សារព័ត៌មាន​ថៃ​បាន​ចុះផ្សាយ​ជាបន្តបន្ទាប់​ថា បុគ្គល​ម្នាក់​ទៀត​ដែល​ជា​ជនជាតិ​ខ្មែរ និង​ជា​សមាជិក​គណបក្ស​ប្រជាជន​កម្ពុជា​ត្រូវបាន​តុលាការ​ថៃ​ចេញ​ដីកា​ឱ្យ​ចាប់ខ្លួន ពាក់ព័ន្ធនឹង​ការបាញ់​សម្លាប់​សកម្មជន​ខ្មែរ​នៅ​ទីក្រុង​បាងកក។ បុគ្គល​ម្នាក់​នោះ​ត្រូវបាន​បង្ហាញ​អត្តសញ្ញាណ​ថា ឈ្មោះ លី រតនរស្មី ដែល​លោក​ត្រូវបាន​រាយការណ៍​ថា​ជា​ទីប្រឹក្សា​របស់​អតីត​នាយក​រដ្ឋមន្រ្តី​កម្ពុជា លោក ហ៊ុន សែន។ លោក ស៊ុន ណារិន រាយការណ៍​ឱ្យ​វីអូអេ​ពី​រាជធានី​ភ្នំពេញ៕

អតីត​ប្រធានាធិបតី​សហរដ្ឋ​អាមេរិក​លោក Jimmy Carter បាន​ទទួល​មរណភាព​កាលពី​ថ្ងៃទី​២៩ ខែធ្នូ នៅ​ជន្មាយុ១០០ឆ្នាំ ។ លោក​ Carter ​បាន​ធ្វើ​ដំណើរ​ជុំវិញ​ពិភពលោក​«ប្រយុទ្ធ​នឹង​ជំងឺ​ឆ្លង កសាង​ក្តីសង្ឃឹម និងសន្តិភាព»។ អតីត​ជនភៀសខ្លួន​ខ្មែរ​លោកវេជ្ជបណ្ឌិត សុង តាន់​ ប្រធាន​សមាគម​សុខាភិបាល​ខ្មែរ​នៅ​អាមេរិក​បាន​ចងចាំ​ពី​ការប្រឹងប្រែង​របស់​លោក​អតីត​ប្រធានាធិបតីជួយ​ជនភៀសខ្លួន​ខ្មែរ៕

កាលពី​ថ្ងៃចន្ទ ប្រជាកសិករ​ធ្វើស្រែ​មួយចំនួន​ក្នុង​ឃុំព្រៃតូច ស្រុកមោងឫស្សី ខេត្តបាត់ដំបង ចេញមុខ​តវ៉ា​ទាមទារ​ឱ្យ​រដ្ឋាភិបាល​ជួយ​ដំឡើង​តម្លៃ​ស្រូវ ខណៈ​ពួកគេ​ថា តម្លៃ​បច្ចុប្បន្ន​ទាប។ រដ្ឋមន្រ្តី​កសិកម្ម​បាន​លើក​ឡើង​ថា កន្លងទៅ ក្រសួង​ធ្លាប់​បាន​អំពាវនាវ​ឱ្យ​ប្រជាពលរដ្ឋ​ដាំស្រូវ​ក្រអូប ជាជាង​ស្រូវ​ដែល​ពឹងផ្អែក​លើ​ទីផ្សារ​វៀតណាម។ លោក ស៊ុន ណារិន រាយការណ៍​ឱ្យ​វីអូអេ​ពី​រាជធានី​ភ្នំពេញ៕

ស្ថានទូតសហរដ្ឋអាមេរិកប្រចាំកម្ពុជា នៅថ្ងៃសុក្រ បានប្រកាសបើកការជួបជុំអតីតអ្នកចូលរួមកម្មវិធីអ្នកដឹកនាំអាស៊ីអាគ្នេយ៍វ័យក្មេង ឬហៅកាត់ថា YSEALI ជាលើកដំបូងនៅរាជធានីភ្នំពេញ។ កម្មវិធីនេះធ្វើឡើងពីថ្ងៃទី១០ ដល់ទី១២ ខែមករា ឆ្នាំ២០២៥ ដោយមានយុវជនប្រមាណជា១២៥នាក់មកពីទូទាំងប្រទេសក្នុងតំបន់អាស៊ាន ដែលរួមមានទាំងប្រទេសទីម័រខាងកើតផង ដើម្បីប្រមូលផ្តុំ និងផ្លាស់ប្តូរយោបល់។ អ្នកនាង កាន់ វិច្ឆិកា រាយការណ៍លម្អិតឲ្យវីអូអេពីរាជធានីភ្នំពេញ៕

