លោក ស៊ុន ចាន់ថុល ឧបនាយករដ្ឋមន្ត្រី​ និង​ជា​អនុប្រធាន​ទី​១​ ក្រុមប្រឹក្សា​អភិវឌ្ឍន៍​កម្ពុជា ​កាល​ពី​ពេល​ថ្មី​នេះ បាន​ដឹកនាំ​គណៈប្រតិភូ​មួយ​បំពេញ​ទស្សនកិច្ច​នៅ​សហរដ្ឋ​អាមេរិក​ដើម្បី​កៀរគរ​អ្នក​វិនិយោគ​អាមេរិក ខណៈមក​ទល់​ពេល​នេះ​ការ​វិនិយោគ​ពីធរុកិច្ច​អាមេរិក​នៅ​កម្ពុជា មាន​ចំនួន​តិច​នៅ​ឡើយ។ មន្ត្រី​ជាន់​ខ្ពស់​កម្ពុជា​រូប​នេះ​អះអាង​ថា រដ្ឋាភិបាល​ថ្មី​ដែល​មាន​អាយុ​១​ឆ្នាំ​របស់​លោក​នាយករដ្ឋមន្ត្រី​ ហ៊ុន ម៉ាណែត ​បាន​ចាត់​វិធានការ​មួយ​ចំនួន​ដែលបាន​ធ្វើ​ឱ្យ​បរិយាកាស​វិនិយោគ​នៅ​កម្ពុជា​ប្រសើរ​ជាង​មុន​សម្រាប់​វិនិយោគិន​អាមេរិក។ លោក សឹង សុផាត ​ជូន​សេចក្តី​រាយការណ៍​ពី​រដ្ឋធានី​វ៉ាស៊ីនតោន៕

ការ​ចាប់​បញ្ជូន​ខ្លួន​អ្នកស្រី ​នួន តឿន ​ដែល​ជា​ពលការិនី​ខ្មែរ​ធ្វើការ​តាម​ផ្ទះ​នៅ​ប្រទេស​ម៉ាឡេស៊ី​ត្រូវ​បាន​អ្នក​តាម​ដាន​មើល​ឃើញ​ថា​ ជា​សញ្ញា​នៃ​ការ​ផ្លាស់​ប្ដូរ​តំបន់​សុវត្ថិភាព​សម្រាប់​អ្នក​រិះគន់ ​និង​ជា​ការ​រំលោភ​សិទ្ធិ​មនុស្ស​ធ្ងន់ធ្ងរ​ពី​សំណាក់​រដ្ឋាភិបាល​ម៉ាឡេស៊ី។ ​តំណាង​រាស្រ្ត​ម៉ាឡេស៊ី​ម្នាក់​អះអាង​ថា ខ្លួន​គ្រោង​ស្នើ​ឱ្យ​មាន​ការ​សួរ​ដេញ​ដោល​មួយ​អំពី​ការ​ចាប់​ខ្លួន​ពលករ​ខ្មែរ​ម្នាក់​ដែល​រិះគន់​លោក ​ហ៊ុន សែន ​និង​បញ្ជូន​មក​កម្ពុជា​តាម​សំណើ​របស់​រដ្ឋាភិបាល​កម្ពុជា។ លោក ​ស៊ុន ណារិន និង លោក លាស់ លីបលីប​ រាយ​ការណ៍​ឱ្យ​វីអូអេ​ពី​រាជធានី​ភ្នំពេញ​ដូច​ត​ទៅ៖

នៅ​ថ្ងៃ​ពុធ​នេះ ​តុលាការ​រាជធានី​ភ្នំពេញ​បាន​បើក​សវនាការ​ជំនុំ​ជម្រះ​ក្តី​លើ​លោក ​កើត សារ៉ាយ ​ដែល​ជា​ប្រធាន​សមាគម​សម្ព័ន្ធ​និស្សិត​បញ្ញវន្ត​ខ្មែរ។ ​លោក ​កើត សារ៉ាយ ​ត្រូវ​បាន​ឃុំ​ខ្លួន​កាល​ពី​ខែ​មេសា ​ឆ្នាំ​២០២៤ ​ពី​បទ​«ញុះញង់​បង្ក​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម» ​ចំពោះ​ការ​និយាយ​ជាមួយ​ប្រព័ន្ធ​ផ្សព្វផ្សាយ​អំពី​ជម្លោះ​ដីធ្លី​នៅ​ខេត្ត​ព្រះ​វិហារ។​ លោក ​ស៊ុន ណារិន​ រាយ​ការណ៍​ឲ្យ​វីអូអេ​ពី​រាជធានី​ភ្នំពេញ​ដូច​ត​ទៅ៖

