កាលពីពេលថ្មីៗនេះ ក្រសួងសុខាភិបាលបានចេញសេចក្តីណែនាំមួយ ដោយក្រើនរំឭកឱ្យពលរដ្ឋប្រុងប្រយ័ត្ន និងបង្ការការឆ្លងជំងឺគ្រុនឈាមនាដើមឆ្នាំ ២០២៥នេះ។ ប្រជាពលរដ្ឋមួយចំនួននៅរាជធានីភ្នំពេញបានបង្ហាញក្តីព្រួយបារម្ភអំពីជំងឺគ្រុនឈាម ខណៈពួកគេរស់នៅក្នុងទីតាំងដែលមានសត្វមូសច្រើន។ ក្រសួងសុខាភិបាលក៏បានបាញ់ថ្នាំមូសតាមបណ្តាខណ្ឌមួយចំនួនជាបន្តបន្ទាប់ផងដែរ ក្នុងរាជធានីភ្នំពេញ ដើម្បីកាត់បន្ថយជម្រកសត្វមូស។ តទៅនេះជាមតិរបស់ប្រជាពលរដ្ឋនៅក្នុងសង្កាត់បឹងទំពុន ខណ្ឌមានជ័យ រាជធានីភ្នំពេញ៕

បន្ទាប់ពីត្រូវបានកាត់ទោសដោយសាលាដំបូងរាជធានីភ្នំពេញឲ្យជាប់ឃុំក្នុងគេហដ្ឋានរយៈពេល ២៧ ឆ្នាំមក លោក កឹម សុខា អតីតប្រធានគណបក្សសង្គ្រោះជាតិដែលត្រូវបានរំលាយ បាននិងកំពុងតតាំងនឹងសំណុំរឿងក្តីលោកនៅសាលាឧទ្ធរណ៍ ដែលបានបើកសវនាការចំនួនជាង ១០ លើកមកហើយ។ មេធាវីការពារក្តីរបស់អ្នកនយោបាយរូបនេះ រួមទាំងអង្គការសង្គមស៊ីវិលមួយចំនួន បានស្នើឲ្យតុលាការជាន់ខ្ពស់មួយនេះពន្លឿននីតិវិធីកាត់ក្តីលោក កឹម សុខា ដើម្បីធានាឲ្យបាននូវសិទ្ធិទទួលបានការកាត់ក្តីដោយត្រឹមត្រូវ និងដើម្បីចៀសវាងការរិះគន់និងការថ្កោលទោសពីបណ្តាប្រទេសប្រជាធិបតេយ្យអំពីការដើរថយក្រោយនៃលទ្ធិប្រជាធិបតេយ្យនៅកម្ពុជា។ លោក ហ៊ុល រស្មី រាយការណ៍ឲ្យវីអូអេពីរាជធានីភ្នំពេញ៕

មន្រ្តី​ទទួល​បន្ទុក​ការដោះ​មីន​នៅ​កម្ពុជា លោក ហេង រតនា អះអាង​ថា ចិន​បាន​ផ្តល់​ជំនួយ​ជាង​៤លាន​ដុល្លារ​អាមេរិក​សម្រាប់​ការដោះ​មីន​នៅ​កម្ពុជា។ ក៏ប៉ុន្តែ​លោក​ថា ជំនួយ​ចិន​នោះ​មិន​មែន​ជំនួស​ជំនួយ​អាមេរិក​ដែល​ត្រូវ​បាន​បង្កក​នោះ​ទេ ហើយ​ការបាត់បង់​ប្រភព​ជំនួយ​ពី​អាមេរិក​នេះ​នៅ​បន្ត​ប៉ះពាល់​ដល់​កិច្ចប្រឹងប្រែង​ក្នុង​ការដោះ​មីន​នៅ​កម្ពុជា។ លោក លាស់ លីបលីប រាយការណ៍​ឱ្យ​វីអូអេ​ពី​រាជធានី​ភ្នំពេញ៕

