កាល​ពី​ចុង​ខែ​កញ្ញា​កន្លង​ទៅ​ លោកស្រី​ Rhona Smith​ អ្នក​រាយការណ៍​ពិសេស​របស់​ក្រុម​ប្រឹក្សា​សិទ្ធិ​មនុស្ស​នៃ​អង្គការ​សហប្រជាជាតិ​ប្រចាំ​កម្ពុជា​បាន​ថ្លែង​នៅ​ក្នុង​សន្និសីទ​ប្រចាំ​ឆ្នាំ​នៅ​ក្រុង​ហ្សឺណែវ​អំពី​ឱនភាព​នៃ​ការ​គោរព​សិទ្ធិ​មនុស្ស​នៅ​ក្នុង​ប្រទេស​កម្ពុជា។​ លោក​ស្រី​ Rhona Smith​ បាន​ក៏​បញ្ជាក់​ពី​បន្ថែម​ថា​ ការ​ប្រើប្រាស់​ប្រព័ន្ធ​តុលាការ​ក្នុង​គាប​សង្កត់​លើ​អ្នក​ការពារ​សិទ្ធិ​មនុស្ស​និង​តាក់តែង​ច្បាប់​ដោយ​ការ​ខ្វះ​ការ​ពិគ្រោះ​យោបល់​ជា​ដើម។ នៅ​សប្ដាហ៍​នេះ​ លោកស្រី​បាន​បំពេញ​ទស្សនកិច្ច​ជា​ផ្លូវការ​លើក​ទី​៣​ក្នុង​ប្រទេស​កម្ពុជា ​ក្នុង​ការ​ស្វែង​យល់​បន្ថែម​ទៀត​លើ​ការ​វិវត្ត​ថ្មីៗ​ក្នុង​ប្រទេស​កម្ពុជា។​ លោក​ នៅ វណ្ណារិន ​នៃ​ VOA​ បាន​ជួប​សម្ភាសន៍​ផ្ទាល់​ជា​មួយ​លោក​ស្រី​ Rhona Smith​ លើ​ដំណើរ​ទស្សនកិច្ច​របស់​លោក​ស្រី​នេះ៕

លោក​អតីត​ឯកអគ្គរដ្ឋ​ទូត​បារាំង Claude Martin ដែល​បាន​ធ្វើការ​ដោយ​ផ្ទាល់​ជាមួយ​នឹង​ព្រះបាទ​នរោត្តម សីហនុ ក្នុងការ​រៀបចំ​ការចរចា​បញ្ចប់​សង្គ្រាម​ក្នុង​ប្រទេស​កម្ពុជា​នឹង​ឈាន​ទៅ​ដល់​ការចុះហត្ថលេខា​លើ​កិច្ចព្រមព្រៀង​សន្តិភាព​ទីក្រុង​ប៉ារីស​នៅ​ថ្ងៃទី២៣ ខែតុលា ឆ្នាំ១៩៩១ បាន​បញ្ជាក់​ប្រាប់​លោក ម៉ែន គឹមសេង នៃ​VOA ពី ការយល់ឃើញ​របស់​លោក​ចំពោះ​ព្រះបាទ នរោត្តម សីហនុ៕

នៅ​ថ្ងៃអាទិត្យ​ទី ៩ ខែតុលា​កន្លង​ទៅ​នេះ ពលរដ្ឋ​ខ្មែរ​នៅ​អូស្រ្តាលី និង​មាន​ការចូលរួម​ពី​សំណាក់​សមាជិក​សភា​របស់​អូស្រ្តាលី​ទាំង​កម្រិត​រដ្ឋ និង​កម្រិត​សហព័ន្ធ បាន​ជួបជុំ​គ្នា​នៅ​ក្បែរ​ទីក្រុង​ម៊ែលប៊ន​ដើម្បី​រំឭក​ខួប​១០០​ថ្ងៃ​នៃ​ការស្លាប់​របស់​លោក​បណ្ឌិត កែម ឡី ដែល​ជា​អ្នកវិភាគសង្គម​ដ៏ល្បីឈ្មោះមួយរូប ដែល​ត្រូវ​ខ្មាន់​កាំភ្លើង​បាញ់​សម្លាប់​កាលពី​ថ្ងៃអាទិត្យ ទី១០ ខែកក្កដា ឆ្នាំ២០១៦ ក្នុង​ទីក្រុង​ភ្នំពេញ៕

មន្ត្រី​អង្គការ​សហប្រជាជាតិ​បាន​ថ្លែង​ថា កម្ពុជា​បាន​ចូលរួម​ក្នុង​កិច្ចការ​អន្តរជាតិ​មួយ​ចំនួន​ដំណាល​គ្នា ដែល​កម្ពុជា​ខ្លួន​ឯង​កំពុង​អភិវឌ្ឍ​ប្រទេស ដែល​ទើប​ងើប​ពី​សង្គ្រាម​ជា​ច្រើន​ទសវត្សរ៍។ លោក សុខ ខេមរា នៃ VOA បាន​ចុះ​ទៅ​យក​ព័ត៌មាន​នៅ​ទីក្រុង​ញូវយ៉ក ក្នុង​ពេល​ដែល​មេដឹកនាំ​ពិភពលោក​ជួប​ប្រជុំ​មហា​សន្និបាត​អ.ស.ប.​លើក​ទី៧១ ដែល​កម្ពុជា​បាន​បញ្ជូន​តំណាង​មក​ថ្លែង​សុន្ទរកថា​កាលពី​ចុង​ខែ​កញ្ញា ហើយ​បាន​ធ្វើ​សេចក្តី​រាយការណ៍​ថា ការ​អភិវឌ្ឍន៍ ការ​ចូលរួម​ចំណែក​ក្នុង​ការ​ទប់​ស្កាត់​ការ​ប្រែប្រួល​អាកាសធាតុ បន្ថែម​លើ​ការ​បញ្ជូន​កម្លាំង​ទ័ព​ចូលរួម​បេសកកម្ម​រក្សា​សន្តិភាព គឺជា​ការ​លើក​ទឹក​ចិត្ត​ដល់​កម្ពុជា​ពី​អ.ស.ប.៕

