កិច្ច​ប្រជុំ​ចង្អៀត​រដ្ឋមន្ត្រី​ការ​បរទេស​អាស៊ាន​បាន​ធ្វើ​ឡើង​នៅ​រាជ​ធានី​ភ្នំពេញ​ កាល​ពីថ្ងៃ​ពុធ​និង​ថ្ងៃ​ព្រហស្បតិ៍​ ហើយ​វិបត្តិក្រោយ​រដ្ឋ​ប្រហារ​នៅ​ប្រទេស​ភូមា​បាន​គ្របដណ្ដប់​របៀប​វារៈ​សំខាន់​នៃ​កិច្ច​ពិភាក្សា​រវាង​ប្រមុខ​ការ​ទូត​តំបន់​អាស៊ីអគ្នេយ៍​មួយ​នេះ។​ ទោះការ​ខ្វែង​គំនិត​គ្នា​បន្ត​កើត​មានលើ​វិធី​សាស្ត្រ​របស់​អាស៊ាន​ក្នុង​ការ​អន្តរាគមន៍​វិបត្តិ​ភូមា​ លោក ប្រាក់ សុខុន រដ្ឋមន្ត្រី​ការ​បរទេស​កម្ពុជា​បាន​ផ្ដើម​ការងារ​ជា​ផ្លូវ​ការ​ក្នុង​នាម​ជា​ប្រេសិត​ពិសេស​របស់​អាស៊ាន​ ដោយ​បាន​បង្ហើប​ពី​គម្រោង​ទៅ​ទស្សនកិច្ច​រដ្ឋធានី​ណៃពិដោរ​និង​ទីក្រុងរ៉ង់ហ្គូនជា​លើក​ដំបូង​ក្នុង​ឋានៈ​តួនាទី​ថ្មី​មួយ​នេះ។

ប្រមុខ​ការ​ទូត​កម្ពុជា ឡាវ ឥណ្ឌូណេស៊ី ម៉ាឡេស៊ី ហ្វីលីពីន សិង្ហបុរី ​ដែល​មាន​វត្តមាន​ផ្ទាល់ និងប្រមុខ​ការ​ទូត​ព្រុយណេ ថៃ និងវៀតណាម ដែល​មាន​វត្តមាន​តាម​អន​ឡាញ កំពុង​ចូលរួម​ក្នុង​កិច្ច​ប្រជុំ​ចង្អៀត​រដ្ឋមន្ត្រី​ការ​បរទេស​អាស៊ាន​ដែល​ធ្វើ​ឡើង​នៅ​ខណ្ឌ​ចម្ការ​មន​រាជ​ធានី​ភ្នំពេញ។ មុន​កិច្ច​ប្រជុំ​លោក​ ប្រាក់ សុខុន ​សម្ដែង​ការ​សោក​ស្ដាយ​ដែល​រដ្ឋ​មន្ត្រី​អាស៊ាន​១០​ប្រទេស​នៅ​មិន​ជុំ​គ្នា ខ្វះ​ប្រទេស​ភូមា តែ​លោក​ស្នើ​ឱ្យ​រដ្ឋ​សមាជិក​សម្ដែង​ឆន្ទៈ​និង​កាយ​វិការ​ស្រុះស្រួល​យោគ​យល់ ដើម្បី​ដោះស្រាយ​បញ្ហា​ខ្វែង​គំនិត​គ្នា​នៅ​ក្នុង​ចង្កោម​អង្គការ​ថ្នាក់​តំបន់​មួយ​នេះ៕

លោក​រដ្ឋ​មន្ត្រី​ការ​បរទេស​វៀតណាម Bui Thanh Son បាន​តេស្ដ​វិជ្ជមាន​កូវីដ១៩​ នៅរសៀល​ថ្ងៃ​ពុធ ពេល​មក​ដល់​អាកាស​យាន​ដ្ឋាន​អន្តរ​ជាតិ​ភ្នំពេញ​ ដើម្បីត្រៀម​ចូល​រួម​កិច្ច​ប្រជុំ​ចង្អៀត​រដ្ឋមន្ត្រី​ការ​បរទេស​អាស៊ាន​ដែល​កម្ពុជា​ធ្វើ​ជា​ប្រធាន​ដឹក​នាំ​នៅ​សប្ដាហ៍​នេះ។