ប្រធាន​គណបក្ស​កម្លាំង​ជាតិ លោក ស៊ុន ចន្ធី សម្រេច​មិន​ប្តឹង​ទាស់​ដោយ​សុខចិត្ត​យក​តាម​ការសម្រេច​របស់​តុលាការ​ជាន់​ទាប ដែល​ផ្តន្ទាទោស​ឱ្យ​លោក​ជាប់​ពន្ធនាគារ​រយៈពេល​២ឆ្នាំ ក្រោម​ហេតុផល​ថា លោក​មិន​មាន​ជំនឿ​លើ​តុលាការ​ឡើយ។ កាលពី​ធ្នូ ឆ្នាំ២០២៤ លោក ស៊ុន ចន្ធី ត្រូវបាន​សាលាដំបូង​រាជធានី​ភ្នំពេញ​ផ្តន្ទាទោស​ឱ្យ​ជាប់​ពន្ធនាគារ​រយៈពេល​២​ឆ្នាំ និង​បាន​ដក​សិទ្ធិ​របស់​លោក​មិន​ឱ្យ​បោះឆ្នោត និង​ដក​សិទ្ធិ​មិន​ឱ្យ​ឈរឈ្មោះ​បោះឆ្នោត​ជា​ស្ថាពរ ក្រោម​បទ​ចោទ​ប្រកាន់​«ញុះញង់​បង្ក​ភាពវឹកវរ​ធ្ងន់ធ្ងរ​ដល់​សន្តិសុខ​សង្គម»។ លោក ស៊ុន ណារិន រាយការណ៍​ឲ្យ​វីអូអេ​ពី​រាជធានី​ភ្នំពេញ៕

កាលពី​ដើម​ខែមករា អ្នកកាសែត​បរទេស​ម្នាក់​ដែល​រាយការណ៍​ផ្នែក​បរិស្ថាន​ក្នុង​ប្រទេស​កម្ពុជា​ជាច្រើនឆ្នាំ​មកហើយ ត្រូវ​បាន​អាជ្ញាធរ​នៅ​ព្រលាន​យន្តហោះ​ខេត្ត​សៀមរាប​មិន​អនុញ្ញាត​ឲ្យ​ចូល​ប្រទេស​កម្ពុជា​ឡើយ។ អង្គការ​សង្គម​ស៊ីវិល​បាន​ថ្កោលទោស​ការហាមប្រាម​អ្នកកាសែត​ស៊ើបអង្កេត​រូប​នេះ ហើយ​ថា វា​ប៉ះពាល់​ដល់​សេរីភាព​សារព័ត៌មាន​នៅ​ក្នុង​ប្រទេស​កម្ពុជា។ លោក ស៊ុន ណារិន រាយការណ៍​ឲ្យ​វីអូអេ​ពី​រាជធានី​ភ្នំពេញ៕

អ្នកតាមដាន​នៅ​កម្ពុជា​អះអាង​ថា សហរដ្ឋ​អាមេរិក​អាច​នឹង​ប្រើប្រាស់​ជំនួយ​របស់​ខ្លួន​ដើម្បី​ពង្រឹង​និង​ពង្រីក​ឥទ្ធិពល​របស់ខ្លួន​នៅ​លើ​បណ្តា​ប្រទេស​ផ្សេងៗ។ ការអះអាង​នេះ ក្រោយ​អាមេរិក​បាន​សម្រេច​បង្កក​ជំនួយ​បរទេស​របស់​ខ្លួន ហើយ​អាមេរិក​កំពុងតែ​រៀបចំ​ដាក់​ទីភ្នាក់ងារ​សម្រាប់​ការអភិវឌ្ឍ​អន្តរជាតិ (USAID) មក​នៅ​ក្រោម​ការគ្រប់គ្រង​របស់​ក្រសួង​ការបរទេស​អាមេរិក។ លោក ស៊ុន ណារិន រាយការណ៍​ឱ្យ​វីអូអេ​ពី​រាជធានី​ភ្នំពេញ៕

មន្ត្រីកម្ពុជាបានឲ្យដឹងថា បេសកកម្មដោះមីននិងយុទ្ធភ័ណ្ឌនៅកម្ពុជាកំពុងរងផលប៉ះពាល់ដោយសារការប្រកាសបង្កកជំនួយបរទេសរបស់សហរដ្ឋអាមេរិក ក្រោមរដ្ឋបាលថ្មីរបស់ប្រធានាធិបតីអាមេរិកលោក ដូណាល់ ត្រាំ (Donald Trump)។ កម្ពុជាបានកំណត់គោលដៅដោះមីនសេសសល់នៅកម្ពុជាឲ្យអស់នៅត្រឹមឆ្នាំ ២០៣០ ដែលក្នុងមួយឆ្នាំៗ សហរដ្ឋអាមេរិកបានផ្តល់ជំនួយជាទឹកប្រាក់យ៉ាងតិច ១០ លានដុល្លារអាមេរិកដល់កម្ពុជាក្នុងបេសកកម្មមួយនេះ។ លោក ស៊ុន ណារិន រាយការណ៍លម្អិតឲ្យវីអូអេពីរាជធានីភ្នំពេញ៕

