាំទី ២ ក្រោយពីបានខកខាតដោយសារជំងឺកូវីដ១៩ ដើម្បីបង្ការការឆ្លងរាលដាលទ្រង់ទ្រាយធំ។ ពិធីបុណ្យអុំទូកនេះត្រូវបានផ្តួចផ្តើមឡើងដោយអតីតជនភៀសខ្លួនខ្មែរនៅទីក្រុងនេះ។ ដោយមានការចូលរួមពីជនជាតិផ្សេងៗទៀត ពិធីប្រចាំឆ្នាំមួយនេះកាន់តែរីកធំឡើង ដោយមានឈ្មោះថា ពិធីបុណ្យអុំទូកអាស៊ីអាគ្មេយ៍។ លោក ពិន ស៊ីសុវណ្ណ រាយការណ៍លម្អិតពីទីក្រុង Lowell រដ្ឋ Massachusetts៕

អង្គការ​មិនមែន​រដ្ឋាភិបាល​មួយចំនួន​បាន​រៀបចំ​វេទិកា​យុវជន​ថ្នាក់ជាតិ​ឆ្នាំ ២០២៣ កាលពី​ថ្ងៃទី​ ១១ ខែ​សីហា​កន្លង​ទៅ ដោយ​មាន​ការ​ចូលរួម​ពី​មន្ត្រី​រដ្ឋាភិបាល យុវជន សិស្ស និស្សិត ព្រមទាំង​អ្នក​តាមដាន​ស្ថានការណ៍​នយោបាយ​និង​សង្គម​នៅ​ប្រទេស​កម្ពុជា និង​មន្ត្រីទូត​មួយ​ចំនួន​ផង​ដែរ។ នៅក្នុង​ដំណាក់កាល​ដែល​មាន​ការ​ផ្លាស់ប្តូរ​មេដឹកនាំ​ពីអ្នក​ជំនាន់​ចាស់​ទៅ​អ្នក​ជំនាន់ក្រោយ​ យុវជន​មួយចំនួន​ដែល​បាន​ចូលរួម​ក្នុង​វេទិកា​នោះ បាន​បង្ហាញ​ជំហរ​លើក​កម្ពស់​សិទ្ធិ​បញ្ចេញ​មតិ​ និង​ការ​ចូលរួម​ក្នុង​សកម្មភាព​សង្គម។ លោក ហ៊ុល រស្មី រាយការណ៍​លម្អិត​ពី​រាជធានី​ភ្នំពេញ៕

ក្រោយកាន់អំណាចអស់ ៣៨ឆ្នាំ លោកនាយករដ្ឋមន្ត្រី ហ៊ុន សែន កំពុងផ្ទេរអំណាចទៅឱ្យកូនប្រុសគឺលោក ហ៊ុន ម៉ាណែត។ ខណៈការផ្ទេរអំណាចនេះ ត្រូវបានរំពឹងថានឹងត្រូវបានការបញ្ជាក់ជាផ្លូវការដោយរដ្ឋសភា នៅថ្ងៃទី២២ ខែសីហា អ្នកវិភាគមើលឃើញថា លោក ហ៊ុន ម៉ាណែត នឹងទទួលពីឪពុកនូវការស្នងអំណាចគ្រប់គ្រងលើប្រទេសកម្ពុជាមួយដែលកំពុងផ្លាស់ប្តូរ។ លោក ចាប ចិត្រា នៃ VOA រាយការណ៍ពីរដ្ឋធានីវ៉ាស៊ីនតោន៕

ខេត្តព្រះសីហនុគឺជាតំបន់នៃការវិនិយោគចម្រុះ ដែលមានការអភិវឌ្ឍគម្រោងលំនៅដ្ឋាន និងអគារខ្ពស់ៗដើម្បីបម្រើដល់កិច្ចការពាណិជ្ជកម្ម។ នៅទីនោះក៏មានការសាងសង់អគារជាច្រើនដែលមិនទាន់រួចរាល់ ហើយអ្នកវិនិយោគចិនជាច្រើនបានទុកសំណង់ទាំងនោះចោល ដោយសារបានត្រឡប់ទៅប្រទេសចិនវិញ ក្នុងអំឡុងពេលការរាតត្បាតជំងឺកូវីដ ១៩។ លោក ហ៊ុល រស្មី អ្នករាយការណ៍ព័ត៌មានឲ្យ VOA បានចូលជួបនិងសម្ភាស លោក ឡុង ឌីម៉ង់ អភិបាលរងខេត្តព្រះសីហនុ អំពីវិធានការដោះស្រាយបញ្ហាអគារសាងសង់មិនទាន់ហើយដោយចិនទាំងនេះ៕