ក្រុង​ព្រះសីហនុ​គឺ​ជា​តំបន់វិនិយោគ​ចម្រុះ​របស់​ខេត្ត​ព្រះសីហនុ​ ដែលមាន​ការ​អភិវឌ្ឍ​គម្រោង ​អគារ​លំនៅដ្ឋាន​ និង​ពាណិជ្ជកម្ម ​ហើយ​ក៏​មាន​បញ្ហា​មួយ​ចំនួន​បាន​កើត​ឡើង​ផង​ដែរ​នៅ​ពេល​មាន​វត្តមាន​ជនជាតិ​ចិន​ច្រើន​នៅ​ទីនោះ។ លោក ហ៊ុល រស្មី ​អ្នក​រាយការណ៍​ព័ត៌មាន​ឱ្យ​ VOA ​បាន​ជួប​សម្ភាស​ជាមួយ​ អ្នកស្រី​ ជាប សុធារី​ អ្នក​សម្រប​សម្រួល​ខាង​សិទ្ធិ​មនុស្ស​របស់​សមាគម​អាដហុក​ប្រចាំ​ខេត្ត​ព្រះសីហនុ​ ​អំពី​ស្ថានភាព​ចុង​ក្រោយ​នៃ​ការ​អនុវត្ត​សិទ្ធិ​របស់​ពលរដ្ឋ​ក្នុង​ខេត្ត​ជាប់មាត់​សមុទ្រ​មួយ​នេះ។ ​សូម​លោក​អ្នកនាង​ទស្សនា​បទ​សម្ភាសន៍​នេះ​ដូច​ត​ទៅ៖

ក្រោយពី​លោក​នាយក​រដ្ឋមន្ត្រី ​ហ៊ុន សែន​ បាន​ប្រកាស​ឈប់​បន្ត​ដឹក​នាំ​ប្រទេស​ ហើយ​ លោក​ ហ៊ុន មាណែត​ បន្តដឹកនាំ​រដ្ឋាភិបាល​ឈាម​ថ្មីនៃ​គណបក្ស​ប្រជាជន​កម្ពុជា​នោះ ​ អ្នកនាំពាក្យ​គណបក្ស​កាន់អំណាច​នេះ​បាន​ប្រាប់វីអូអេ​ជា​ច្រើន​ចំណុច​អំពី​កេរដំណែល​របស់​លោក​នាយក​រដ្ឋមន្ត្រី ​ខណៈ​សកម្មជន​និង​ប្រជាពល​រដ្ឋ​បញ្ចេញ​មតិ​តិចតួច​ក្នុង​ដំណាក់កាលចាំមើល​នេះ។ ​លោក ពិន ស៊ីសុវណ្ណ ​រាយ​ការណ៍​ពី​រាជធានី​ភ្នំពេញ៕

នា​ចុង​សប្តាហ៍​កន្លង​ទៅ​នេះ​ ខេត្ត​នៅ​ភាគខាង​ត្បូង​ប្រទេស​កម្ពុជា រួមមាន​ខេត្ត​ព្រះសីហនុ និង​ខេត្ត​កំពត បាន​រង​ជំនន់​ទឹកភ្លៀង​ដែល​បាន​ជន់​លិច​ផ្លូវ​ជាតិ​ហើយ​បាន​បណ្តាល​ឱ្យ​មនុស្ស​យ៉ាង​តិច​ម្នាក់​ស្លាប់។ អាជ្ញាធរ​បាន​ក្រើន​រំលឹក​ពលរដ្ឋ​នៅតាម​តំបន់​ដែល​មាន​ភ្លៀង​ធ្លាក់​ខ្លាំង​ឱ្យ​បង្កើន​ការ​ប្រុងប្រយ័ត្ន​ខ្ពស់។ អ្នក​នាង ទែន សុខស្រីនិត ជូន​សេចក្តី​ប្រែសម្រួល​សេចក្តី​រាយការណ៍​របស់​ទី​ភ្នាក់ងារ​ព័ត៌មាន Reuters ដូច​តទៅ៖

ក្រុង​ព្រះសីហនុ​គឺជា​ទិសដៅ​សំខាន់​មួយ​សម្រាប់​វិនិយោគទុន​ចម្រុះ​ដែលមាន​ការអភិវឌ្ឍ​គម្រោង​អគារ​លំនៅដ្ឋាន និង​ពាណិជ្ជកម្ម ហើយ​ក៏មាន​បញ្ហា​មួយ​ចំនួន​បាន​កើតឡើង​ផងដែរ​នៅពេល​មាន​វត្តមាន​ជនជាតិ​ចិន​ច្រើន​នៅ​ទីនោះ ពោល​គឺ​អំឡុងពេល​មុន​ការវាយលុក​ដោយ​ជំងឺ​ឆ្លង​កូវីដ១៩។ លោក ហ៊ុល រស្មី និង​លោក ពិន ស៊ីសុវណ្ណ រាយការណ៍​ពី​ក្រុង​ព្រះសីហនុ៕

