ប្រជា​ពលរដ្ឋ​កម្ពុជា​នឹង​ទៅ​បោះឆ្នោត​នៅ​ថ្ងៃ​ទី ២៣ ខែ​កក្កដា សម្រាប់​ការ​បោះឆ្នោត​ដែល​រង​ការ​រិះគន់​ជា​ទូទៅ​ពី​សំណាក់​បណ្តា​ប្រទេស​លោក​ខាង​លិច អគ្គលេខាធិការ​អង្គការ​សហប្រជាជាតិ​លោក Antonio Guterres និង​ក្រុម​សកម្មជន​គាំទ្រ​លទ្ធិ​ប្រជាធិបតេយ្យ បន្ទាប់​ពី​គណបក្ស​ប្រឆាំង​ដ៏​ចម្បង​ត្រូវ​បាន​ហាមឃាត់​មិន​ឱ្យ​ចូលរួម​នៅ​ក្នុង​ការ​បោះឆ្នោត​នេះ។ ក៏​ប៉ុន្តែ​អាជ្ញាធរ​កម្ពុជា​ទទូច​ថា ការ​បោះឆ្នោត​នេះ​នឹង​មាន​លក្ខណៈ​សេរី​និង​យុត្តិធម៌។ លោក Luke Hunt រាយការណ៍​លម្អិត​ពី​រាជធានី​ភ្នំពេញ។ អ្នកនាង ទែន សុខស្រីនិត ជូន​សេចក្តី​ប្រែសម្រួល៕

នៅ​ក្នុង​ការ​បោះឆ្នោត​ជាតិ​ឆ្នាំ​២០២៣ នេះ មាន​គណបក្ស​នយោបាយ​ចំនួន១៨ បាន​ចូលរួម​ឈរ​ឈ្មោះ​បោះឆ្នោត។ គណបក្ស​មួយ​ចំនួន​បាន​ឱ្យ​ដឹង​ពី​គោលនយោបាយ​សំខាន់ៗ​របស់ខ្លួន ដើម្បី​យក​ឈ្នះ​ក្នុង​ការ​បោះឆ្នោត។ ប៉ុន្តែ​អ្នកបោះឆ្នោត​ខ្លះ​ថា ពួកគេ​មិន​ទាន់​ទុក​ចិត្ត​បាន​ថា គណបក្ស​ទាំង​នោះ អាច​បំពេញ​បាន​គ្រប់​គោលនយោបាយ​ទាំង​នោះនោះ​ទេ ហើយថា ពួកគេ​ចង់​ឃើញ​ការ​អនុវត្ត​ជាក់ស្តែង។ លោក ហ៊ុល រស្មី និង​លោក ពិន ស៊ីសុវណ្ណ រាយការណ៍​ពី​រាជធានី​ភ្នំពេញ៕

នៅ​សល់​តែ​ប៉ុន្មាន​ថ្ងៃ​ទៀត​ប៉ុណ្ណោះ​ ប្រជាជន​កម្ពុជា​ដែល​មាន​សិទ្ធិ​បោះឆ្នោត​នឹង​ចេញ​ទៅ​បោះឆ្នោត​ជ្រើសរើស​តំណាងរាស្ត្រ​សម្រាប់​អណត្តិទី៧។ យុវជន​មួយ​ចំនួន​ដែល​ដល់​អាយុ​បោះឆ្នោត​ បង្ហាញ​អារម្មណ៍​រីករាយ​នឹង​ការ​បោះឆ្នោត​ជា​លើក​ដំបូង​ ហើយ​ពួកគេ​ក៏​មាន​សំណូមពរ​មួយ​ចំនួនទៅ​រដ្ឋាភិបាល​ថ្មី​ ទាក់ទង​ការ​បង្កើត​ការងារ​ និង​ការ​ដោះស្រាយ​បញ្ហា​ប្រឈម​ខ្លះៗ​ទៀត​ ដូចជា​ជម្លោះដីធ្លី​ និង​រក​ទីផ្សារ​លក់​ផលិតផល​កសិកម្ម​ជូន​កសិករ​ជាដើម។ លោក​ ហ៊ុល រស្មី​ រាយការណ៍​លម្អិតឱ្យ​វីអូអេ​ពី​រាជធានី​ភ្នំពេញ​ដូច​តទៅ៖

