យុវតី​ឆ្នើម រិទ្ធី លំអរពេជ្រ (Lomorpich Rithy) កំពុង​ធ្វើ​ការ​យ៉ាង​សកម្ម ដើម្បី​លើក​កម្ពស់និងអភិវឌ្ឍន៍​វប្បធម៌​ខ្មែរ។ ​តាម​រយៈ​កិច្ច​ការងារ​ក្នុង​វិស័យ​សិល្បៈ​ជា​ច្រើន​ រាប់​តាំង​ពី​ការ​ផលិត​ភាពយន្ត​និង​វីដេអូ​តន្ត្រី​ រហូត​ដល់​ការគ្រប់គ្រងសិល្បករ​និងការ​រៀប​ចំ​មហោស្រព​វប្បធម៌​ធំៗ​ លំអរពេជ្រ មាន​គោល​បំណង​ជំរុញ​ទឹក​ចិត្ត​ដល់​យុវជន​ខ្មែរ ឲ្យ​ស្វែង​យល់​ពី​តម្លៃ​នៃ​សិល្បៈ ហើយ​ប្រើ​ប្រាស់​សិល្បៈ​ជា​យាន​ក្នុង​ការ​ចូល​រួម​ដោះ​ស្រាយ​បញ្ហា​សង្គម​នានា និងអភិវឌ្ឍន៍​ប្រទេស​ជាតិ។ កាល​ពី​ខែ​ចុង​ខែ​មេសា ក្នុង​ដំណើរ​ចូល​រួម​កម្មវិធី​ «ភាព​ជា​អ្នកដឹកនាំ​អន្តរជាតិ» ​របស់​ក្រសួង​ការបរទេស​អាមេរិក លំអរពេជ្រ បាន​ឆ្លៀត​ពេល​ចូល​មក​កាន់​បន្ទប់​ផ្សាយ​របស់ VOA ក្នុងរដ្ឋធានី​វ៉ាស៊ីនតោន ដើម្បី​ជជែក​ជាមួយ​លោក ចាប ចិត្រា (Chetra Chap) អំពី​ដំណើរ​អាជីព ​និង​ចក្ខុវិស័យ​របស់​នាង​ក្នុង​ការ​អភិរក្ស​និង​អភិវឌ្ឍន៍​វប្បធម៌ខ្មែរ។

លោក​ ប៉ូច រាសី​ នៃ VOA បានផ្តិតយករូបភាពនៃ «ទិវារំលឹកវិញ្ញាណក្ខន្ធកងទ័ពអាមេរិកាំង» នៅឯទីក្រុង New York ​សហរដ្ឋអាមេរិក។

ព្រះសង្ឃខ្មែរ​មកពីប្រទេសមួយចំនួន និងតាមបណ្តារដ្ឋនានានៅសហរដ្ឋអាមេរិកបានមកជួបជុំគ្នានៅវត្ដមុនីសុតារាម រដ្ឋមីនីសូតា សហរដ្ឋអាមេិរក កាលពីថ្ងៃសុក្រ ដេីម្បីរកវិធីលេីកស្ទួយព្រះពុទ្ធសាសនា ដោយរួមទាំងការបង្កើតពុទ្ធិកសមាគមព្រះសង្ឃខ្មែរ​-សហរដ្ឋអាមេរិកដ៏ធំមួយ។ ស្របពេលជាមួយគ្នានោះ ការជួបជំុគ្នានេះក៏ត្រូវបានធ្វើឡើងដើម្បីប្រារព្ធពិធីបុណ្យពិសាខបូជាផងដែរ។​ លោក​ សុខ​ ខេមរា នៃវីអូអេ បានសម្ភាសព្រះតេជគុណ​ភិក្ខុ​ម៉ឹង​ សាង​ ព្រះគ្រូចៅ​អធិការ​វត្តមុនីសុតារាម​ រដ្ឋ​មីនីសូតា​ សហរដ្ឋអាមេរិក ព្រះ​តេជគុណ​បណ្ឌិត​ហុក​ សាវណ្ណ​ ព្រះ​គ្រូចៅ​អធិការ​មួយ​អង្គ​នៃ​ទីក្រុង​ម៉ុងរ៉េអាល់ ប្រទេស​កាណាដា និងលោក ចែម ស៊ីធឿន ប្រធានគណៈកម្មការរៀបចំកម្មវិធីបុណ្យ អំពីកិច្ចខិតខំប្រឹងប្រែងនេះលើកស្ទួយព្រះពុទ្ធសាសនានៅសហរដ្ឋអាមេរិកនេះ។

