ព្រះមហាក្សត្រកម្ពុជា ព្រះបាទសម្តេចព្រះបរមនាថ​នរោត្តម​សីហមុនី​នឹង​យាង​ទៅ​បំពេញ​ទស្សនកិច្ច​នៅ​ខេត្ត​ហៃណាន​នៃ​ប្រទេស​ចិន នៅ​សប្តាហ៍​នេះ គឺ​ចាប់ពី​ថ្ងៃទី ១៩ ដល់​ថ្ងៃទី ២១ ខែធ្នូ ឆ្នាំ ២០២៤ តាម​ការអញ្ជើញ​របស់​ភាគី​ចិន។ បើ​យោង​តាម​សេចក្តី​ប្រកាស​ព័ត៌មាន​របស់​ក្រសួង​ការបរទេស​កម្ពុជា ព្រះរាជ​ទស្សនកិច្ច​នេះ «នឹងពង្រឹងបន្ថែមទៀត​នូវចំណងមិត្តភាព​ដ៏ជិតស្និទ្ធ​រវាង​ប្រជាជន​កម្ពុជា​និង​ប្រជាជន​ចិន ព្រមទាំង​លើកកម្ពស់​កិច្ចសហប្រតិបត្តិ​ការភាពជាដៃគូ​យុទ្ធសាស្រ្ត​គ្រប់ជ្រុងជ្រោយ​រវាង​ប្រទេស​ទាំងពីរ»។ លោក ស៊ុន ណារិន រាយការណ៍​លម្អិត​ឲ្យ​វីអូអេ​ពី​រាជធានី​ភ្នំពេញ៕

កាល​ពី​ពេល​ថ្មី​ៗ​នេះ កាសែត​ថៃ​ឈ្មោះ ​The Nation បាន​ចុះ​ផ្សាយ​ការអះអាង​របស់​លោក ថាក់ស៊ីន ស៊ីណាវ៉ាត់ អតីត​នាយក​រដ្ឋមន្រ្តី​ថៃ​និង​ជា​មិត្ត​ជិត​ស្និទ្ធ​របស់​លោក ហ៊ុន សែន ថា កោះ​គុត​ជា​កម្មសិទ្ធិ​របស់​ថៃ​ផ្តាច់មុខ ដោយ​គ្មាន​ប្រទេស​ណា​អាច​ទាមទារ​បាន​ឡើយ។ លោក​បាន​លើក​ឡើង​នូវ​អនុស្ស​រណៈ​យោគយល់​គ្នា​មួយ​ក្នុងឆ្នាំ ២០០១ ស្តី​ពី​កិច្ច​សហការ​អភិវឌ្ឍ​រួម​នៅ​តំបន់​ប្រេង​ត្រួត​ស៊ីគ្នា ដែល​លោក​ថា​ អនុស្សរណៈ​យោគយល់​គ្នា​នេះ​មិន​និយាយ​អំពី​កោះ​គុត​ដែល​ថៃ​កំពុង​គ្រប់គ្រង​ឡើយ។ លោក ស៊ុន ណារិន រាយការណ៍​ឲ្យ​វីអូអេ​ពី​រាជធានី​ភ្នំពេញ៕

កំពង់ផែទឹក​ជ្រៅ​ក្រុង​ព្រះសីហនុនៅ​ថ្ងៃ​ចន្ទ​ បានទទួលនាវាចម្បាំងសហរដ្ឋអាមេរិកមួយ​គ្រឿង​ឈ្មោះUSS SAVANNAH ដែលមាននាវិកសរុបចំនួន ១០៣នាក់។ ការចូលមកដល់របស់​នាវាអាមេរិក​ជាលើកដំបូងក្នុង​រយៈពេល៨ឆ្នាំចុងក្រោយនេះ គឺជាផ្នែកមួយនៃការពង្រឹង​កិច្ច​សហ​ប្រតិបត្តិការ​រវាង​រដ្ឋាភិបាល​ទីក្រុងភ្នំពេញ និងរដ្ឋធានីវ៉ាស៊ីនតោន​។ ​លោកហ៊ុល រស្មី រាយការណ៍​ឱ្យវីអូអេពីក្រុងព្រះសីហនុដូចតទៅ៖