នៅ​ឃុំក្រយា មេឃុំមកពីគណបក្សភ្លើងទៀន​ បានជាប់​ឆ្នោតជាបន្តបន្ទាប់​ ខណៈអ្នកបោះឆ្នោត​នៅឃុំនោះ​ មិននិយាយ​គាំទ្រគណបក្សជំទាស់នេះទេ​ តែបានបង្ហាញជំហរ​កោតសរសើរ​គណបក្ស​កាន់អំណាចទៅវិញ។

ការ​បោះឆ្នោត​ជ្រើស​រើស​តំណាង​រាស្ត្រ​សម្រាប់​នីតិកាល​ទី ៧ នឹង​កំណត់​សមាសភាព​របស់​រាជរដ្ឋាភិបាល​កម្ពុជា​ក្នុង​រយៈពេល​ ៥ ឆ្នាំ​ខាង​មុខ ដែល​គណបក្ស​ប្រជាជន​កម្ពុជា​ទំនង​នឹង​គ្រប់គ្រង​និង​ដឹកនាំ​ប្រទេស​ដោយ​ឯកបក្ស​មួយ​អាណត្តិ​ទៀត។ ស្របពេល​ជាមួយ​គ្នា​នោះ ប្រជាពលរដ្ឋ​កម្ពុជា​មួយ​ចំនួន​ដែល​វីអូអេ​បាន​សម្ភាសន៍ ដូចជា លោក ប្រាក់ កែវរិទ្ធីឯក និស្សិតឆ្នាំទី២ ផ្នែក​វិទ្យាសាស្ត្រ​កុំព្យូទ័រ រំពឹង​ចង់​ឲ្យ​ រដ្ឋាភិបាល​ថ្មី​មាន​ភាពបត់បែន​ក្នុង​ការ​ដឹកនាំ​ប្រទេស៕

ការ​បោះឆ្នោត​ជ្រើស​រើស​តំណាង​រាស្ត្រ​សម្រាប់​នីតិកាល​ទី ៧ នឹង​កំណត់​សមាសភាព​របស់​រាជរដ្ឋាភិបាល​កម្ពុជា​ក្នុង​រយៈពេល​ ៥ ឆ្នាំ​ខាង​មុខ ដែល​គណបក្ស​ប្រជាជន​កម្ពុជា​ទំនង​នឹង​គ្រប់គ្រង​និង​ដឹកនាំ​ប្រទេស​ដោយ​ឯកបក្ស​មួយ​អាណត្តិ​ទៀត។ ស្របពេល​ជាមួយ​គ្នា​នោះ ប្រជាពលរដ្ឋ​កម្ពុជា​មួយ​ចំនួន​ដែល​វីអូអេ​បាន​សម្ភាសន៍ ដូចជា លោក សែម ជាដារ៉ាវិបុល និស្សិតឆ្នាំទី៤ ផ្នែក​ទំនាក់ទំនង​អន្តរជាតិ រំពឹង​ចង់​ឲ្យ​ រដ្ឋាភិបាល​ថ្មី​អភិវឌ្ឍ​វិស័យអប់រំ​បន្ថែម៕