បណ្តាប្រទេស​ជាច្រើន​នៅ​ជុំវិញ​ពិភពលោក​រួមទាំងប្រទេសកម្ពុជា ជាពិសេស​បណ្តាញ​អង្គការ​សង្គមស៊ីវិល កំពុង​ប្រឈម​នឹងផលប៉ះពាល់​ជាច្រើន បន្ទាប់ពី​រដ្ឋបាល​របស់​ប្រធានាធិបតី​សហរដ្ឋ​អាមេរិក​លោក Donald Trump បាន​ប្រកាស​បង្កក​ជំនួយ​បរទេស​រយៈពេល ៩០ ថ្ងៃ។ លោក ស៊ុន ណារិន អ្នកយក​ព័ត៌មាន​ឲ្យ​វីអូអេ បាន​ពិភាក្សា​ជាមួយ​អ្នកដឹកនាំ​អង្គការ​សង្គមស៊ីវិល​និង​អ្នកនាំពាក្យ​រដ្ឋាភិបាល​អំពី​ផលប៉ះពាល់​ទាំងនេះ និង​រាយការណ៍​អំពី​រឿងនេះ​ពី​រាជធានី​ភ្នំពេញ៕

ថ្ងៃទី២០ ខែមករា ឆ្នាំ២០២៥ ជាថ្ងៃដែលលោក ដូណាល់ ត្រាំ ស្បថចូលកាន់តំណែងជាប្រធានាធិបតីសហរដ្ឋអាមេរិកជាលើកទី២ បន្ទាប់ពីលោកបានកាន់តំណែងប្រធានាធិបតីលើកទី១ ក្នុងឆ្នាំ២០១៦។ អ្នកតាមដានភូមិសាស្ត្រនយោបាយយល់ថា កម្ពុជានឹងរងហានិភ័យកាន់តែខ្លាំងលើផ្នែកសេដ្ឋកិច្ច និងវិនិយោគ ប្រសិនបើកម្ពុជាបន្តងាកទៅស្និទ្ធនឹងប្រទេសចិន ក្នុងអាណត្តិទី២នៃការដឹកនាំរបស់លោក ដូណាល់ ត្រាំ។ អ្នកនាង កាន់ វិច្ឆិកា សម្ភាសន៍ លោក សេង វណ្ណលី អ្នកតាមដានភូមិសាស្ត្រនយោបាយ និងជានាយកកម្មវិធីតស៊ូមតិរបស់អង្គការប្រជាធិបតេយ្យខ្មែរ (KDO) ដូចតទៅ៖

ប៉ូលិស​ថៃ​បាន​ទម្លាយ​ថា ករណី​បាញ់​សម្លាប់​អតីត​តំណាងរាស្រ្ត​គណបក្ស​សង្រ្គោះ​ជាតិ លោក លិម គិមយ៉ា នៅ​លើ​ទឹកដី​ថៃ​មិនមែន​ជា​រឿង​នយោបាយ​ឡើយ ហើយ​វា​ជា​ការសងសឹក​ផ្ទាល់ខ្លួន​រវាង​មេខ្លោង​នៃ​ឃាតកម្ម និង​ជនរងគ្រោះ។ ក៏ប៉ុន្តែ មន្រ្តី​គណបក្ស​ជំទាស់​មួយចំនួន​អះអាង​ថា ពួកគេ​មិន​ជឿ​លើ​ការអះអាង​នេះ​ឡើយ ដោយ​ចាត់ទុក​ថា វា​ជា​ការប្រឌិត​រឿង​មួយ​ដើម្បី​បន្ថយ​ភាពតានតឹង។ លោក ស៊ុន ណារិន រាយការណ៍​ឱ្យ​វីអូអេ​ពី​រាជធានី​ភ្នំពេញ៕