អតីតសកម្មជនគណបក្សសង្រ្គោះជាតិមួយរូបលោក វឿង សំណាង ត្រូវបានចាប់បញ្ជូនពីប្រទេសថៃ កាលពី ៣ ឆ្នាំមុន។ លោកត្រូវបានកាត់ទោសដោយតុលាការថ្នាក់ក្រោមនៅកម្ពុជា ដោយដាក់ពន្ធនាគារ ៦ ឆ្នាំ ពីបទរួមគំនិតក្បត់និងញុះញង់ឲ្យប្រព្រឹត្តបទឧក្រិដ្ឋជាអាទិ៍។ នៅក្នុងសវនាការតុលាការកំពូលនាថ្ងៃចន្ទ ទី១៦ ខែធ្នូ លោក វឿង សំណាង បានស្នើសុំចៅក្រមទម្លាក់ចោលបទចោទប្រកាន់លើរូបលោក។ លោក ស៊ុន ណារិន និងលោក លាស់ លីបលីប រាយការណ៍ឲ្យវីអូអេពីរាជធានីភ្នំពេញដូចតទៅ៕

ក្នុងពិធីគម្រប់ខួប៣៨ឆ្នាំនៃសមាគមអង្គរ អ្នកតំណាងសមាគមរបស់អតីតជនភៀសខ្លួនខ្មែរនេះចង់កែលក្ខន្តិកៈដើម្បីពង្រីកការជួយឧបត្ថម្ភរបស់ខ្លួនដល់ជនរួមជាតិនៅប្រទេសកំណើត ក្រោយពីសមាជិកសមាគមនេះដែលជាអតីតជនភៀសខ្លួនក្រីក្រ មានជីវភាពធូរធារ។ លោកពិន ស៊ីសុវណ្ណជូនសេចក្តីរាយការណ៍ពីរដ្ឋធានីវ៉ាស៊ីនតោនដូចតទៅ៖

ពលរដ្ឋ​ខ្មែរ​ដែល​កំពុង​រស់​នៅ​និង​ធ្វើការ​នៅ​ប្រទេស​កូរ៉េខាងត្បូង​នឹង​ជួបជុំ​គ្នា​ដើម្បី​អបអរ​សាទរ​ទិវា​សិទ្ធិ​មនុស្ស​អន្តរជាតិ​ដែល​ត្រូវ​ជា​ថ្ងៃ​១០​ខែធ្នូ​ខាង​មុខ។ ការជួប​ជុំ​នឹង​មាន​នៅ​ទីក្រុង​សេអ៊ូល​និង​ទីក្រុង​ក្វាង​ជូ​ដែល​ជា​ទីក្រុង​ល្បី​ឈ្មោះ​ដោយសារ​ការងើបឡើង​តស៊ូ​ដើម្បី​លទ្ធិ​ប្រជាធិបតេយ្យ។​ លោក​ លួន វិបុល​ ប្រធាន​សមាគម​ប្រជាធិបតេយ្យ​ខ្មែរ​នៅ​ក្វាងជូ​បាន​បញ្ជាក់​ថា​ពិធី​អបអរ​សាទរ​នឹង​ធ្វើ​ឡើង​នៅ​ថ្ងៃទី​៨​ខែធ្នូ នៅ​ទីក្រុង​ក្វាងជូ​ដោយ​មាន​គោល​បំណង​ទាមទារ​សិទ្ធិ​និង​អធិបតេយ្យ​ជាតិ​សម្រាប់​ប្រទេស​កម្ពុជា។​ លោក​ ម៉ែន គឹមសេង​ នៃ​វីអូអេ​បាន​សម្ភាស​ លោក​ លួន វិបុល​ ដូច​តទៅ៖

គ្រាដែលគណៈរដ្ឋមន្ត្រីរបស់រាជរដ្ឋាភិបាលកម្ពុជាក្រោមការដឹកនាំរបស់លោកនាយករដ្ឋមន្ត្រី ហ៊ុន ម៉ាណែត បានពិភាក្សាកំណត់យកទឹកប្រាក់ប្រមាណ ៩,៣០០លានដុល្លារអាមេរិក សម្រាប់ផែនការថវិកាជាតិឆ្នាំ ២០២៥ បញ្ហាចម្បងមួយត្រូវបានកត់សម្គាល់ដោយអ្នកជំនាញដែលតម្រូវឱ្យរដ្ឋាភិបាលធ្វើកំណែទម្រង់ស៊ីជម្រៅលើរដ្ឋបាលសាធារណៈរបស់ខ្លួន។ នៅក្នុងកម្មវិធី Hello VOA ស្តីពីអភិបាលកិច្ចល្អនាខែវិច្ឆិកានេះ លោក ឱក សេរីសោភក្តិ៍ អ្នកឯកទេសអភិបាលកិច្ច បានជំរុញឲ្យរដ្ឋាភិបាលបន្ថយចំណាយដែលស្មើនឹងប្រមាណ ៤៥% នៃលើថវិកាជាតិលើមន្ត្រីរាជការកម្ពុជា ដោយពិចារណាលុបចោលមុខតំណែង ឬតួនាទីដែលជាន់គ្នា និងដែលគ្មានប្រសិទ្ធភាពនៅក្នុងការអនុវត្តគោលនយោបាយរបស់រដ្ឋាភិបាលថ្នាក់ជាតិ។ លោកថា ការធ្វើដូច្នេះអាចនឹងជួយរក្សាតុល្យភាពបានមួយកម្រិតនៃចំណាយនិងចំណូលរបស់រដ្ឋាភិបាល ដែលត្រូវដោះស្រាយបញ្ហាប្រឈមជាច្រើនក្នុងប្រទេស៕