កម្មករ​រោងចក្រ​ជាច្រើន​នាក់​នៅ​រាជធានី​ភ្នំពេញ​បាន​លើក​ឡើង​រួម​គ្នា​អំពី​បញ្ហា​ចម្បង​ធំ​បង្អស់​របស់​ខ្លួន មុន​ថ្ងៃ​បោះឆ្នោត​ជ្រើសរើស​តំណាងរាស្ត្រ​នីតិកាល​ទី ៧ ឈាន​មក​ដល់​នៅ​ចុង​សប្តាហ៍​ក្រោយ​នេះ។ ពួកគេ​ថា តម្លៃ​ទំនិញ​ឡើង​ថ្លៃ​បាន​ក្លាយ​ជា​កត្តា​ធ្វើ​ឱ្យ​ជីវភាព​ប្រចាំ​ថ្ងៃ​របស់​ពួកគេ​កាន់តែ​ខ្សត់ខ្សោយ ស្រប​ពេល​ប្រាក់​បៀវត្សរ៍​អប្បបរមា​មិន​សមាមាត្រ​នឹង​ការ​ចំណាយ​ជា​មធ្យម​ប្រចាំ​ថ្ងៃ​របស់​កម្មករ។ ពួកគេ​អំពាវនាវ​ឱ្យ​រដ្ឋាភិបាល​អាណត្តិ​ថ្មី ដែល​នឹង​ត្រូវបាន​កំណត់​ក្រោយ​ការ​បោះឆ្នោត​ជាតិ​អាណត្តិ​ទី ៧ ដែល​អវត្តមាន​គណបក្ស​ប្រជែង​ពិតប្រាកដ​មួយ​នោះ យក​ចិត្ត​ទុក​ដាក់​លើ​ការ​ទប់ទល់​នឹង​តម្លៃ​ទំនិញ​ឡើង​ថ្លៃ សុខុមាលភាព​កម្មករ និង​ប្រាក់​បៀរវត្សរ៍​របស់​ពួកគេ។ អ្នកនាង កាន់ វិច្ឆិកា និង​លោក ពិន​ ស៊ីសុវណ្ណ រាយការណ៍​លម្អិត​ពី​រាជធានី​ភ្នំពេញ៕

ការ​បោះ​ឆ្នោត​ជាតិ​និតិកាល​ទី​៧​របស់​ប្រទេស​កម្ពុជា​នឹងប្រព្រឹត្ត​ទៅ​នៅ​ថ្ងៃ​ទី​២៣ ខែ​កក្កដា។​ គណបក្ស​នយោបាយ​ចំនួន​ ១៨​ ត្រូវ​បាន​ចុះ​ឈ្មោះ​បោះឆ្នោត​ដើម្បី​ជ្រើស​តាំង​សមាជិក​រដ្ឋសភា។ ដោយសារតែ​គណបក្ស​ចំនួន​១៧ មាន​ថវិកា​និង​សំឡេងគាំទ្រ​តិចតួច គណបក្ស​ប្រជាជន​កម្ពុជា​ដែល​កំពុង​កាន់​អំណាច​ទំនង​ជា​នឹង​ទទួល​បាន​អាសនៈ​ទាំងអស់ ហើយ​បង្កើត​រដ្ឋាភិបាល​ថ្មី។ អង្គការ​អន្តរជាតិ​ជា​ច្រើន​ចាត់​ទុក​ការ​បោះឆ្នោត​នេះ​ថា ​ជា​ការ​បោះឆ្នោត​ក្លែងក្លាយ។ លោក ចាប ចិត្រា នៃ VOA រាយការណ៍​ពី​រដ្ឋធានី​វ៉ាស៊ីនតោន៕

កាល​ពីថ្ងៃ​ទី​១០ ខែ​កក្កដា ក្រុម​ជនជាតិ​ម៉ុងតាញ៉ា ឬ ​ដេហ្គា​ រៀបចំ​បាតុកម្ម​តវ៉ា​មួយ​នៅក្នុង​រដ្ឋធានី​វ៉ាស៊ីនតោន ដើម្បី​សុំ​ឲ្យ​សហរដ្ឋ​អាមេរិក​ អង្គការ​សហប្រជាជាតិ ​និង​សហគមន៍​អន្តរជាតិ ធ្វើ​អន្តរាគមន៍​បញ្ឈប់​អំពើ​ហិង្សា ​និង​សកម្មភាព​រំលោភ​បំពាន​រយ:ពេល​ជិត ​៥ទសវត្សរ៍ ដែល​កើត​មាន​បន្ត​បន្ទាប់​លើ​ជនជាតិ​ដើម​ភាគតិច​ម៉ុងតាញ៉ា​នៅ​ក្នុង​ប្រទេស​វៀតណាម។ លោក ចាប ចិត្រា ជូន​សេចក្តី​រាយការណ៍​ដូច​តទៅ៖

គណបក្ស​ប្រជាធិបតេយ្យ​មូលដ្ឋាន​បាន​ចាប់ផ្តើម​យុទ្ធនាការ​ឃោសនា​របស់​ខ្លួន

នៅ​ចំ​ថ្ងៃ​គម្រប់​ខួប​៧​ឆ្នាំ​នៃ​ការបាញ់​សម្លាប់​លោក កែម ឡី។ ប្រធាន​គណបក្ស​លើក​ឡើង​ថា គណបក្ស​ប្រជាធិបតេយ្យ​មូលដ្ឋាន​ជា​ជម្រើស​មួយ​សម្រាប់​ប្រជាពលរដ្ឋ ហើយ​លោក​មិន​ចង់​ឃើញ​រដ្ឋសភា​កម្ពុជា​ត្រូវ​បាន​ដឹកនាំ​ដោយ​ឯកបក្ស​ក្នុង​រយៈ​ពេល​៥​ឆ្នាំ​បន្ត​ទៀត​ទេ។ លោក ហាន ណូយ និង​លោក ស៊ុន ណារិន រាយការណ៍​ឱ្យ​វីអូអេ​ពី​រាជធានី​ភ្នំពេញ៕

