មន្រ្តីសារមន្ទីរជាតិឲ្យដឹងថា សារមន្ទីរកំពុងរៀបចំពង្រីកទីតាំងរបស់ខ្លួន ដើម្បីបំពេញតាមតម្រូវការជាក់ស្តែង និងស្របពេលដែលកម្ពុជាទទួលវត្ថុបុរាណពីក្រៅប្រទេសជាបន្តបន្ទាប់។ វត្ថុបុរាណដែលទទួលបានពីក្រៅប្រទេស ត្រូវបានចាត់ទុកថាជាដួងព្រលឹងរបស់ដូនតាខ្មែរ ដែលត្រូវបានលួចយកចេញពីកម្ពុជាក្នុងសម័យសង្រ្គាម និងក្នុងពេលកម្ពុជាមានចលាចលក្នុងប្រទេស។ លោក ហាន ណូយ រាយការណ៍លម្អិតឲ្យវីអូអេពីរាជធានីភ្នំពេញ៕

ការជួញដូរមនុស្សនៅក្នុងប្រទេសកម្ពុជានិងពីប្រទេសកម្ពុជាទៅកាន់ប្រទេសនានា បាននិងកំពុងបន្តកើតមានឡើង បើទោះបីជារដ្ឋាភិបាលកម្ពុជាមានវិធានការផ្សេងៗក្នុងការទប់ស្កាត់ និងបង្ក្រាបជាបន្តបន្ទាប់ក្តី។ លោក អំ សំអាត នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្ស លីកាដូ លើកឡើងនៅក្នុងបទសម្ភាសន៍ជាមួយអ្នកនាង កាន់ វិច្ឆិកា អ្នកសារព័ត៌មានវីអូអេថា ការជួញដូរមនុស្សនៅកម្ពុជាមានការកើនឡើង ហើយកើតមានក្នុងរូបភាពនិងទម្រង់ច្រើន។ លោកថា អ្នកពាក់ព័ន្ធជាពិសេសរដ្ឋាភិបាលចាំបាច់ត្រូវបង្កើនការទប់ស្កាត់និងបង្ក្រាបដើម្បីដោះស្រាយបញ្ហានេះឲ្យមានប្រសិទ្ធភាព៕

កាលពីថ្ងៃចន្ទ មន្រ្តីទូតបារាំងបានជួបជាមួយអាជ្ញាធរខ្មែរ ដើម្បីពិភាក្សាអំពីកិច្ចសហការក្នុងការស្វែងរកអ្នកនៅពីក្រោយនៃ ការបាញ់សម្លាប់លោក លិម គិមយ៉ា អតីតតំណាងរាស្រ្តខ្មែរ ដែលមានសញ្ជាតិបារាំង។ កញ្ញា មាស ដា រាយការណ៍ឲ្យវីអូអេពីរាជធានីភ្នំពេញដូចតទៅ៖

មេបញ្ជាការកងទ័ពជើងគោកសហរដ្ឋអាមេរិកលោក Ronald P. Clark កាលពីថ្ងៃចន្ទ បានមកបំពេញទស្សនកិច្ចនៅកម្ពុជារយៈពេលពីរថ្ងៃ ដែលជាដំណើរទស្សនកិច្ចមួយត្រូវបានភាគីកម្ពុជាមើលឃើញថាដើម្បីកសាងទំនុកចិត្តនិងការជឿជាក់ក្នុងវិស័យការពារជាតិរវាងប្រទេសទាំងពីរ។ មន្រ្តីកម្ពុជានិងអាមេរិកបានពិភាក្សាគ្នាអំពីការធ្វើសមយុទ្ធរួមគ្នា ដែលខកខានធ្វើជិត ១០ ឆ្នាំមកហើយ។ លោក ស៊ុន ណារិន រាយការណ៍ឱ្យវីអូអេពីរាជធានីភ្នំពេញ៕