នៅថ្ងៃ​ព្រហស្បតិ៍នេះ អតីត​មន្រ្តី​គណបក្សសង្រ្គោះជាតិ​ចំនួន ៦នាក់ បាន​ចូល​បំភ្លឺ​នៅ​តុលាការ​ខេត្ត​បាត់ដំបង ដោយ​សង្ស័យ​ថា​បាន​បំពាន​សាលដីកា​របស់​តុលាការ​កំពូល ក្នុងការ​រំលាយ​គណបក្ស​សង្រ្គោះ​ជាតិ កាលពី​ខែវិច្ឆិកា ឆ្នាំ២០១៧។ រហូត​មក​ដល់​ពេល​នេះ តុលាការ​បាន​កោះហៅ​មនុស្ស​យ៉ាង​តិច ៣៥ នាក់រួចទៅហើយ ពាក់ព័ន្ធ​នឹង​សំណុំ​រឿងនេះ។ ប៉ុន្តែ​មិនទាន់​មាន​នរណា​ម្នាក់​ត្រូវបាន​ចោទ​ប្រកាន់ និង​ឃុំខ្លួន​នោះ​ទេ។ លោក ស៊ុន ណារិន អ្នក​យក​ព័ត៌មាន​ឲ្យ​ VOA ជូន​សេចក្តី​រាយការណ៍​លម្អិត​ពី​ខេត្ត​បាត់ដំបង៕

លោក​ សួង សុភ័ក្ត្រ ដែល​ជា​ស្ថាបនិក​និង​នាយក​នៃ​អង្គការ​សកម្មភាព​សិល្បៈ​ខ្មែរ ត្រូវ​បាន​គេអញ្ជើញឲ្យ​មក​ធ្វើ​បទ​បង្ហាញ​ពី​ការងារ​ដឹកនាំ​ល្ខោន​និយាយ​របស់​លោក នៅ​ឯ​សន្និសីទស្ដី​ពី​ការ​សម្ដែង​ល្ខោន​និង​នយោបាយ នៅ​ឯ​សាកលវិទ្យាល័យ Georgetown ក្នុង​រដ្ឋធានី​វ៉ាស៊ីនតោន សហរដ្ឋ​អាមេរិក។ សន្និសីទ​នេះ​ត្រូវ​បាន​ធ្វើ​ឡើង​កាល​ពី​ថ្ងៃ​ទី​៨​ដល់ថ្ងៃ​ទី១១​ខែ​ឧសភា ដែល​បាន​សិល្បករ​ជាង​២០០​រូប​មក​ពី​ទូទាំង​ពិភពលោក។ លោក ចាប ចិត្រា នៃ VOA បាន​ធ្វើ​បទ​សម្ភាសន៍​ជាមួយ លោក ​សួង សុភ័ក្ត្រ នៅ​ឯ​សាកលវិទ្យាល័យ Georgetown បន្ទាប់​ពី​បទ​បង្ហាញ​របស់​លោក ដែលស្តី​អំពី​ និយមន័យ និង​អត្ថប្រយោជន៍​នៃ​ល្ខោន​និយាយ។