ត្រឹមអាយុ ១២ ឆ្នាំ កញ្ញា ពៅ ប៉ុន្នីសា បានរកឃើញទេពកោសល្យរបស់នាងខាងតន្ត្រីបុរាណខ្មែរដោយបានក្លាយជាអ្នកលេងរនាតឯកដ៏ចំណានម្នាក់ បន្ទាប់ពីទទួលបានការបណ្តុះបណ្តាលជាច្រើនឆ្នាំនៅសមាគមសិល្បៈខ្មែរអមតៈ។ ទេពកោសល្យនេះទៀតសោត អមជាមួយនឹងឆន្ទៈតស៊ូនឹងឧបសគ្គក្នុងជីវិត បានធ្វើឲ្យសិល្បការិនីតន្ត្រីរនាតឯករូបនេះបានបញ្ចប់ការសិក្សានៅសហរដ្ឋអាមេរិកទៀតផង។ បច្ចុប្បន្ននេះ កញ្ញា ពៅ ប៉ុន្នីសា កំពុងប្រើប្រាស់សិល្បៈដូរតន្ត្រីបុរាណខ្មែរដ៏ចំណាស់មួយនេះដើម្បីចូលរួមអប់រំអំពីការផ្សះផ្សារផ្លូវចិត្ត តាមរយៈកិច្ចការងាររបស់នាងក្នុងនាមជាអ្នកសម្របសម្រួលកម្មវិធីសិល្បៈដើម្បីផ្សះផ្សារផ្លូវចិត្តប្រចាំសារមន្ទីរនិងអនុសារណដ្ឋានខ្មែរ នៅក្នុងទីក្រុង Chicago រដ្ឋ Illinois។ អ្នកនាង នីណា យេង រាយការណ៍លម្អិតពីទីក្រុង Chicago៕

នៅពេល​ដែល​ការបោះឆ្នោត​ជ្រើសរើស​ប្រធានាធិបតី​នៅ​សហរដ្ឋ​អាមេរិក​បាន​បញ្ចប់​ ពុទ្ធសាសនិក​ខ្មែរ-អាមេរិកាំង​ក្នុង​រដ្ឋ Virginia ​កំពុង​ផ្តោត​លើ​អ្វី​ដែល​បង្រួប​បង្រួម​ពួកគេ​ ជាជាង​អ្វី​ដែល​បែងចែក​ពួកគេ។ ទោះបីជា​មាន​ទស្សនៈ​នយោបាយ​ខុសគ្នា​ក៏ដោយ​ ក៏​សហគមន៍​នៅ​វត្តខ្មែរ​សាមគ្គី ​ក្នុង​ស្រុក​ Henarito ​រដ្ឋ Virginia ​ផ្តល់​អាទិភាព​ដល់​ការរួបរួម ​និង​ការលើក​កម្ពស់​សហគមន៍។ លោក ​ម៉ែន គឹមសេង ​សូម​ជូន​សេចក្តីរាយការណ៍​ដូច​តទៅ៖

មេដឹកនាំគណបក្សកម្លាំងជាតិ លោក ស៊ុន ចន្ធី នៅថ្ងៃព្រហស្បតិ៍នេះ ត្រូវបានសាលាដំបូងរាជធានីភ្នំពេញកាត់ទោសដាក់ពន្ធនាគាររយៈពេល ២ ឆ្នាំពីបទចោទប្រកាន់ញុះញង់ឲ្យមានភាពវឹកវរក្នុងសង្គម។ តុលាការរាជធានីភ្នំពេញក៏បានសម្រេចដកសិទ្ធិឈរឈ្មោះឲ្យគេបោះឆ្នោត និងសិទ្ធិបោះឆ្នោតរបស់អ្នកនយោបាយរូបនេះផងដែរ។ លោក ស៊ុន ណារិន រាយការណ៍ឲ្យវីអូអេពីរាជធានីភ្នំពេញ៕