អ្នកស្រី ង៉ែត ឃុន វ័យ​ ៨៥​ឆ្នាំ ត្រូវ​បាន​គេ​ស្គាល់​ថា​ជា​ជនរង​គ្រោះ​ម្នាក់​ក្នុង​ជម្លោះ​ដីធ្លី​នៅ​តំបន់​បឹង​កក់​ដែល​កើត​ឡើង​កាល​ពី​ជាង​១​០ឆ្នាំ​មក​ហើយ។ ជា​រឿយ​ៗ គេ​ឃើញ​អ្នកស្រី ង៉ែត ឃុន និង​កូន​ស្រី​ពៅ​របស់​អ្នកស្រី​តែង​តែ​បង្ហាញ​មុខ​នៅ​ខាង​មុខ​តុលាការ និង​ទីតាំង​ដែល​មាន​វិវាទដីធ្លី​មួយ​ចំនួន​ទៀត ដែល​អ្នកស្រី ង៉ែត ឃុន អះអាង​ថា​ដើម្បីផ្តល់​កម្លាំង​ចិត្ត​ដល់​ពលរដ្ឋ​រង ​គ្រោះឱ្យ​ហ៊ាន​ស្វែង​រក​យុត្តិ​ធម៌។ នៅ​ក្នុង​បទ​សម្ភាសន៍​ជាមួយ​ លោក លាស់ លីបលីប និងលោក ហាន ណូយ ដែលរាយការណ៍​ឲ្យ​វីអូអេ អ្នកស្រី​បាន​ប្តេជ្ញា​ចិត្តតស៊ូ ដើម្បី​ប្រជា​ធិបតេយ្យ និង​សិទ្ធិ​មនុស្ស។ តទៅ​នេះ សូម​ស្តាប់​ការ​រៀបរាប់​របស់​អ្នកស្រី ង៉ែត ឃុន ​ដូច​តទៅ៖

មន្រ្តីជាន់ខ្ពស់នៃកងទ័ពជើងគោកអាមេរិកមកបំពេញទស្សនកិច្ចនៅកម្ពុជារយៈពេលពីរថ្ងៃ។ មន្រ្តីជាន់ខ្ពស់រូបនោះនឹងជួបជាមួយថ្នាក់ដឹកនាំកម្ពុជា ក្នុងនោះមានលោកនាយករដ្ឋមន្រ្តី ហ៊ុន ម៉ាណែត ផងដែរ។ ដំណើរទស្សនកិច្ចនេះត្រូវបានអ្នកតាមដានមើលឃើញថា ជាសញ្ញាល្អមួយក្នុងការលុបបំបាត់មន្ទិលសង្ស័យរបស់អាមេរិកមកលើកម្ពុជានៅក្នុងបញ្ហាមួយចំនួន។ លោក ស៊ុន ណារិន រាយការណ៍ឲ្យវីអូអេពីរាជធានីភ្នំពេញ៕

បន្ទាប់ពីមានការបង្ក្រាបទៅលើទីតាំងឆបោកតាមអនឡាញមួយក្នុងក្រុងប៉ោយប៉ែត ខេត្តបន្ទាយមានជ័យ កាលពីថ្ងៃសៅរ៍មក អាជ្ញាធរកម្ពុជាបានអះអាងពីការបន្តស៊ើបអង្កេតទៅលើករណីនេះ ដើម្បីស្វែងរកជនពាក់ព័ន្ធ។ នៅក្នុងប្រតិបត្តិការបង្រ្កាបនោះ អាជ្ញាធរកម្ពុជាបានឃាត់ខ្លួនជនបរទេស ២៣០ នាក់ ចេញពីទីតាំងមួយកន្លែង ក្រោយការសហការជាមួយភាគីថៃ។ លោក ហាន ណូយ រាយការណ៍ឲ្យវីអូអេពីរាជធានីភ្នំពេញ៕