នៅ​យប់​មុន​កិច្ច​ប្រជុំ​ចង្អៀត​រដ្ឋមន្ត្រី​ការ​បរទេស​អាស៊ាន​នៅ​ថ្ងៃ​ព្រហស្បតិ៍ ​ លោក​ ប្រាក់ សុខុន  រដ្ឋ​មន្ត្រី​ការ​បរទេស​កម្ពុជា​ បាន​អំពាវនាវ​ឱ្យ​អង្គការ​ថ្នាក់​តំបន់​មួយ​នេះ​រួបរួម​ឯក​ភាព​គ្នា​នៅ​ចំ​ពេល​មាន​ការ​ខ្វែង​គំនិត​គ្នា​មួយ​ចំនួន ​រួម​ទាំង​បញ្ហា​អភិក្រម​តំបន់​ដើម្បី​ឆ្លើយ​តប​នឹង​វិបត្តិ​ក្រោយ​រដ្ឋ​ប្រហារ​នៅ​ប្រទេស​ភូមា។

កិច្ច​ប្រជុំ​ចង្អៀត​នៃ​ប្រមុខ​ការ​ទូត​អាស៊ាន​បាន​ចាប់​ផ្ដើម​ហើយ​នៅ​ រាជធានី​ភ្នំពេញ​ ជាមួយ​នឹង​ការ​ប្រជុំ​នៃ​ឧត្ដម​មន្ត្រី​ ឬ​មន្ត្រី​បច្ចេក​ទេស​ជាន់​ខ្ពស់​នៃ​បណ្ដា​រដ្ឋ​ជា​សមាជិក។ ​របប​សឹក​ភូមា​បាន​បដិសេធ​ការ​ចូលរួម​ ក្រោយ​អាស៊ាន​អនុញ្ញាត​ឱ្យ​ខ្លួន​ចូល​រួម​ត្រឹម​កម្រិត​មន្ត្រី​បច្ចេក​ទេស​មិន​មែន​នយោបាយ។​ តែយ៉ាងណា មន្ត្រី​ការទូតកម្រិតបច្ចេកទេស​ភូមា​នៃក្រសួងការបរទេសដែលគ្រប់គ្រងដោយរបបសឹក បាន​ត្រូវ​គេ​ដឹង​ថា​បាន​ចូលរួម​កិច្ច​ប្រជុំ​ឧត្ដម​មន្ត្រីកាល​ពី​ព្រឹក​ថ្ងៃ​ពុធ​ដែរ តាម​រយៈ​ប្រ​ព័ន្ធ​វីដេអូ។​ ក្នុង​កិច្ច​ប្រជុំ​ចង្អៀត​នេះ​ លោក ប្រាក់​ សុខុន រដ្ឋមន្ត្រី​ការ​បរទេស​កម្ពុជា​នឹង​ថ្លែង​អំពី​របៀប​វារៈ​គន្លឹះៗ​និង​គម្រោង​សមិទ្ធផល​ដែល​ទីក្រុង​ភ្នំពេញ​ប្រាថ្នា​សម្រេច​ឱ្យ​បាន​ក្នុង​នាម​ជា​ប្រធាន​អង្គការ​ថ្នាក់​តំបន់​ដ៏​សំខាន់​មួយ​នេះ៕

កញ្ញា សេង ធារី ដែល​ជា​មេធាវី​ខ្មែរ​អាមេរិកាំង និង​ជា​អ្នកតស៊ូ​មតិ​ដើម្បី​សិទ្ធិ​មនុស្ស​នៅ​ប្រទេស​កម្ពុជា កំពុង​ប្រឈម​នឹង​រឿងក្តីក្តាំ​នៅ​តុលាការ​កម្ពុជា​ពាក់ព័ន្ធ​នឹង​ភាពសកម្ម​ក្នុង​សង្គម។ បើ​តុលាការ​រក​ឃើញ​ថា មាន​ទោស​កំហុស គឺ​អ្នកច្បាប់​រូបនេះ អាច​ត្រូវ​ជាប់​ពន្ធនាគារ​រហូត​ដល់​១២​ឆ្នាំ។ ប៉ុន្តែ កញ្ញា​នៅ​តែ​ប្តេជ្ញា​ជួយ​លើក​កម្ពស់​សិទ្ធិ​មនុស្ស​ក្នុង​ប្រទេស​កម្ពុជា​ដោយ​យល់​ថា ត្រូវតែ​ប្រើប្រាស់សំឡេង​រិះគន់​ដែល​នៅសល់​តិចតួច​ចុងក្រោយ​នេះ។ លោក ម៉ែន គឹមសេង នៃ​វីអូអេ​បាន​សម្ភាស​កញ្ញា សេង ធារី អំពី​ការប្រឹងប្រែង​នេះ៕