លោក​អាឡិច ហ្គន់សាឡេស ដេវិតសុន (Alejandro Gonzalez Davidson) ស្ថាបនិក​នៃចលនា​មាតាធម្មជាតិ និង​ជា​អ្នក​ស្រឡាញ់​និង​ការពារ​សម្បត្តិធនធានធម្មជាតិនៅកម្ពុជា ត្រូវបាន​តុលាការកម្ពុជាកោះហៅឲ្យ​ចូល​មក​បង្ហាញ​ខ្លួនកាលពី​ពេល​ថ្មីៗនេះ ក៏ប៉ុន្តែ​លោក​មិន​អាច​ធ្វើ​ដំណើរ​ទៅ​កាន់​ប្រទេស​កម្ពុជា​បាន​ទេ ដោយសារ​លោក​ត្រូវបាន​រដ្ឋាភិបាល​កម្ពុជា​ដាក់​ចូល​ក្នុង​បញ្ជី​ឈ្មោះ​ជន​ដែល​មិន​អនុញ្ញាត​ឲ្យ​ចូល​ប្រទេស​កម្ពុជា។ ទោះ​យ៉ាង​ណា​ក្តី លោកអាឡិច សង្ឃឹម​ថា នឹង​មាន​ពន្លឺ​ណាមួយ​ដែល​អនុញ្ញាត​ឲ្យ​លោក​បាន​វិល​ត្រឡប់​ទៅ​កម្ពុជា។ ស្របពេលជាមួយ​គ្នា​នេះ សកម្មភាព​នៃចលនា​មាតាធម្មជាតិ​របស់​លោក នៅ​តែ​បន្ត ដោយ​សកម្មជន​យុវជនកម្ពុជាដែល​ធ្វើការ​ស្ម័គ្រចិត្ត​ឲ្យ​អង្គការមួយនេះ ខិតខំ​បង្ហាញ​ពី​សកម្មភាព​បំផ្លិចបំផ្លាញធនធាន​ធម្មជាតិ​នៅ​ក្នុង​ប្រទេស​កម្ពុជា ដើម្បី​ជំរុញ​ឲ្យ​មាន​ការ​អន្តរាគមន៍​ពី​សមត្ថកិច្ច និង​រដ្ឋាភិបាលកម្ពុជា។ លោក មែ៉ន គឹមសេង បាន​សម្ភាសលោក​អាឡិច ហ្គន់សាឡេស ដេវិតសុន កាលពី​ថ្ងៃទី៩ ខែឧសភា នៅពេល​ដែល​លោក​អាឡិច បាន​ធ្វើ​ដំណើរ​ទស្សនកិច្ចនៅ​រដ្ឋធានីវ៉ាស៊ីនតោន សហរដ្ឋអាមេរិក៕

​នាឱកាសទិវាសេរីភាព​សារព័ត៌មានពិភពលោក ​ថ្ងៃ​ទី​៣ ខែ​ឧសភា​នេះ អ្នក​សារព័ត៌មាន​មួយ​ចំនួន​នៅ​ក្នុង​ប្រទេស​កម្ពុជា​បាន​ប្រាប់ VOA អំពី ការ​គំរាមគំហែង ការ​ធ្វើ​ទុក្ខ​បុកម្នេញ និង​ការ​ភ័យខ្លាចចំពោះ​ការ​ចាប់​ខ្លួន​របស់​អាជ្ញាធរ។​ ពួកគេ​និយាយ​ថា​ ការ​បារម្ភ​ពី​ការ​សរសេរ​ព័ត៌មាន​ស៊ីជម្រៅ​ និង​ការ​រឹតត្បិត​ខ្លួនឯង​ក្នុង​ការ​សរសេរ​ព័ត៌មាន​ មាន​ច្រើន​ជាង​មុន ​បើ​ទោះ​បី​ជា​វា​មាន​រយៈពេល​ជាង​មួយ​ឆ្នាំ​ទៅ​ហើយ បន្ទាប់​ពី​កាសែត​ភាសា​អង់គ្លេស ឌឹ​ ខេមបូឌា ដេលី និង​វិទ្យុ​មួយ​ចំនួន​ត្រូវ​បាន​បិទ​មុន​ការ​បោះឆ្នោត​ជាតិ​ឆ្នាំ​២០១៨។ កញ្ញា ផន បុប្ផា រាយការណ៍លម្អិតពី​រាជធានីភ្នំពេញ៕