នៅពេល​បិទបញ្ចប់​ទស្សនកិច្ច​របស់​លោក​នៅប្រទេស​កម្ពុជា កាលពីថ្ងៃ​ពុធឧត្តមនាវី Samuel J. Paparo បញ្ជាការនៃបញ្ជាការដ្ឋានតំបន់ឥណ្ឌូប៉ាស៊ីហ្វិក បាន​ប្រាប់​សន្និសីទព័ត៌មាន​មួយ​នៅទីក្រុង​ព្រះសីហនុថា ​ប្រទេស​កម្ពុជា មានចំណែក​ក្នុងការរក្សា​សន្តិសុខ​ក្នុងតំបន់​ឥណ្ឌ​ប៉ាស៊ីស៊ីហ្វិក និងនៅ​សមុទ្រ​ខាង​ត្បូង។ ក្នុងការ​ពង្រឹង​ទំនាក់ទំនង​យោធា​ជាមួយ​កម្ពុជា លោក​ឧត្តម​នាវី Paparoថា ភាគី​អាមេរិក និង​កម្ពុជា​បានពិភាក្សា​អំពីការ​ពង្រីកកម្មវិធី​លំហាត់​យោធា ហើយអាច​នឹង​មានការ​ចាប់​ផ្តើម​ឡើងវិញនូវសមយុទ្ធយោធាន​ដែលធ្លាប់ធ្វើឡើង​កន្លង​មក។ លោកហ៊ុល រស្មី​ រាយការណ៍​ឱ្យវីអូអេ​ពីក្រុង​ព្រះសីហនុដូច​តទៅ៖

អ្នកនាំពាក្យគណបក្សប្រជាជនកម្ពុជា លោក សុខ ឥសាន បានលើកឡើងថា គណបក្សកាន់អំណាចអាច​នឹងពន្លឿនដំណើរការ​បង្កើត​ច្បាប់ស្តីពី​ភេរវកម្ម​ប្រឆាំងនឹងក្រុមជំទាស់នៅក្រៅប្រទេស ប្រសិនបើមានការបង្កើតរដ្ឋាភិបាល ក្រៅ​ប្រទេស។ នេះជាការឆ្លើយតបមួយទៅកាន់មេដឹកនាំគណបក្សជំទាស់ដែល កំពុងនិរទេសខ្លួននៅក្រៅប្រទេស លោក សម រង្ស៊ី ដែលកាលពីខែវិច្ឆិកា បាន ប្រកាសបង្កើត«ចលនាជាតិតស៊ូ»មួយ ក្នុងគោលបំណងទាមទាររដ្ឋាភិបាល​កម្ពុជា វិលត្រឡប់មកដឹកនាំតាមបែបប្រជាធិបតេយ្យ និង​ដើម្បី​ធានា​សេរីភាព និង​យុត្តិធម៌​ពេញលេញ​ដល់​ប្រជាពលរដ្ឋខ្មែរ។ លោក ស៊ុន ណារិន រាយការណ៍​ឲ្យ​វីអូអេ​ពី​រាជធានី​ភ្នំពេញ៕

ក្រសួងព័ត៌មាន​កំពុង​ធ្វើ​វិសោនធកម្ម​ស្តីពី​របប​សារព័ត៌មាន​ដែល​ត្រូវ​បាន​អនុម័ត​តាំង​ពី​ឆ្នាំ​ ១៩៩៥។ នៅក្នុង​«សន្និសីទ​លើក​ទីពីរ​ស្តីពី​ការ​អភិវឌ្ឍ​ប្រព័ន្ធ​ផ្សព្វផ្សាយលើក​កម្ពស់​សេរី​ភាព​ក្នុង​ការ​បញ្ចេញមតិ​ក្នុង​យុគ​សម័យ​ឌីជីថល» ​ដែល​រៀបចំ​ដោយ​ក្រសួង​ព័ត៌មាន និង​អង្គការ​យូណេស្កូ​ រដ្ឋមន្រ្តី​ក្រសួង​ព័ត៌មាន​លោក នេត ភក្ត្រា ​អះអាង​ថា​ ក្រសួង​នឹង​រៀបចំ​សិក្ខាសាលា​ពិគ្រោះ​យោបល់​លើ​ច្បាប់​មួយ​នេះ។ លោក​បាន​ថ្លែងដូច្នេះ ជា​ការ​ឆ្លើយ​តប​ទៅ​នឹង​ការ​ព្រួយ​បារម្ភ​អំពី​ការ​មិន​អនុញ្ញាត​ឲ្យ​មាន​ការ​ពិភាក្សា​ពី​គ្រប់​ភាគី​ពាក់ព័ន្ធ។ លោក លាស់ លីបលីប រាយការណ៍​លម្អិត​ឲ្យវីអូអេ​ពី​រាជធានី​ភ្នំពេញ៕