នៅ​ព្រឹក​ថ្ងៃ​ទី​១៩ ខែ​មករា ឆ្នាំ​២០២២​នេះ លោក កឹម សុខា បាន​ចូលរួម​សវនាការក្រោយ​ពន្យារ​ ពេល​អស់​រយៈពេល​ជិត​ពីរ​ឆ្នាំ ក្រោម​ហេតុ​ផល​ថា បារម្ភ​អំពី​ការ​រីក​រាល​ដាល​ជំងឺ​កូវីដ១៩។​ ការ​បន្ត​សវនាការ​ជាថ្មីនេះ ធ្វើ​ឡើង​ស្រប​ពេល​ដែល​បរិយាកាស​នយោបាយ​របស់​បក្ស​ជំទាស់​មាន​ភាព​ចម្រូងចម្រាស។ អ្នកនាង​ កាន់ វិច្ឆិកា អ្នកនាង​ ខាន់ សុគុំមនោ កញ្ញា​ ហ៊ាន សុជាតា និងលោក​ អូន ឆេងប៉រ រាយការណ៍​ឲ្យ​វីអូអេ​ពី​រាជធានី​ភ្នំពេញ។

វិលត្រឡប់ទៅចូលរួមសវនាការវិញនៅព្រឹកថ្ងៃពុធនេះ លោក កឹម សុខា ស្នើតុលាការទម្លាក់បទចោទ លើសំណុំរឿងសន្ទិដ្ឋិភាពជាមួយបរទេស។ ឆ្លើយតបនឹងសំណួរអ្នកសារព័ត៌មាននៅគេហដ្ឋានរបស់លោក ជុំវិញគម្រោងវិលចូលរួមនយោបាយវិញ លោកថា៖ «វាអាស្រ័យទៅលើអ្វីដែលប្រាថ្នាចង់បាន ហើយបាន នឹងបានហើយ»។ យ៉ាងណាលោក កឹម សុខា ថាលោកមិនទាន់និយាយបាននោះទេ ថានឹងចូលរួមជាមួយគណបក្សណាមួយនោះ៕

អតីត​អ្នកតំណាងរាស្ត្រ​នៃ​គណបក្ស​សង្គ្រោះ​ជាតិ​មួយ​ក្រុម បាន​បែក​មក​បង្កើត​គណបក្ស​នយោបាយ​ថ្មី គឺ​គណបក្ស​កែទម្រង់​កម្ពុជាដោយ​ក្តី​សង្ឃឹម​ថា នឹង​ទទួល​បាន​សំឡេង​ពី​អ្នកបោះឆ្នោត​ដែល​ធ្លាប់​គាំទ្រ​គណបក្ស​សង្គ្រោះជាតិ​ក្នុង​ពេល​កន្លងមក។ អ្នកស្រី ទេព សុទ្ធី អតីត​អ្នកតំណាងរាស្ត្រ​មួយ​រូប និង​ជាខ្មែរ​អាមេរិកាំង ក៏​បាន​ចូលរួម​បង្កើត​គណបក្ស​ថ្មី​នេះ​ដែរ។ អ្នកស្រី​ទទួល​បន្ទុក​កិច្ចការ​យុវជន​និង​ស្ត្រី។ លោក ម៉ែន គឹមសេង នៃ​វីអូអេ​បាន​សម្ភាស​អ្នកស្រី ទេព សុទ្ធី​ក្នុង​ខណៈពេល​ដែល​អ្នកស្រី​អញ្ជើញ​មក​សហរដ្ឋ​អាមេរិក​ដើម្បី​ទាក់ទាញ​ការគាំទ្រ​ពី​ពលរដ្ឋ​ខ្មែរ​អាមេរិកាំង៕

លោក ចៅ សុខារី បាន​ក្លាយជា​ខ្មែរ​អាមេរិកាំង​ដំបូង​គេ​ដែល​បាន​ជាប់​ឆ្នោត​ជា​ចៅហ្វាយក្រុង Lowell រដ្ឋ Massachusetts ដោយ​ទទួល​បាន​សំឡេង​គាំទ្រ​ជា​ឯកច្ឆន្ទ​ពី​សមាជិក​ក្រុម​ប្រឹក្សា​ក្រុង​ដទៃ​ទៀត។ អតីត​កុមារ​ភៀសខ្លួន បាន​ខិតខំ​តស៊ូ​សម្រេច​បាន​ក្តីសុបិន​លើ​ទឹកដី​សហរដ្ឋ​អាមេរិក បើទោះបី​ជា​កំព្រា​ឪពុក​ដែល​ត្រូវ​បាន​របប​កុម្មុយនិស្ត​ខ្មែរ​ក្រហម​សម្លាប់​ក៏ដោយ។ លោក ពិន ស៊ីសុវណ្ណ នៃ​វីអូអេ ជូន​សេចក្តី​រាយការណ៍​ពី​ទីក្រុង Lowell រដ្ឋ Massachusetts៕