សកម្មជន​មួយ​ចំនួន​កំពុង​ជំរុញ​ឲ្យ​មាន​ការ​កែប្រែ​ប្រព័ន្ធ​បោះឆ្នោត​ At-Large ដើម្បី​ធានា​ឲ្យ​មាន​តំណាង​ចម្រុះ ដែល​ចេញ​ពី​តំបន់​ផ្សេងៗ​ចូល​កាន់​តំណែង​ជា​អ្នក​ដឹកនាំ​នៅ​ទីក្រុង​ឡូវែល ដែល​មាន​ពលរដ្ឋ​ខ្មែរ​អាមេរិកាំង​រស់នៅ​ប្រមាណ​ជាង​៣ម៉ឺន​នាក់៕

តំណាង​កម្ពុជា​នៅ​អង្គការ​សហ​ប្រជាជាតិ​លោក​ទេសរដ្ឋមន្ត្រី និង​ជា​រដ្ឋមន្ត្រី​ក្រសួង​ការបរទេស ប្រាក់ សុខុន បាន​ផ្តល់​បទសម្ភាសន៍​ជាមួយ​លោក សុខ ខេមរា អ្នក​យក​ព័ត៌មាន​របស់ VOA ក្រោយពី​លោក​បាន​បញ្ចប់​ការថ្លែង​សុន្ទរកថា​នៅ​ឯ​មហា​សន្និបាត​អ.ស.ប.​លើក​ទី៧១​នៅ​ឆ្នាំ​នេះ។ ក្នុង​បទសម្ភាសន៍​ដែល​បាន​ធ្វើ​ឡើង​នៅ​ក្នុង​ទីក្រុង​ញូវយ៉កលោក ប្រាក់ សុខុន បាន​ថ្លែង​អំពី​ជំហរ​របស់​កម្ពុជា​លើ​បញ្ហា​ក្នុង​តំបន់​និង​អន្តរជាតិ ហើយនឹង​អំពី​ការបំភ្លឺ​របស់​លោក​ទាក់ទងនឹង​ការរិះគន់​រឿង​សិទ្ធិ​មនុស្ស​និង​ប្រជាធិបតេយ្យ៕

ទោះបី​ជា​យុវជន​ខ្មែរ​អាមេរិកាំង​នៅ​ទីក្រុង​ឡូវែល​ រដ្ឋ​ម៉ាសាឈូសេត បាន​និង​កំពុង​ប្រឈម​នឹង​បញ្ហា​មួយ​ចំនួន ដូចជា​ក្រុម​ក្មេង​ទំនើង គ្រឿង​ញៀន និង​អំពើ​ហិង្សា​ក៏ដោយ ក៏​ពួកគេ​កាន់តែ​ច្រើន​បាន​ងាក​ទៅ​ចាប់​យក​ការ​អប់រំ​កាន់​តែ​ខ្ពស់ ដោយ​សារ​ការ​ជំរុញ​ទឹក​ចិត្ត​ពី​ឪពុក​ម្តាយ​របស់​ពួក​គេ៕

ប្រទេស​ថៃ​គ្រោង​នឹង​សង់​ទំនប់​បង្វែរ​ទឹក​ដ៏​ធំ​មួយ ដើម្បី​យក​ទឹក​ពី​ទន្លេ​មេគង្គ​ទៅ​ប្រើប្រាស់​នៅ​ភាគ​ឦសាន​របស់​ប្រទេស​ខ្លួន។ អ្នកជំនាញ និង​អ្នកការពារ​បរិស្ថាន យល់​ថា វា​នឹង​អាច​ផ្តល់​ផល​ប៉ះពាល់​យ៉ាង​ធ្ងន់ធ្ងរ ដល់​ចរន្ត​ទឹក​ទន្លេ​មេគង្គ និង​ជីវិត​រស់នៅ​តាម​បណ្តោយ​ទន្លេ ដ៏​វែង​បំផុត​លំដាប់​ទី​១២​របស់​ពិភព​លោក​នេះ។ លោក នៅ វណ្ណារិន​នៃ​VOA​ បាន​ធ្វើ​ដំណើរ​ទៅ​កាន់​ស្រុក​ឈាង​ខាន់​នៃ​ប្រទេស​ថៃ​ជាទី​ដែល​ទន្លេ​មេគង្គ​បាន​ខ័ណ្ឌ​ចែក​ប្រទេស​ថៃ​និង​ឡាវ៕

មាន​ករណី​ផ្ទុះ​មួយ​នៅ​កណ្តាល​រាជធានី​ភ្នំពេញ​នៅ​រាត្រី​ថ្ងៃអង្គារ​ទី ០៦ ខែកញ្ញា ឆ្នាំ២០១៦​នេះ ដែល​បាន​បណ្តាល​ឲ្យ​មនុស្ស​បួន​នាក់​រង​របួស។ យ៉ាងណា​ក៏​ដោយ ស្នងការ​នគរបាល​រាជធានី​ភ្នំពេញ លោក ជួន សុវណ្ណ និង​ក្រុម​អាជ្ញាធរ​មាន​សមត្ថកិច្ច​មិន​ទាន់​អាច​ប្រាប់​ពី​មូលហេតុ​នៃ​ការផ្ទុះ​នេះ​នៅឡើយ​ទេ៕