នៅ​ក្នុង​ខួប៧ឆ្នាំ​នៃ​ឃាតកម្ម​លើ​អ្នកវិភាគ​នយោបាយ​លោក កែម​ ឡី សាច់​ញាតិ និង​អ្នកគាំ​ទ្រ បាន​បន្ត​រំឭក​ដល់​មរណភាព​របស់​អ្នកវិភាគ​រូប​នោះ។ ហើយ​អ្វី​ដែល​ប្លែក​ជាង​ឆ្នាំ​មុនៗ​នោះគឺ​សំណង់​ចេតិយ​តម្កល់​សព​លោក​ កែម ឡី ​ត្រូវ​បាន​បញ្ចប់។ ប៉ុន្តែ​អ្នក​គាំទ្រ និង​សកម្មជន​ខ្លះ​ថា ​ក្រុមគ្រួសារ​លោក​ កែម ឡី នៅ​មិន​ទាន់​ឃើញ​យុត្តិធម៌ពិត​ប្រាកដ​មួយ​នៅ​ឡើយ​ទេ។ លោក​ ហ៊ុល រស្មី​ រាយការណ៍​លម្អិត​ឱ្យ​វីអូអេ​ពី​ឃុំ លាយបូរ​ ខេត្ត​តាកែវ៕

ស្រប​ពេល​ប្រទេសកម្ពុជា​កំពុង​ឆ្ពោះ​ទៅ​រក​ការ​បោះឆ្នោត​ជ្រើសរើស​តំណាងរាស្ត្រ​នៅ​ថ្ងៃទី​២៣ ខែកក្កដា ឆ្នាំ​២០២៣​នោះ​ កសិករ​មួយ​ចំនួន​រំពឹង​ថា រដ្ឋាភិបាល​ជាប់ឆ្នោត​ថ្មី សម្រាប់​នីតិកាល​ទី៧ នឹង​ប្រឹងប្រែង​ជួយ​កសិករ​ រឿង​បម្រែបម្រួល​អាកាសធាតុ និង​ផ្តល់​អន្តរាគមន៍​មិនឱ្យ​ឈ្មួញ​កណ្តាល​ធ្វើ​អ្វី​ស្រេច​តែ​ចិត្ត​ ពាក់​ព័ន្ធ​នឹង​ការ​ទិញ​ដូរ​ផលិត​ផល​កសិកម្ម។ លោក ពិន ស៊ីសុវណ្ណ និង​លោក ហ៊ុល រស្មី ជូន​សេចក្តី​រាយការណ៍​ពី​រាជធានី​ភ្នំពេញ​ដូច​តទៅ៖

នៅ​សល់​តែ​ប៉ុន្មាន​សប្តាហ៍​ទៀត​ តែ​ប៉ុណ្ណោះ ការ​បោះ​ឆ្នោត​ជ្រើសរើស​តំណាងរាស្ត្រ​សម្រាប់​នីតិកាល​ទី​៧​ នឹង​រៀបចំ​នៅ​ទូទាំង​ប្រទេស​កម្ពុជា។ អ្នក​ឃ្លាំ​មើល​ខ្លះ​យល់​ថា ការ​បោះឆ្នោត​នេះ​នឹង​ប្រឈម​ការរិះគន់​ ពាក់​ព័ន្ធ​នឹង​ការ​ទទួល​ស្គាល់របស់​អន្តរជាតិ។ តែ​អ្នកនាំ​ពាក្យ​គណបក្ស​កាន់​អំណាច​អះអាង​ថា ​រដ្ឋាភិបាល​ដែល​កើត​ក្រោយ​ការ​បោះ​ឆ្នោត​ថ្ងៃ​ទី​២៣ ខែ​កក្កដា​ នឹង​មិន​ប្រឈម​បញ្ហា​ការ​ទទួល​ស្គាល់​ពី​អន្តរ​ជាតិ​ទេ គឺ​មិន​ខុស​គ្នា​ពី​ក្រោយ​ការ​បោះ​ឆ្នោត​ឆ្នាំ​២០១៨។ លោក ​ហ៊ុល រស្មី​ និង​លោក ពិន ស៊ីសុវណ្ណ រាយការណ៍​លម្អិត​ឱ្យ​វីអូអេ​ពី​រាជធានី​ភ្នំពេញ​ដូច​តទៅ៖