ការ​បោះឆ្នោត​ជាតិ​អាណត្តិ​ទី ៧ ដែល​បាន​ធ្វើ​ឡើង​នៅ​ថ្ងៃអាទិត្យ​ បាន​ក្លាយ​ជា​ថ្ងៃ​ដ៏​ពិបាក​មួយ​សម្រាប់​អ្នក​នយោបាយ​ជើង​ចាស់​មួយ​រូប ដែល​បាន​និង​កំពុង​តស៊ូ​ដើម្បី​ពង្រឹង​លទ្ធិប្រជាធិបតេយ្យ​ពិតប្រាកដ​នៅ​កម្ពុជា។ នេះ​ជា​ថ្ងៃ​ដែល​លោក​ត្រូវ​បំពេញ​កាតព្វកិច្ច​ជា​ពលរដ្ឋ​មាន​សិទ្ធិ​បោះឆ្នោត ជា​អ្នក​នយោបាយ​បក្ស​ប្រឆាំង​ដែល​ត្រូវ បោះឆ្នោត​នា​អាណត្តិ​នេះ​ដើម្បី​អាច​ឈរ​ឈ្មោះ​ឱ្យ​គេ​បោះឆ្នោត​ឱ្យ​នា​ពេល​អនាគត និង​ជា​អ្នក​តស៊ូ​មតិ​ម្នាក់​ដើម្បី​លទ្ធិប្រជាធិបតេយ្យ​ដែល​កំពុង​ដុនដាប​ពី​មួយ​ឆ្នាំ​ទៅ​មួយ​ឆ្នាំ។ ពី​រាជធានី​ភ្នំពេញ អ្នកស្រី ធីតា វីន នៃ​វីអូអេ រាយការណ៍​លម្អិត​ពី​រាជធានី​ភ្នំពេញ​ដូចតទៅ៕

អ្នកនាំ​ពាក្យ​គណបក្ស​ប្រជាជន​កម្ពុជា​បាន​ប្រាប់​ទីភ្នាក់ងារ​ព័ត៌មាន​ Reuters ថា៖ «វា​ច្បាស់​ណាស់​ លោក [ហ៊ុន ម៉ាណែត] បាន​ជាប់​ឆ្នោត» បាន​ឈ្នះ​អាសនៈ​ក្នុង​រដ្ឋសភា​ក្នុង​ការ​បោះឆ្នោត​កាល​ពី​ថ្ងៃអាទិត្យ៕

ក្នុង​បទសម្ភាសន៍​មួយ​ជាមួយ​វីអូអេ នៅ​មណ្ឌល​បោះឆ្នោត​ផ្សារថ្មី២ លោក ផៃ ស៊ីផាន អ្នកនាំពាក្យ​រដ្ឋាភិបាល​កម្ពុជា​ដែល​បាន​ចេញ​ទៅ​បោះឆ្នោត​កាលពី​ព្រឹក​ថ្ងៃអាទិត្យ​នេះ ថ្លែងថា ការបោះ​ឆ្នោត​ជាតិ​អាណត្តិ​ទី ៧ នេះ​ប្រព្រឹត្ត​ទៅតាម​បែប​លទ្ធិប្រជាធិបតេយ្យ មាន​ន័យ​ថា សេរី យុត្តិធម៌ និង​ត្រឹមត្រូវ បើ​ទោះ​បី​គ្មាន​វត្តមាន​គណបក្ស​ប្រឆាំង​ដ៏​ធំ​មួយ។ លោក​អះអាង​ថា បើទោះបី​ជាគណបក្ស​ភ្លើងទៀន​មាន​វត្តមាន​ចូលរួម​ការបោះឆ្នោត​នេះ​ក៏ដោយ ក៏​គណបក្ស​ប្រជាជនកម្ពុជា​នឹង​នៅតែនាំមុខ​សម្រាប់​ការ​បោះឆ្នោត​នេះ​ដែរ។ លោក ស៊ុន ណារិន កញ្ញា ថាំង ស៊ីណន និង​ ហាន ណូយ ជូន​បទសម្ភាសន៍​នេះ​ដូច​តទៅ៖

ឃុំក្រយា​ក្នុងខេត្តកំពង់ធំ មានប្រជាពលរដ្ឋជាង​ ៤០០០នាក់ដែលមាន​ឈ្មោះលើ​បញ្ជីអ្នកបោះឆ្នោតសម្រាប់​ការបោះឆ្នោតជ្រើស​តាំង​តំណាង​រាស្ត្រ​អាណត្តិទី៧​។ អំឡុងពេលនៃការចេញ​ទៅបោះឆ្នោតកាលពី​ថ្ងៃទី២៣ ខែកក្កដា​ អ្នក​បោះឆ្នោត​នៅឃុំក្រយា​ បាន​បង្ហាញមតិចម្រុះជុំវិញការបោះឆ្នោត​ដែល​គ្មាន​គណ​បក្ស​ភ្លើងជាគណបក្សជំទាស់ធំមួយដែលធ្លាប់ចូលរួមការបោះឆ្នោតឃុំសង្កាត់​កាល​ពី​ឆ្នាំ​២០២២។