អតីតមន្ត្រីជាន់ខ្ពស់នៃសមាគមការពារសិទ្ធិមនុស្សអាដហុក លោក ស៊ឹង សែនករុណា បានភៀសខ្លួនចេញពីប្រទេសកម្ពុជាទៅរស់នៅប្រទេសអូស្ត្រាលី ដើម្បីគេចពីការប្តឹងផ្តល់របស់គណបក្សប្រជាជនកម្ពុជា។ នៅឯប្រទេសអូស្ត្រាលី លោកបានចូលរួមសកម្មភាពជាច្រើនក្នុងបុព្វហេតុជួយស្តារដំណើរការប្រជាធិបតេយ្យ និងលើកកម្ពស់សេរីភាពបញ្ចេញមតិនៅប្រទេសកម្ពុជា ហើយក៏បានបង្កើតអង្គការប្រជាធិបតេយ្យខ្មែរប្រចាំប្រទេសអូស្ត្រាលី។ លោក ហ៊ុល រស្មី អ្នកយកព័ត៌មានឲ្យវីអូអេ បានជួបសម្ភាសន៍ជាមួយលោក ស៊ឹង សែនករុណា តាមប្រព័ន្ធ Zoom អំពីការបង្កើតសមាគមនៅប្រទេសអូស្តា្រលី និងស្ថានការណ៍នយោបាយនៅប្រទេសកម្ពុជា៕

នៅព្រឹកថ្ងៃសុក្រ ទី ២១ ខែកុម្ភៈនេះ ក្រុមកូដករក្រុមហ៊ុនណាហ្កាវើលដ៍ប្រមូលផ្តុំគ្នានៅមុខក្រសួងការងារ ដើម្បីតាមដានពាក្យបណ្ដឹងដែលពួកគេបានដាក់ទៅរដ្ឋមន្ត្រីនៃក្រសួងការងារ លោក ហេង សួរ កាលពីថ្ងៃទី ១០ ខែមករា ឆ្នាំ ២០២៥ និងដើម្បីពន្លឿនឲ្យមានការដោះស្រាយវិវាទការងារដល់ពួកគេ។ ពាក្យបណ្តឹងដែលពួកគេបានដាក់ទៅក្រសួង ទាមទារឲ្យក្រុមហ៊ុនទទួលយកកម្មករនិយោជិតប្រមាណជាង ៤០០ នាក់ ចូលធ្វើការវិញ និងគិតប្រាក់អតីតភាពចាប់ពីថ្ងៃបញ្ឈប់រហូតដល់ថ្ងៃចូលធ្វើការ។ ក៏ប៉ុន្តែ ពួកគេអះអាងថា មកដល់ពេលនេះ ពួកគេមិនទាន់ទទួលបានដំណោះស្រាយណាមួយនៅឡើយទេ។ កញ្ញា មាស ដា រាយការណ៍លម្អិតឲ្យវីអូអេពីរាជធានីភ្នំពេញ៕

ការផ្លាស់ប្តូរ និងកាត់បន្ថយបុគ្គលិករបស់ទីភ្នាក់ងារសហរដ្ឋអាមេរិកដើម្បីការអភិវឌ្ឍអន្តរជាតិ ហៅកាត់ថា (USAID) បាននិងកំពុងបង្កជាផលប៉ះពាល់ធ្ងន់ធ្ងរដល់កិច្ចការមនុស្សធម៌ និងសង្គមស៊ីវិលជាច្រើននៅជុំវិញពិភពលោក រួមទាំងកម្ពុជាផងដែរ។ ទោះជាយ៉ាងណាក្តី មេដឹកនាំអង្គការនិងសមាគមមួយចំនួននៅកម្ពុជា រំពឹងថា រដ្ឋាភិបាលអាមេរិកអាចធើ្វការកែប្រែសេចក្តីសម្រេចរបស់ខ្លួន ដោយអនុញ្ញាតឲ្យទីភ្នាក់ងារ USAID បានដំណើរការឡើងវិញ។ លោក ហ៊ុល រស្មី រាយការណ៍លម្អិតឲ្យវីអូអេពីរាជធានីភ្នំពេញ៕