ឈុតសម្លៀកបំពាក់សារុងក្រមាតាមរបៀបខ្មែរជាមធ្យោបាយមួយ ដែល គណៈកម្មាធិការវប្បធម៌នៃ សមាគមពុទ្ធសាសនិកខ្មែរនៅតំបន់រដ្ឋធានីវ៉ាស៊ីនតោនទាក់ទាញការគាំទ្រដល់កម្មវិធីថែរក្សា និងបណ្ដុះបណ្ដាលប្រពៃណី និងបេតិកភណ្ឌវប្បធម៌ខ្មែរ តាមរយៈការឆ្លុះបញ្ចាំងអរិយធម៌ដ៏ខ្ពង់ខ្ពស់របស់ខ្មែរអង្គរ។ លោក ពិន ស៊ីសុវណ្ណ ដែលបានចុះយកព័ត៌មានដោយផ្ទាល់ រាយការណ៍ពីទីក្រុង Bethesda រដ្ឋ Maryland ដូចតទៅ៖

នៅថ្ងៃទី២០ ខែវិច្ឆិកា ឆ្នាំ២០២៤ រដ្ឋសភាជាតិកម្ពុជានឹងបោះឆ្នោតអនុម័តផ្តល់សេចក្តីទុកចិត្តក្នុងការតែងតាំងលោក ប្រាក់ សុខុន ជារដ្ឋមន្រ្តីក្រសួងការបរទេសជំនួសលោក សុខ ចិន្តាសោភា ដើម្បីបង្កើនប្រសិទ្ធភាពការងារ។ អ្នកនាង កាន់ វិច្ឆិកា នៃវីអូអេ រាយការណ៍លម្អិតឱ្យវីអូអេពីរាជធានីភ្នំពេញ៕

នៅក្នុងបទសម្ភាសន៍មួយជាមួយវីអូអេនៅផ្ទះរបស់លោកក្នុងរាជធានីភ្នំពេញ កាលពីថ្ងៃទី៣ ខែវិច្ឆិកា ឆ្នាំ២០២៤ លោក ម៉ិច ដារ៉ា ដែលគេស្គាល់ថាជាអ្នកកាសែតដែលហ៊ានរាយការណ៍ពីអំពើឆបោកតាមប្រព័ន្ធអនឡាញ និងការជួញដូរមនុស្សនៅកម្ពុជា លើកឡើងថាលោកលែងធ្វើជាអ្នកសារព័ត៌មានទៀតហើយ ដោយសារតែអារម្មណ៍ភិតភ័យ ហើយការចាប់ខ្លួននិងរស់នៅក្នុងពន្ធនាគារបានប៉ះទង្គិចចិត្ត និងអារម្មណ៍របស់លោកខ្លាំង ដែលធ្វើឱ្យលោកមិនអាចបំភ្លេចបាន។ លោកត្រូវបានចាប់ខ្លួន និងចោទប្រកាន់កាលពីចុងខែកញ្ញា ឆ្នាំ ២០២៤ ពីបទញុះញង់ ទាក់ទងនឹងការបង្ហោះព័ត៌មាននិងសារលើបណ្តាញសង្គម ដែលអាចប្រឈមនឹងការជាប់ពន្ធនាគាររយៈពេល ២ ឆ្នាំ។ លោកត្រូវបានដោះលែងឱ្យនៅក្រៅឃុំបណ្តោះអាសន្ន ប៉ុន្តែតុលាការបានដាក់បម្រាមមិនឱ្យលោកចេញទៅក្រៅប្រទេស។ លោក ស៊ុន ណារិន នៃវីអូអេ រាយការណ៍លម្អិតពីរាជធានីភ្នំពេញ៕