កាល​ពី​ចុង​ខែ​កញ្ញា ​សមត្ថកិច្ច​បាន​ចាប់​ខ្លួន​ លោក​ ម៉ិច​ ដារ៉ា​ដែល​ត្រូវ​គេ​ស្គាល់​ថា​ អ្នក​កាសែត​មាន​ភាព​សកម្ម​ក្នុង​ការ​រាយ​ការណ៍​ព័ត៌មាន​ពាក់ព័ន្ធ​នឹង​ការ​ជួញ​ដូរ​មនុស្ស​ និង​ការ​ឆបោក​តាម​ប្រព័ន្ធ​អនឡាញ​ ឬ​ online scams ​និង​ធ្លាប់​ឈ្នះ​ពាន​រង្វាន់​ពី​ក្រសួង​ការ​បរទេស​សហ​រដ្ឋ​អាមេរិក ​ចំពោះ​ភាព​ក្លាហាន​នៃ​ការ​រាយ​ការណ៍​ព័ត៌មាន​អំពី​ប្រធាន​បទ​ដ៏​រសើប​ទាំង​នោះ។ ​សាលា​ដំបូង​រាជធានី​ភ្នំពេញ​បាន​ចោទ​ប្រកាន់​លោក ​ម៉ិច ដារ៉ា​ ពី​បទ​ «ញុះញង់​បង្ក​ឱ្យ​មាន​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម»។ ​នាយក​ទទួល​បន្ទុក​កិច្ចការ​ទូទៅ​នៃ​អង្គការ​ការពារ​សិទ្ធិ​មនុស្ស​លីកាដូ​ ​លោក ​អំ សំអាត ​ទទូច​ឱ្យ​តុលាការ​ដោះ​លែង​ លោក ​ម៉ិច ដារ៉ា។

ប្រធាន​គណបក្ស​ជំនាន់​ថ្មី ​លោក ​មាជ សុវណ្ណារ៉ា ​នៅ​ព្រឹក​ថ្ងៃ​ចន្ទ ​បាន​ចូល​ទៅ​តុលាការ​ខេត្ត​រតនគិរី ​ដើម្បី​តតាំង​នឹង​ការ​ចោទ​ប្រកាន់​រូប​លោក​ថា​«ញុះញង់​ឱ្យ​មាន​ការ​រើស​អើង»​នៅ​ក្នុង​ករណី​មួយ​ដែល​មាន​រយៈ​ពេល​ជាង​១​ឆ្នាំ​មក​ហើយ។​ ក្រោយ​សវនាការ​លោក​បាន​ផ្តល់​បទ​សម្ភាសន៍​ជា​មួយ​វីអូអេ​ ដោយ​បញ្ជាក់​ថា ​តុលាការ​មិន​ឃាត់​ខ្លួន​លោក​ទេ​ ប៉ុន្តែ​ដាក់​លក្ខខណ្ឌ​មួយ​ចំនួន​លើ​រូប​លោក។​ សូម​លោក​អ្នក​ទស្សនា​បទសម្ភាសន៍​នេះ​ដូច​ត​ទៅ៖

«ធម្មនុញ្ញវិជ្ជាជីវៈសារព័ត៌មាន»ត្រូវបានប្រកាសឲ្យប្រើប្រាស់ដោយក្រសួងព័ត៌មាន កាលពីដើមខែសីហា ឆ្នាំ ២០២៤ អ្នករិះគន់មួយចំនួនបានលើកឡើងថា មិនមានការពិភាក្សាផ្តល់យោបល់ទូលំទូលាយឡើយលើធម្មនុញ្ញនេះឡើយ។ នៅក្នុងបទសម្ភាសន៍ជាមួយលោក ស៊ុន ណារិន នៃវីអូអេ លោក ណុប វី នាយកប្រតិបត្តិនៃសមាគមខេមបូចា ស្នើឲ្យមានការពិនិត្យមើលធម្មនុញ្ញនេះឡើងវិញ ហើយធានាថាមានការចូលរួមមតិយោបល់យ៉ាងទូលំទូលាយពីគ្រប់ភាគីពាក់ព័ន្ធ៕

ជាមួយនឹងការទទួលបានសេរីភាពឡើងវិញរបស់មេដឹកនាំសហជីពមួយរូបគឺកញ្ញា ឈឹម ស៊ីថរ រាជរដ្ឋាភិបាលកម្ពុជាអាចបើកច្រកឲ្យខ្លួនឯងស្តារកិត្តិនាមនៅក្នុងការគោរពសិទ្ធិមនុស្ស សិទ្ធិនយោបាយ និងសិទ្ធិក្នុងការបញ្ចេញមតិបានកាន់តែប្រសើរជាងនេះ។ ជាពិសេសនៅក្រោមទស្សនវិស័យរបស់នាយករដ្ឋមន្ត្រីវ័យក្មេងរបស់កម្ពុជាលោក ហ៊ុន ម៉ាណែត ឥរិយាបថវិជ្ជមានខ្លះដែលអនុញ្ញាតឲ្យមានការរិះគន់ពីសាធារណជនអំពីបញ្ហាក្នុងសង្គមនានា ត្រូវបានអ្នកជំនាញមើលឃើញថា អាចជាស្ពានជំរុញឲ្យកម្ពុជាអាចបង្កើតរបត់នយោបាយថ្មីមួយដែលផ្អែកលើគោលការណ៍ផ្សះផ្សារនយោបាយនិងផលប្រយោជន៍ជាតិ ជាជាងផលប្រយោជន៍នយោបាយ។ នេះបើតាមការកត់សម្គាល់របស់អ្នកឯកទេសអភិបាលកិច្ចលោក ឱក សេរីសោភក្តិ៍៕