ក្រុមអ្នកតស៊ូមតិខ្មែរកម្ពុជាក្រោម បានបន្តតស៊ូមតិរបស់ខ្លួននៅលើឆាកអន្តរជាតិ នៅក្នុងពេលពួកគេប្រុងប្រៀបរៀបចំសន្និសីទធំមួយក្នុងប្រទេសហូឡង់ ដើម្បីស្វែងរកការគាំទ្រឲ្យមានសិទ្ធិស្វ័យសម្រេចលើជោគវាសនាដោយខ្លួនឯង សេរីភាព និងការគោរពសិទ្ធិពលរដ្ឋខ្មែរក្រោម ដែលរស់នៅលើទឹកដីខ្មែរដែលបារាំងកាត់ឲ្យទៅវៀតណាមគ្រប់គ្រងកាលពីឆ្នាំ១៩៤៩។ លោក ប្រាក់ សេរីវុឌ្ឍ ប្រធានសហព័ន្ធខ្មែរកម្ពុជាក្រោម បានផ្តល់បទសម្ភាសន៍ដល់លោក សុខ ខេមរា នៃ VOA កាលពីពេលថ្មីៗនេះ អំពីការបន្តតស៊ូមតិរបស់ខ្មែរកម្ពុជាក្រោម៕

ក្រុមហ៊ុនចិន ឈ្មោះថា Union Development Group (UDG) បានទទួលដីសម្បទានពីរដ្ឋាភិបាលកម្ពុជាចំនួន ៤,៥ ម៉ឺនហិកតា ក្នុងស្រុកចំនួនពីរនៅក្នុងខេត្តកោះកុង គឺស្រុកបុទុមសាគរ និងគីរីសាគរ កាលពីឆ្នាំ២០០៨ ដើម្បីអភិវឌ្ឍទៅជាកន្លែងលំហែកាយដ៏ធំមួយ។ កន្លែងលំហែកាយបែបទំនើបមួយនេះ នឹងមានវាលព្រលានយន្តហោះដ៏ធំមួយ និងកំពង់ផែចំនួន ៣ ផងដែរ។ តាមគម្រោងរបស់ក្រុមហ៊ុន ព្រលានយន្តហោះដែលមានចម្ងាយផ្លូវសម្រាប់យន្តហោះចុះ ប្រវែង ៣២០០ម៉ែត្រ និងទទឹង៦០ម៉ែត្រ នឹងត្រូវបញ្ចប់នៅក្នុងខែឧសភា ឆ្នាំ២០២០ខាងមុខ។ លោក ស៊ុន ណារិន នៃ VOA រាយការណ៍អំពីរឿងនេះ៕

ទោះជា​រាជធានី​ភ្នំពេញ មាន​សភាព​ស្ងប់ស្ងាត់​ខុស​ពី​ធម្មតា​ក្នុង​ថ្ងៃ​បុណ្យ​ចូល​ឆ្នាំថ្មី​ប្រពៃណី​ជាតិ​ខ្មែរ​ក៏​ដោយ ក៏​ពល​រដ្ឋខ្មែរ​មួយ​ចំនួន​ដែល​មិន​បាន​ធ្វើ​ដំណើរ​ទៅ​កម្សាន្ត​នៅ​ខេត្ត​នា​នា​ ​បាន​ចូលរួម​ពិធី​សង្ក្រាន្ត​វត្តភ្នំ ​ដើម្បី​អបអរ​សាទរ​ថ្ងៃ​បុណ្យ​ចូល​ឆ្នាំថ្មី ដែល​មាន​រយៈ​ពេល​បី​ថ្ងៃ។​ ​ខាង​ក្រោម​នេះ​គឺ​ជា​វីដេអូ​ខ្លី​ ​ពី​សកម្មភាព​ទូទៅ​នៃ​កម្មវិធី​សង្ក្រាន្ត​វត្តភ្នំ​នាពេល​រសៀល​ថ្ងៃ​ចន្ទ ដែល​ជា​ថ្ងៃ​ទី​ពីរ​នៃ​កម្មវិធី​រយៈ​ពេល​៣ថ្ងៃ។ វីដេអូ​ទាំងស្រុង​ដោយ​លោក នៅ វណ្ណារិន​ ​នៃ​ VOA៕