ថ្នាក់ដឹកនាំ និងសកម្មជនមួយចំនួនរបស់គណបក្សភ្លើងទៀន បានទៅបោះឆ្នោត នាព្រឹកថ្ងៃអាទិត្យ ទី២៣ ខែកក្កដានេះ ដើម្បីធានាសិទ្ធិឈរឈ្មោះឲ្យគេបោះឆ្នោតឲ្យនៅពេលក្រោយ។ ពួកគេអះអាងថាវិសោធនកម្មច្បាប់បោះឆ្នោតថ្មីដែលស្នើដោយលោកនាយករដ្ឋមន្រ្តី ហ៊ុន សែន និងត្រូវបានប្រកាសឲ្យប្រើប្រាស់រួចទៅហើយ បានបង្ខំពួកគេឲ្យទៅបោះឆ្នោត ស្របពេលដែលពួកគេចង់ឈរឈ្មោះនៅក្នុងការបោះឆ្នោតនាពេលក្រោយ។ វិសោធនកម្មច្បាប់បោះឆ្នោតនេះបានកំហិតសិទ្ធិឈរឈ្មោះរបស់អ្នកនយោបាយ ដោយតម្រូវឲ្យបេក្ខជនទៅបោះឆ្នោតជាសាកលចំនួនពីរលើកចុងក្រោយជាប់គ្នា ទើបអាចឈរឈ្មោះឱ្យគេបោះឆ្នោតឲ្យបាន។

លោកនាយករដ្ឋមន្ត្រី ហ៊ុន សែន បានចេញបោះឆ្នោតនៅសាលាគរុកោសល្យវិក្រិត្យការ ក្នុងក្រុងតាខ្មៅ ខេត្តកណ្តាល សម្រាប់ការបោះឆ្នោតជាតិអាណត្តិទី ៧ ដែលអវត្តមានគណបក្សប្រឆាំង។ បើទោះបីជា​មាន​គណបក្ស​នយោបាយ ១៧ ផ្សេង​ទៀត​ចូលរួម​ប្រកួត ក៏​គេរំពឹង​ថា គណបក្ស​ប្រជាជន​កម្ពុជា​របស់​លោក​នាយក​រដ្ឋមន្ត្រី ហ៊ុន សែន អាច​នឹង​ឈ្នះ ១២៥ អាសនៈ​នៅ​រដ្ឋសភា និង​បន្តដឹកនាំ​សភា​ដោយ​ឯកបក្ស៕

ពលរដ្ឋ​នៅ​រាជធានី​ភ្នំពេញ​ដូចជា លោក អ៊ុន សុផល បាន​លើក​ឡើង​ថា លោក​បាន​ចេញ​ទៅបោះឆ្នោត​ ដើម្បី​ជំរុញ​ឱ្យ​រដ្ឋាភិបាល​អាណត្តិ​ថ្មី​យកចិត្ត​ទុក​ដាក់​បម្រើ​ប្រជាពលរដ្ឋ​បន្ថែម​ទៀត បើ​ទោះ​បីជា​គ្មាន​គណបក្ស​ប្រឆាំង​ដ៏​ចម្បង​ គឺ​គណបក្ស​ភ្លើងទៀន។ ការ​បោះឆ្នោត​ជ្រើសរើស​តំណាងរាស្ត្រ​អាណត្តិ​ទី ៧ នេះ ធ្វើ​ឡើង​ដោយ​គ្មាន​វត្តមានគណបក្ស​ភ្លើងទៀន​ដែល​បាន​ឈ្នះ​សំឡេង​គាំទ្រ​ប្រមាណ ១ លាន ៦សែន​ នៅ​ក្នុង​ការបោះឆ្នោត​ឃុំសង្កាត់​ឆ្នាំ ២០២២ ត្រូវបាន​បដិសេធ​មិនឱ្យ​ចូលរួម​ប្រកួត​ក្នុង​ការ​បោះឆ្នោត​ជាតិ​អាណត្តិ​នេះ។ បើទោះបីជា​មាន​គណបក្ស​នយោបាយ ១៧ ផ្សេង​ទៀត​ចូលរួម​ប្រកួត ក៏​គេរំពឹង​ថា គណបក្ស​ប្រជាជន​កម្ពុជា​របស់​លោក​នាយក​រដ្ឋមន្ត្រី ហ៊ុន សែន អាច​នឹង​ឈ្នះ ១២៥ អាសនៈ​នៅ​រដ្ឋសភា និង​បន្តដឹកនាំ​សភា​ដោយ​ឯកបក្ស។ កញ្ញា ថាំង ស៊ីណន រាយការណ៍​លម្អិត​ពី​រាជធានី​ភ្នំពេញ៕