លោក​នាថ​ បណ្ឌិត ឫទ្ធិពល​ ប្រធាន​សមាគម​សង្គហ​ប្រយោជន៍​ជាតិ​បាន​ធ្វើ​ដំណើរ​ទៅមាតុភូមិ​កម្ពុជា​វិញ​កាលពី​ចុង​ខែ​ឧសភា​បន្ទាប់​ពី​អាក់​ខាន​ចំនួន​២៦​ឆ្នាំ។ លោក​បាន​ចែក​រំលែក​ដល់​វីអូអេ​អំពី​ការសង្កេត​ឃើញ​ការអភិវឌ្ឍ​នានា​នៅ​ក្នុង​ប្រទេស​កម្ពុជា​ជា​ពិសេស​លើ​ធនធាន​មនុស្ស។ លោក​ក៏​មាន​បំណង​វិល​ទៅ​បំពេញ​ការងារ​ជួយ​មាតុភូមិ​វិញ​ផងដែរ។ ​លោក​ម៉ែន គឹមសេង​នៃ​វីអូអេ​បាន​សម្ភាស​លោក​នាថបណ្ឌិត​ ឫទ្ធិពល​ដូច​តទៅ៖

លោក សុជាតា អ៊ឹង ជនជាតិ​អាមេរិកាំង​ដើមកំណើត​ខ្មែរ​ម្នាក់​បាន​ទទួល​ពាន​រង្វាន់​ National Heritage Fellowship Award ​នៅ​បណ្ណាល័យ​សភាជាតិ នៅ​ក្នុង​រដ្ឋធានី​វ៉ាស៊ីនតោន សហរដ្ឋអាមេរិក​កាលពី​ថ្ងៃ​ពុធ​ទី១៨ កញ្ញា ឆ្នាំ២០២៤​ កន្លងទៅ។ លោក សុជាតា អ៊ឹង ជាអ្នក​រាំរបាំប្រពៃណីខ្មែរ គ្រូរបាំ និង​ជា​អ្នក​ធ្វើម្កុដ​និង​សម្លៀកបំពាក់ប្រពៃណី​ខ្មែរ​នៅ​ក្នុង​និង​ជុំវិញ​រដ្ឋធានី​វ៉ាស៊ីនតោន​នេះ​ជាង​៤០ឆ្នាំ​មកហើយ។ កញ្ញា ទុំ ម្លិះ បានជួបសម្ភាសន៍ជាមួយ​លោក សុជាតា អំពីប្រវត្តិ សមិទ្ធផល ការងារ​ និង​ក្តីសង្ឃឹម​របស់លោកក្នុងនាម​ជា​អ្នក​ថែរក្សា​វប្បធម៌​ខ្មែរ​ម្នាក់​នៅ​ក្នុង​សហរដ្ឋ​អាមេរិក។

ក្រោយមានការជំទាស់ឥតឈប់ឈរពីពលរដ្ឋកម្ពុជានៅក្រៅប្រទេស រដ្ឋាភិបាលកម្ពុជា បានសម្រេចដកខ្លួនចេញពីកិច្ចសហការកិច្ចសហការតំបន់អភិវឌ្ឍន៍ត្រីកោណកម្ពុជា ឡាវ វៀតណាម (CLV-DTA)។ អ្នកឃ្លាំមើលការវវឌ្ឍសង្គមកម្ពុជាមួយចំនួនយល់ឃើញថា ការសម្រេចចិត្តនេះ ជារឿងត្រឹមត្រូវ និងឆ្លាតវៃមួយរបស់រដ្ឋាភិបាលកម្ពុជាដែលបានធ្វើទៅតាមសេចក្តីប្រាថ្នារបស់ពលរដ្ឋដែលខ្វល់ខ្វាយអំពីបញ្ហាបូរណភាពទឹកដី និងសម្បត្តិធនធានធម្មជាតិនៅក្នុងប្រទេស។ ពួកគេក៏ចង់ឃើញស្ថាប័នតុលាការកម្ពុជាពិចារណាដោះលែងអ្នកត្រូវបានចាប់ខ្លួនក្នុងការតវ៉ាជំទាស់នឹងកិច្ចសហការ CLV-DTA នេះ។