ខណៈ​ការ​បោះឆ្នោត​ជាតិ​អាណត្តិ​ទី ៧ បាន​បញ្ចប់​ទៅ កិច្ចការ​ឆ្លើយ​តប​នឹង​តម្រូវការ​និង​ក្តី​រំពឹង​ចង់​បាន​របស់​ប្រជាពលរដ្ឋ​នឹង​នៅតែ​ជា​បន្ទុក​របស់​រដ្ឋាភិបាល​អាណត្តិ​ថ្មី ជាពិសេស​លើ​កិច្ចការ​អភិបាលកិច្ច​របស់​ខ្លួន​ទាំង​នៅ​ថ្នាក់​ជាតិ​និង​ថ្នាក់​មូលដ្ឋាន។ នៅ​ក្នុង​កម្មវិធី Hello VOA ស្តី​អំពី​អភិបាល​កិច្ច​ល្អ លោក ឱក សេរីសោភក្តិ៍ អ្នក​ឯកទេស​អភិបាលកិច្ច បាន​កត់សម្គាល់​ថា ស្រប​ពេល​ដែល​ទិដ្ឋភាព​នៃ​ភាព​រីកចម្រើន​ដូចជា​ហេដ្ឋារចនា​សម្ព័ន្ធ និង​សម្ភារៈ​ប្រើប្រាស់​ទំនើប កំពុង​រីក​សាយភាយ​នៅ​ទូទាំង​ប្រទេស​នោះ​ គុណភាព​នៃ​ការ​អភិវឌ្ឍ​ដែល​ផ្តោត​លើ​ការ​ដោះស្រាយ​បញ្ហា​បំណុល និង​ការ​បង្កើន​ប្រាក់​ចំណូល​របស់​ពលរដ្ឋ នៅតែ​ជា​បញ្ហា​ចម្បង​របស់​រដ្ឋាភិបាល ខណៈ​អំពើ​ពុករលួយ​ជា​លក្ខណៈ​ប្រព័ន្ធ​នៅតែ​ជា​កត្តា​រារាំង​រដ្ឋាភិបាល​ក្នុងការ​ពង្រឹង​អភិបាល​កិច្ច​របស់​ខ្លួន​ឱ្យ​បាន​ប្រសើរ​ឡើង។ លោក​ថ្លែង​ថា៖ «និន្នាការ​នៃ​កង្វះ​អភិបាល​កិច្ច​ល្អ និយាយ​ឱ្យ​ចំ​ទៅ​គឺ​អំពើ​ពុក​រលួយ​ហ្នឹង រឹត​តែ​ចាក់​ស្រេះ​ជា​ប្រព័ន្ធ​ថែម​ទៅ​ទៀត ដោយ​សារ​វិស័យ​ឯកជន​និង​អ្នក​កាន់​អំណាច​កាន់តែ​ជិតស្និទ្ធ​គ្នា​ឡើង​ រហូត​ដល់​មាន​ការ​ភ្ជាប់​សាច់​ឈាម​ជា​គ្រួសារ​ជាមួយ​នឹង​គ្នា​ទៅ​ទៀត។ ដូច្នេះ​រចនា​សម្ព័ន្ធ​ជា​ខ្សែ​នេះ​គឺ​ពិបាក​នឹង​ដោះ​ណាស់»៕ (ទែន សុខស្រីនិត, Hello VOA, រដ្ឋ​អ៊ីលីណយ, ២៤ កក្កដា ២០២៣)

ខណភាព​ស្រប​ច្បាប់​របស់​គណបក្ស​ភ្លើងទៀន​នៅ​មិនទាន់ច្បាស់​លាស់​ដោយ​សារ​មិនមាន​លិខិត​នីត្យានុកូលកម្ម ការ​ប្រឹងប្រែង​របស់​មន្ត្រី​មកពី​គណបក្ស​ប្រឆាំង​នេះ​ដើម្បី​រក្សា​សិទ្ធិ​ឈរឈ្មោះ​បោះឆ្នោត​ មិន​ប្រាកដថា​អាច​ឈរ​ក្នុង​នាម​គណបក្ស​ភ្លើងទៀន​នោះទេ។ ​លោក ហ៊ុល រស្មី រាយការណ៍​ពី​ខេត្តកំពង់​ធំ ដែល​គណបក្ស​ប្រឆាំង​នេះ​បាន​ឈ្នះ ៣ក្នុងចំណោម៤ឃុំ នៅ​ទូទាំង​ប្រទេស​ក្នុង​ការ​បោះឆ្នោត​ឃុំសង្កាត់​ឆ្នាំ២០២២។

មួយ​ឆ្នាំ​កន្លះ​បន្ទាប់​ពី​រុស្ស៊ីបាន​ឈ្លានពាន​ប្រទេស​អ៊ុយក្រែន ​គ្រាប់មីន​មិន​ទាន់​ផ្ទុះ ​និង​គ្រាប់​បែក​ត្រូវបាន​គេ​រក​ឃើញ​នៅក្នុង​ដែនដី​ជិត​៤០​ ភាគរយ​របស់អ៊ុយក្រែន។ សម្ព័ន្ធមិត្ត​របស់​អ៊ុយក្រែន មាន​ជប៉ុន កម្ពុជា ប៉ូឡូញ និង​សហរដ្ឋអាមេរិក កំពុង​ជួយ​ដល់​កិច្ច​ប្រឹងប្រែង​ដោះ​មីន។ ប្រធាន​ការិយាល័យ ​VOA ប្រចាំ​នៅ​អឺរ៉ុប​ខាងកើត អ្នកស្រី​ Myroslava Gongadze បាន​ទៅ​មើល​ទី​កន្លែង​មួយ​នៅ​ប្រទេសប៉ូឡូញ ​ដែល​អ្នក​ឯកទេស​កម្ពុជា​កំពុង​បណ្តុះបណ្តាល​បុគ្គលិក​សង្គ្រោះ​បន្ទាន់​អ៊ុយក្រែន​ឱ្យ​ប្រើ​ឧបករណ៍​ដោះ​មីន​របស់​ជប៉ុន។ លោក​ សាយ មុន្នី​ សូម​ជូន​សេចក្តី​ប្រែ​សម្រួល​ដូច​តទៅ៖