នាព្រឹកថ្ងៃអាទិត្យនេះ ប្រជាពលរដ្ឋនៅរាជធានីភ្នំពេញ បាននាំគ្នាចេញទៅបោះឆ្នោត នៅក្នុងការបោះឆ្នោតមួយដែលអវត្តមានគណបក្សជំទាស់ដ៏ធំ គឺគណបក្សភ្លើងទៀន។ នេះជាការបោះឆ្នោតជ្រើសតាំងតំណាងរាស្រ្ត ១២៥រូប ឬ ១២៥អាសនៈ ក្នុងរដ្ឋសភាជាតិ ដែលក្នុងនោះមណ្ឌលរាជធានីភ្នំពេញ មាន ១២អាសនៈ។ ដំណើរការបោះឆ្នោតចាប់ផ្តើមពីម៉ោង ៧ ព្រឹក ដល់ម៉ោង ៣ រសៀល ហើយលទ្ធផលបឋមនៃការបោះឆ្នោតនេះត្រូវបានគេរំពឹងថានឹងប្រកាសនៅយប់ថ្ងៃអាទិត្យនេះ៕

នៅ​ថ្ងៃសៅរ៍​នេះ មន្ត្រី​នៃ​គណៈកម្មាធិការ​ជាតិ​រៀបចំ​ការបោះឆ្នោត​ ហៅ​កាត់ថា គ.ជ.ប នៅ​រាជធានី​ភ្នំពេញ កំពុង​មមាញឹក​នឹង​កិច្ចការ​រៀបចំ​ការិយាល័យ​បោះឆ្នោត មុនថ្ងៃ​បោះឆ្នោត​ជាតិ​អាណត្តិទី ៧ ឈាន​មកដល់​នៅ​ថ្ងៃអាទិត្យ ទី ២៣ ខែ​កក្កដានេះ។ ពលរដ្ឋ​ប្រមាណ ៩លាន ៧សែននាក់ មាន​ឈ្មោះ​ក្នុង​បញ្ជី​ឈ្មោះ​អ្នក​បោះឆ្នោត​ជ្រើសរើស​តំណាង​រាស្ត្រ​សម្រាប់​នីតិកាលទី ៧ នេះ ដែល​នឹង​ត្រូវបាន​ធ្វើឡើង​ដោយ​គ្មាន​វត្តមាន​គណបក្សភ្លើងទៀន ដែល​ជា​គណបក្ស​ប្រជែង​ដ៏ចម្បង​មួយ​នឹង​គណបក្ស​ប្រជាជនកម្ពុជា ដែល​កំពុង​ដឹកនាំ​រដ្ឋាភិបាល។ ក្រៅ​ពី​គណបក្ស​ប្រជាជន​កម្ពុជា​ដែល​ជា​គណបក្ស​កាន់អំណាច គណបក្ស​នយោបាយ​ចំនួន ១៧ ផ្សេង​ទៀត​បាន​ចុះឈ្មោះ​ចូលរួម​ប្រកួត​ប្រជែង​នៅ​ក្នុង​ការបោះឆ្នោត​នេះ ដែល​ត្រូវបាន​គេ​រំពឹង​ថា គណបក្ស​ប្រជាជន​របស់​លោក​នាយករដ្ឋ​មន្ត្រី ហ៊ុន សែន អាច​នឹង​ឈ្នះ​បាន​សំឡេង​គាំទ្រ​ច្រើន​លើសលុប​ ដូច​ការ​បោះឆ្នោត​ជាតិ​ឆ្នាំ ២០១៨ ដែរ៕

លោក​ ហ៊ុន ម៉ាណែត ដែលមាន​បេក្ខភាព​ជា​នាយករដ្ឋមន្ត្រី​នា​ពេល​អនាគត បាន​ចេញ​ឃោសនា​រកការ​គាំទ្រពីម្ចាស់ឆ្នោត​ក្នុង​ថ្ងៃចុង​ក្រោយ​នៃ​យុទ្ធនាការ​ឃោសនា​បោះឆ្នោត​មាន​រយៈពេល​ ២១​ ថ្ងៃ។ អ្នក​គាំទ្រ​គណបក្ស​កាន់​អំណាច​ខ្លះ​ថា ពួកគេ​បាន​មើល​ឃើញ​ពី​សមត្ថភាពរបស់​លោក​ ហ៊ុន ម៉ាណែត ​ដែល​អាច​គ្រប់គ្រង​ប្រទេស​បាន ​ព្រោះ​លោក​បាន​ទទួល​ការអប់​រំពីក្រៅ​ប្រទេស និង​ចង់​ឃើញ​លោក​ឡើង​កាន់​អំណាច​បន្ត​ពី​ឪពុកលោក​ក្នុងអាណត្តិទី​ ៧​ នេះ។ លោក​ ហ៊ុល រស្មី​ និង​លោក ពិន ស៊ីសុវណ្ណ រាយ​ការណ៍​លម្អិតឱ្យ​វីអូអេ​ពីរាជធានី​ភ្នំពេញ៕